Myanmar President: Gambup Lutangpi U Htin Kyaw Zogam hongzin

Myanmar President: Gambup Lutangpi U Htin Kyaw Zogam hongzin

Tonzang Khuanu,khuapa te in Tedim District ngah zawh nading Ngetsak: Tonzang – Feb 19 :: Myanmar Gambup Luntangpi U Htin Kyaw le apawl te tuni in Zogam, Tonzang khua ah hong tung a, mipi tawh kimuh khopna ah Tonzang khua’nu, Khua’pa te in lunggulhna pulakna ah Tedim District ngah zawh nading ngetsak uh hi cih thu kiza hi.

Tua pulakna sung ah, Tonzang le Cikha khua pan mipi te in District zum ahi Falam tawh kizopna pen Tonzang pan Tai 102, Cikha pan Tai 155 haksapi in kizom kul a lampi haksatna, zumvai paivai haksatna tampi om ahih man in, Tonzang pan Tain 27 bek akigam la ahi Tedim Township pen District in hong vaihawm saknading nen uh hi.

Tua ban ah, Cikha-Khampat lampi pen Zogam le Sagain gamke kizopna ding huntomno sung in akitunna lampi ahih man in, Cikha-Khampat kizopna ding a dal hi Meitun gun ah Pi 450 Leipi khat hong phahsak na ding.

Tonzang khua kim khua pam pan khangno te in khua le tu i khantohna ding akisam Technological pilna te sin thei in, khua le tui mah ah zat kik theih nading in Kumpi vaihawmna ah Technological High School khat hong vaihawm sak nading cih zong zong ngen uh hi.

Kumpi zum tuamtuam lam pan in zong lunggulhna te pulakna kinei a, Zato lam pan in Dal Khai Rural Health Centre puah phat sak nading, Bapi ah RHC khat a kilam nading, Sang lam pan Tonzang Sangpi ading Pi 90×40 RC Dawl Nih Sanginn lamsak nading cih te ngen uh hi cih thu kiza hi.

Gambup Lutangpi U Htin Kyaw pen Zomi Nam Ni hong piankhiatna khua Falam ah Kum 69 cinna Zomi Nam Ni uap ding le Falam khua sat zawh Kum 125 cin Jubilee muakna in hong zin hi a, khanglam Zosuan te lam ah zong zin suak ding in kilamen hi.

Amah pen NLD pan hi a, kua mah upmawh loh in Daw Aung San Suu Kyi vaihawmna tawh Myanmar Gambup Lutangpi in a kitel ahi hi. Abeisa 2015 kum Zogam Mencip dongtuak lai in zong Daw Khin Kyi Foundation min tawh Zogam ah Solar bawlsak ding in hong pai ngei hi.

2017 Kum February pen Zogam ading a thulamdang mahmah khat hi a, February 5 ni in Gambup Lutang nih, Zosuan sung pan Myanmar Gam ah Lutangpi a sem masa ahi Pu Henry Van Thio le U Lian Mangpi te Zogam hong zin khit zawh ni 20 sung in Gambup a lianpen Lutangpi zong Zogam hong zin thei ahi hi. By ZINGSOL Tanute/ Photo: Siapi Mungno FB