Singapore ah Myanmar gammi innteeng nasemkhat inndawl 18 pan kia in si
Singapore gamsung ah innteeng nasem “Maid” in aom Myanmar numeikhat inndawl 18th Floor panin kia ahih manin si cih Singapore gamsung aom Myanmar Embassy te’n genkhia cih MMTimes pan kiza hi. October 08 ni in Condominium innsangdawn 18th Floor pekpan in akiasuk cimawk hi.
Myanmar Embassy te genkhiatna ah hih thupiang pen Singapore Police te’n akanciansan laitak uh hi a, banghang in kia cihte athu akician in hong zasakkik nailo uhhi ci’n genkhia uhhi. Tua inndawn 18 panin atuaksuk hiam, akia hiam cihpen aki kanciansan laitak ahihi.
Singapore Police te genna ah tua innteeng numeinu akiatlaitak in innteekte kuamah omlo cihi. Nasemnu guak Apartment innsung ah aomlaitak hi a, sunkimpawl in akia cihi.
Passport tungtawn in akitheihna ah tua numeinu minpen Ma Wyne Wyne Lal kici a, kum 23 aphakhin khat ahihi. Singapore gamsung ah innteeng nasem “Domestic Worker” in asepzawh khakhat khawngbek phapan cihi.
Singapore-based Humanitarian Organization for Migrations Economics ah asem ahi Ma Khin Lay kicinu in agenkhiatna ah hih asinu ii asanggam te numei 2 zong Singapore gamsung mahah innteeng nasem in aom uh cihi.
Ameltheih tanau te genkhiatna ah hih Ma Wyne Wyne Lal pen Passport tungah akum 23 ahih hangin, akum taktakpen 16 bek phapan cimawk hi. Mandalay Region, Yamaethin Township panin Singapore ah nasemding in apai ahihi.
Hih asinu pen Singapore apaitheih nadingin apuakte pen Yangon pan Agent (puaisa) te hi a, tua Agent tezong buaina om ahih manin, taimangkhin, kibucip khin uh cihi.
Singaore gamsung aom Myanmar Embassy thunei te genna ah hih asinu vaitawh kisai in a innkuanpih tetawh kikumkhawm in, Singapore gamsung ah vuitheih nadingin aki panpihlaitak cihi. Asinu ii asanggam te ahi Singapore gamsung a nasem te’n Facebook tungtawn in agenna ah aluanghawm pen Singapore gamsung mahah kivuiding cihi.
Singapore gamsung mahah abeisa May khasung inzong kum 15 bek aphapan Myanmar gammi nasemkhat inndawl 9th Floor panin kiasuk ngei hi. Tua numeinu pen atuak hilo, Accident in akia kici a, silo bilbel hi.
Abeisa June 17 ni inzong Singapore Condominium khat ii inndawl 18th Floor panin Myanmar gammi innteeng nasemkhat lengkhiamawk hi. Tuanu pen Suicide in alengkhia hi a, anuai ah atuksuk ciangin sipah hi.
Related: Singapore ah Myanmar Maid khat innteekpa’n buan ahih manin kum 13 thongkia
Myanmar Government in abeisa 2013 kumsung in Singapore gamsung ah innteeng nasem “Domestic Worker” dingin numei mi 150 bang paisak uhhi. Tuakhit ciangin 2014 kumsung kuamah apaiding phallo in, khakcip uhhi. Tulaitak Singapore gamsung ah Myanmar Domestic Workers akigawm in mi 40,000 bang omding cimawk hi. Sawltak #zomidaily
Comment piaknop aomleh...