MP te nasep leh mipi te tangsap na ~ CS Dal

MP te nasep leh mipi te tangsap na ~ CS Dal

Zomi te ki tangsap na te kua te in hong sepsak thei ding? District vai te, CNF vai te, leh thu dang tuamtuam te ah kua sep ding hi pen hiam? Biakna sia te maw? Zomi sung ah i neih political party ZCD te maw? A hih kei leh Zomi ki pawlna tuamtuam te maw? Hih i gen teng in, a mau mun leh hih na tawh sep theih tampi tak nei kha mah ding hi, a hi zong in, a sem thei taktak pen leh a sem ding in panmun kipia taktak pen Zomi te in 2010 kum in i tel tangmi (Members of Parliament) te hi penpen hi.

Parliamentary Democracy ki-uk na khat peuh ah, khua nu khua pa te in, a mau om na mun leh mual tawh kizui in a mau tang in, parliament ah kamkum ding, thugen ding, thu sung ding, nasem ding in, tangmi (Member of Parliament) khat ciat tel khia uhhi. A beisa kum 2010 Kawlgam bup ki teelpi lai in zong Zogam ah khuanu khuapa te in a mau deih khat ciat tel khin tek uhhi.

Tua a hih leh, hih mipi te telsa MP te in bangteng sepding bawlding vaipuak nei uhhiam? Gambup parliament kisap ciang in, MP te in thu ki kupna te, Laws leh policy (thukhun le thumung) bawlna te, a mau omna mun leh mual, khuanu khuapa te tawh kituak thu le la te pulakna cih te sepsa ding hi pha diak hi.

MP te in parliament kikupna ah a tut loh uh ciangin, a mau omna ciat ah zum ah hun zang pen uhhi. Hih zum a tut hun sung in, khuanu khuapa te in ki tangsap na te pai in deih bangin va gen thei uhhi. Tui, mei, lampi, khuasung thu tuamtuam te lung hi mawh na te va pulak khia thei uhhi. Tua ban ah khuasung ah sepding, bawl ding ki lawm te zong etsak ding, kanding zong vaipuak nei hi. Tua ban ah khuasung a om, sanginn, zato, zum leh kipawl na tuamtuam te tawh ki mu khawm in a kitang sap na te uh, na dong zel ding cih na hi.

Mipi te tung pan tangsap na, khuasung, gamsung a ding tangsap na te pen, parliament ah mipi te tang in thu va gen sak ding cih na hi a, mipi te ki tangsap na te, a ngah sak zawh nang a hanciam ding a ma mawh puak a hihi. A zenzen hong ngah sak zawh kei leh, teelpi (election) a om kik ciang mipi te in muang nawn lo ding uh a, tel kik lo thei pah ding hi.

Khuasung gamsung khantoh nang, phattuam na ding in MP hoih kisam mahmah hi. Tua a hih leh MP hoih hih theih na ding bang teng kisam hiam?

Mipi te a ding sepsak ding cih mah bang in, mipi te ki tangsap na te ah, thumna, tauna, tangko na te ah thu ngai siam, thu kan siam hih ding kisam pen hi. Mipi te tung vaina lianpi leh itna lianpi tawh sepsak thupi hi. Mipi te in muanna tawh a telsa a hih mah bang in mipi te in deihloh na tawh vote-ki-pia lo thei uhhi.

Mipil misiam khat ahih ding zong kisam maham hi. Bang hang hiam cih leh, thu muh na leh thu ngaihsut na te a tangzai zaw in hong nei thei zaw ding a, khuasung gamsung phattuam na ding a tam zaw in sem thei ding hi. Parliament ah thusun na te ah zong pilcim tak in gen thei zaw ding a, lawm leh gual MP dang te in zong thusun na te, ngaisiam in, thukim pih baih zaw ding hi. Tei tang in thu gen siam zaw, thu ki nial siam zaw a hih man in, bang hun in bang thu gen ding cih zong thei zaw ding a, a gen khat peuh zong ngah baih zaw deuh ding hi.

Tua bang ah a thupi pen in, angsung thei bek hi lo in, mipi a deihsak MP hih ding kisam hi. Sum leh pai, mimal phattuam nasang in, ki niamkhiat na leh itna a nei MP hih ding kisam hi. Khua nu khua pa te ki tangsap na te ah tha sit lo in a sepsak zo, MP, thu gen siam, mi tei, thu mu hih ding zong kisam sem hi.

Mai hong tung ding 2015 teelpi ah mipi te in MP ding tel khial kei ni. Phattuam na a om mah bang in, supna zong tampi thuak khin leng ki lawm hi. Mipi te (vote) tung ki nga hi, cih phawk ciat ni. CS Dal