India zato sung aom MRI kizaihna in pasalkhat hupcip in sisuak

India zato sung aom MRI kizaihna in pasalkhat hupcip in sisuak

India gamsung Mumbai City sung aom zato khatah cina kivelna “Magnetic Resonance Imaging (MRI)” in pasalkhat hupkha in sihlawh cih NDTV pan kiza hi. Tua asipa pen Rajesh Maru kici a, kum 32 aphakhin khata hihi.

Mumbai khuasung aom BYL Nair Charitable Hospital ah Saturday ni in thupiang hi a, asipa pen ameltheih te cina khat zato kilak in apaipih ahihi.

Magnetic Resonance Imaging (MRI) kizaih nading Room sungah akum hamkhin ameltheihkhat apaipih hi a, zato sungah nasemte khatin Oxygen koihna Cylinder bungpi khat hong dopphei in ci’n sawl cihi.

MRI setpi tepen sik hup akhauh mahmah “Powerful Magnet” ahih manin, tua MRI Room sungah alutte ipsung nangawn ah sikthem khatpeuhzong aki puasaklo ahihi. Sikthem puakha hileng tua MRI zaihna setpi in hong humcipthei akici ahihi.

Ward sungah nasem pasalno khatin Oxygen Cylinder hong tawipheisak in ci’n asawl ciangin Rajesh Maru inzong MRI Room sungah sik ki puatheilo hilomaw ci’n dawngkik hi. Ahi zongin Ward nasempa in bangmah cikei e, nisim in kasepdet hi. MRI aset zong aki khakcip laitak hi ci’n Oxygen Cylinder puaphei dingin sawlveve hi.

Tuaciangin Rajesh Maru inzong Oxygen Cylinder bungkhat apuakphei leh MRI setpi in thakhatthu in na hupcipmawk hi. MRI setpi pen Ward nasempa in akikhak hi acih hangin akikhak nahilo a, aset aki hongsa in na om sawnsawn hi. Tualaitak in agei ah aomkha Doctor leh Technician te’nzong bangmah genvetlo uh cihi.

Rajesh Maru pen Oxygen Cylinder bungpi khattawh alutphei phetin MRI setpi in khauhtak in na hupcip in, akhut te bangmah tangtheilo in, awkcip hi. Apumpi pen bawkgawp in, akam panin bangmahzong paukhiathei nawnlo hi.

Tuaciangin nasem te’n MRI setpi panin Rajesh Maru pen kaikhia uh a, ahi zongin apumpi tungpanin si luangkhia ziahziah hi. Amanlang in Emergency Ward ah taipihphei uh himahleh Minute 10 khitciangin sisuak ziau hi.

Video: MRI sik hup alauhuaizia lahna Video

Hihvai hangin liausum kiciantak in apiak nading uhleh hihvai tawh kisai in mawhpuak anei te nasiatak in thu akibawl nadingin BJP lawmaker Mangal Prabhat Lodha in genkhia cihi.

Police te’nzong tualaitak ah aom Doctor Siddhant Shah thu bawlpah uh a, tuaban ah tuasungah nasem, asawlpa Ward Boy Vitthal Chavan leh Ward Attendant Sunita Surve tezong kimanpah uhhi. Rajesh Maru sihnavai hangin mawhpuak anei phadiak tua mi 3 tepen palik te’n mansuakpah uhhi ci’n NDTV te’n genkhia uhhi.

More: India pasal khatin gilzang sungpan in siktukilh 639 ki lakkhiat sakthei

Hih zato ah thuneipi ahi Hospital’s Dean Dr Ramesh Bharmal inzong hihvai tawh kisai in hoihtak kancianna kineiding hi ci’n genkhia hi. Tuaban ah Hospital Authorities te’n CCTV Footage khempeuh Police te tungah appah uh a, Police te’nzong hoihtak in kancianna neiding uh cih kiza hi. (Theihding: MRI Room sungah lutding peuhmah in sikthem puakkhak hetloding ahihi) Sawltak #zomidaily