Mual ah i suakkhawm liailiai di’ai ve ~ Pau Khat Suan

Mual ah i suakkhawm liailiai di’ai ve ~ Pau Khat Suan

Akno ciauliau kawh hawh ding? Nu’ phu lading Pa’ phu lading, sangak dai tuanpai ding,… na ut leh hong zui ve….. Nazia natong kathei ding a, mual ah i suakkhawm liailiai di’ai ve… Akno ciauliau… neu mahmah napi anu apa a neksak sangak dai tuanpai ding in kithawi ngam hi.

Amah bek kuan samlo in pawl zawn hi. Azot a pawlpihte’ zia le tong theihsawm hi. Zia le tong kitheihtuah ding thupi sak a, tua in gualzawhna tawh mualsuahpih ding ahihlam thei hi.

A zot a lawm a gual, a zui a kithuahpihte zia le tong kibang khat beek omlo hi. A hihtheih uh a tuam ciat ahi hi. Buan uih nangawn ama’ mun ah zang hi. Anu apa’ phu la in gualzawhna tawh mualsuak liailiai takpi uh hi.

Zomite’ ei’ cihbang a cilo peuh, i zia i tong kibatpih lo peuh pawl a deihlo, ong langpan, gal le sa bang a ngaihsutna bangtan vei luai tentan lai ding ihi hiam? Zomite namdangte lak ah namneu hikha mah ni. Mi mal tawm, neih le lam, pil le siamna ah mi ban zokei kha mah ni.

More: Democracy thupha leh Tedim khantohna ~ Rev. Nang Lyan Kap

Ahih hang, khat le khat zia le tong kibang lo, ngaihsutna kibang lo, ut kibang lo, duh le deih kibang lo pipi mah, ngim le tup khat masuan in paikhawm ding hang a, a kibang lo teng mah gawmkhawm in zia le tong kithei a Minam leh Gam ading in gualzawhna mual suakkhawm ding hihang. Na zia na tong ka thei ding a, mual ah i suakkhawm liailiai di’ai ve.. Pau Khat Suan