Na hi citciat se hi

Na hi citciat se hi

Jesu hong suah khit phetin, thah dingin ana zongsak pen, ama kumpiza’ luah kha leh cih patau in, hazatna lungsim tawh a kidim, Herod kumpipa na hi citciat se hi.

Pasian’ Tapa taktak na hih leh, tua bang tuabangin na lamdang bawl in la, tuabang tuabangin om in ci-a, ana ze-etet pen, Dawimangpa(Satan) na hi citciat se hi.

Jesu leitungah hong vak lai-in suang peuh tawh ana den sawm pen, mihai dawilutte khawng bekmah na hi citciat se hi.

Simmawh langpan’ in a hoihlohna leh a mawhna bekbek ana zongzong pen, Jesu mahmah in, “Gul bangin ngian a zang note aw, migilo na hih uh ciangin bangci-in thuhoih genthei mah ding na hi uh hiam?…… Gul a bang mite’ suanlekhak mite aw, hell khuk tun nading thukhenna panin a suakta dingin bangci-in kilamen thei na hi uh hiam?” (Mat 12:34, Mat12:33) ana cih, Farisi mi kipilsak(mualtan’ suan)te na hi citciat se uh hi.

Jesu’ kithah nading vaihawm in, ngun peek sawmthum tawh Jesu a zuak pen, a lungsimkawi mahmah, Iskariot’ tapa Judas na hi citciat se hi.

Jesu’ in mawhna khat zong neilo ahihna thei napi-in, Jesu Singlamteh tungah thah dingin phalna a pia pen, thuman thei napi-in thuman bangin thu a khen ngam lo(thuman a din’pih ngamlo) Pilat na hi citciat se hi.

Jesu a kimat khit ciangin, vuagawp, satgawp in cilphih in sisan naisan a luangsak pen, mithah mivuak ding khawng mulkimhuai asa vetlo galkap gilo mahmah teng na hi citciat se hi.

Jesu singlamteh tungah a kikhai khit ciangin, Pasian’ Tapa taktak na hih leh nang leh nang kihonkhia in la, ko zong hong honkhia in,” ci-a ana ko/phin gawp pen zong, migilopa(tualthatpa)na hi citciat se hi.

Hi bang teng pen, Pasian’ deihna a tangtun nadingin a piang himah ta leh hibang pianziate sungah i kihel khak loh ding a thupipen ahi hi. Jesu mahmah in zong, “A nu’ sungpan in piang kei leh hoihzaw ding hi,” a cih pen hibang mite mah ahi hi. Jesu’ langkhat ah a om peuhmah a bangci mi cih thei khin na hih manin, Jesu tawh kisai-in, kei pen a bangci mi ka hi hiam, ci-in, nang leh nang na ki-en phakik in. Amen!

Khazih sungah,
David Tuang