LZI Statement: Myanmar gam leh ICJ thukhenzumpi thu

LZI Statement: Myanmar gam leh ICJ thukhenzumpi thu

United Nations (UN) Kipawlna sung a kipawlkhawm Gam tuamtuamte in a khun, “Convention on the Prevention and Punishment of the Crime of Genocide” kici Minam khatpeuh maimangsakna a omlohna dingin khaktanna leh a maimangsak khatpeuh mawhsakna ding thu tawh kisai Thukimna zui in Myanmar Gam in Rohingya Minam-te tung ah a khialhnate a khawlna ding, tua khialhnate abawl Galkap, Kumpi/Kipawlna (Organization), Mimal khatpeuh in khialhna abawl nawnlohna dingin thu apia dingin UN Kipawlna International Court of Justice (ICJ) Thukhenzumpi tung ah Gambia Gam in ngen hi.

Gambia Gam in ICJ Thukhenzumpi tung ah Rohingya Minamte a maimang theihna dingin khialna kibawl hi ci in a mawhsakna om bangmah in, Myanmar Gam sung ah, abeisa kum tampi sung, Galkap Kumpite leh Gam Makaite in Tualsuak Minamte (Indigenous Peoples/Ethnic Nationalities) a thanem, akiamsuk, a mangthang theizah ciang ding dongin Tualsuak Minamte simmawhna, bawlsiatna, thahna, a khua a tui haltumsakna, numei naupang tung tatsiatna, a ngeina zia leh tongte hepkhiatna, a pau a laite uh pampaihsakna, a minam dinmun leh a hihna uh thusimlohna, a minam thuneihnate khaktansakna cih khialhna lianpite bawl uhhi. Gam Makaite leh Galkap Kumpite in a khang a khang in Tualsuak Minamte tung ah a khialhnate uh, Myanmar Gam sung a Thukhunzumte panin mawhsakna leh thukhenna a kibawl theihna ding lampi omthei peuhmahlo hi.

1. Tua ahih manin, Gambia Gam in apom Rohingya Minamte tung ah a kibawl khialhnate hangin hih khialhnate abawl Thunei Kumpite, ICJ Thukhenzumpi in mawhsakna, thukhenna leh thupiakna a bawlna dingun a ngetna (Application) uh pen, Myanmar Gam sung a om adang Tualsuak Minamte thuakna tawh kituak ahih manin, leitung gam tuamtuam a om tuipi galkai Zomi khempeuh tangin, Leitungbup Zomi Innkuan Kipawlna (Zomi International Communities Organization) in kithukimpih hi.

2. ICJ Thukhenzumpi in Rohingya Minamte tung ah a kibawl khialhnate tawh kisai thukhenna abawl sawmmah bangin, Myanmar Gam sung a Kumpi tuamtuamte in Tualsuak Minamte tung ah minam mangthang zahdong dingin abawl khialnate tawh kisai thu leh late kicing takin ahong sittel sakna dingun Leitungbup Zomi Innkuan Kipawlna in kingen hi.

3. Myanmar Gam sung a Tualsuak Minamte, minam mangthang asuah theihna dingun khialhna abawl Kumpite tung ah mawhsakna, thukhenna aneihna ding, tu a kipan in tuabang khialhnate abawl nawnlohna dingin Leitungbup Zomi Innkuan Kipawlna in ICJ Thukhenzumpi tung ah kingen hi.

4. Zomi-te leh Myanmar Gam sung a om Tualsuak Minampite in a kibelpawl (Federal Union) Myanmar Gam a lamkhawm, a picing Minampite (Founding Members of Ethnic Nationalities /Indigenous Peoples) a hihna a kikipsakna ding, minam kician minam picing hihna tawh Tualsuak Minamte Thuneihna (The Rights of Indigenous Peoples) bukim angah theihna dingun ICJ Thukhenzumpi leh United Nations Kipawlna in thukhenna bawlin, Myanmar Kumpi tung ah thu (Order) ahong piaksakna dingun Leitungbup Zomi Innkuan Kipwlnna in zahtakna takpi tawh kingen hi.

5. Gambia Gam in a thubawlna tawh kisai in, Myanmar State Counselor Daw Aung San Suu Kyi in Minister of Foreign Affairs a hihna tawh ICJ Thukhenzumpi ah Myanmar Gam tangin ading dingin kuan ahih manin, Zomi-te in Myanmar Gam sung a om Tualsuak Minam khat hihna tawh kilawm kisa a, zahtakna kipia hi. Daw Aung San Suu Kyi in, a pa, Myanmar Gam Makaipi Bogyoke Aung San mahbang in, Tualsuak Minamte thuneihna (Rights) zahtak (Respect) in, a thusimna (Recognize) dingin Leitungbup Zomi Innkuan Kipawlna in kingen hi.

6. Daw Aung San Suu Kyi in ICJ Thukhenzumpi ah, Myanmar Gam sung panin thu a kikhen theilo, abeisa hun sung a Galkap Kumpi tuamtuamte in Tualsuak Minamte tung ah a khialhna khempeuhte maantak leh kicing takin pulak in Myanmar Gam (State/County) bek hilo, Tualsuak Minamte (Ethnic Nationalities/Indigenous Peoples) a kipan Gammi (Citizen/People) buppi tangin hong dingzaw a, ICJ Thukhenmangte in thuman takin (Justice) thu akhen theihna dingun thu asunna dingin Leitungbup Zomi Innkuan Kipawlna in kingen hi.

7. State Counselor Daw Aung San Suu Kyi makai in National League for Democracy Kumpi (NLD Government) in, tu a kipan in Myanmar Gam sung ah Thunei Kumpi khatpeuh in Tualsuak Minamte (Ethnic Nationalities /Indigenous Peoples) tung ah minam mangthang asuahna (Ethnic Cleansing) dingin a gamtatna sepna bawlnate, a simmawhna leh bawlsiatnate (Tortures), a khua a tui haltumsakna galdona thahnate (Village Burning, Killing and Military Opertaions), a leitangte suhna (Land Confiscation), numei naupangte tung ah tatsiatnate (Abuse and Harassment), Biakna paulam in bawlsiatnate (Religious Persecution), ngeina lai pau leh hamte amangthang dingin hanciamna leh khenkhapnate (Elimination and disintegration of Culture, Literature, Language), minam dinmun leh hihna thusimlohnate (Unrecognition and Denial of Identity and Value), minam thuneihna (Self Determination) a khaktannate khempeuh thakhat thu in a khawlna dingun thu (Order) apiakna dingun Leitungbup Zomi Innkuan Kipawlna in kingen hi.

Myanmar Gam sung ah thumaanna (Justice) leh kilemna (Peace) om tahen. Executive Council (Zomi International Communities)

Distribution in English Version:

• 1. President, United Nations General Assembly
• 2. President, International Court of Justice
• 3. Secretary General, United Nations
• 4. President, Republic of the Gambia
• 5. President, Republic of the Union of Myanmar
• 6. State Counsellor, Republic of the Union of Myanmar
• 7. Zomi Community Organizations Worldwide
• 8. International Media: VOA, BBC, RFA
• 9. Myanmar Media