MP te bangci teelding ~ Khup Khen Thang

MP te bangci teelding ~ Khup Khen Thang

Kitelna hong nai mahmah in MP bang ci tel ding, cih mipi kilung hi mawh mahmah tek hi. Tua a hih leh MP te nasep koi ci dan hiam cih tawm khat I en ding hi. MP suah theihna anuam pen dingin Party kiphuan hi a, tua party bulphuh na in MP suahna ding mee zonna ding platform khat a hihi. Party atam mah mah hangin tua party tungtawn in MP asuak te pen Hlutdaw ah thusung thei hi a, Party akibat loh hangin MP khat ahih nak leh Hlutdaw sungah thusun theihna, kibang vive ahihi.

MP te Nget or Mipi Nget

MP te bek in na ngen thei…siau thei bek….amau nget pihna kihel lo in bang mah kipia lo ding cih thukhun om lo hi…. MP te pen Mipi taangmi ahih man un, amausep ding, a mau a nget ding atavuan uh a hihi. MP te’n nasem le uh mipi te kipei kul lo ding hi. MP te in ngenlo a hih man a, mipi lam pan ki ngen hi kha ngel ding hi. A taktak in MP khat in Hlutdaw ah ama Taangmi hihna te adingin thusung leh ngen den in abuai den ding anasep ahihi

MP te Nasep atam dan

Gentehna: Tedim Myonee pan State Hlutdaw No.1 MP khat tawh genteh in en dih ni. Hih mun aa MP in ama ii Nee sung ah Ohsuh or khua 50 val om a, tua khua te Hausa teng tawh kithuah ding kul hi. Khua khempeuh ii kisapna nget pih ding, asiauh na lai a at pih ding ahihi. Bek tham lo in Tha-nah (department) tuamtuam pan ulian te thukim pihna letmat (signed)lak pih ding in tungsiah phut pih ding ahihi.

Hih MP khat ii mee (vote) ngahna sung a om khua teng ii kisapna teng Pyinee (state) hlutdaw dong, atunpih na tungtawn in amai kum 1 kum nih budget ki geel a hihi. Tua a hih manin Tedim Myonee ii budget a tawmna hang pen MP te leh Vuangyi te kisapna a hihi. Anuai pan kisiau, kingen tawm lua ahih man a hihi.

Khua 50 val tawh bang ci kimuh theih ding?

Tua a hih leh MP khat in ama tangmi suahna khua tampi muntampi pha mawk a, amah Hlutdaw kah nuam lai ding, hiteng ii kisapna te siauhna/ngetna lai bang cih at pih zawh mawk ding? Bang cih kimuh pih man ding cih dotna hong om hi. Hih mun ah ngat-tak agelna (strategic planning/management) hong kisam mahmah ta ahi. Khasim in ama huam sung a om, Hausa teng tawh munkhat ah kimuh khop theihna ding zum or a neihkul hi.

Tua sung ah ama aitang dingin ngetna siauhna lai atpih ding, lai at siam or kusale atawm pen mi 2 peuh mah a neih kul hi. Tua ban ah, Tha-nah (department) tuamtuam ah signed thuh pih kawikawi ding kusale aneih kul lai hi. Hih bang pen MP atam zaw in nei nailo a hih manun bang mah sep zawh piak zawh neilo uh ahih manun Mee azon kik uh teh maimial in mee kipia nuam nawn lo hi.

Ataktak hi leh mipi te aheh mahmah ding uh hi lai hi. Mi pen khatvei kikhemna pen khem athuak te khialhna hinailo a, nih vei khem athuak leh khem athuak te haina hi ta hi. MP khat ii tangmi sepna nee sungah pen atawm pen khua 50 peuh mah om ahih manin hih mun ah a tung aa igen ngat-tak a gelna (strategic planning/Managemetn) kisam mahmah hi.

Tua a hih manin hizah a, tavuan lian, sep ding atam lam theilo a, Hlutdaw sungah ih mumu, thu sung ngeilo, ngetna anei ngeilo MP te pen bang hang in MP ut lai mawk uh ai tam? ama mipi te khual buang lo uh ahi tam cih amau leh amau a hi a, mipi in ahizong in kidot huai thu ahihi. Hih teng thei le hang, i MP teel dan ding, i tel dinga, kua hoih in kua in semzo ding cih mipi in khensiam thei ding hihang.

Nasep tam a hih manin kum tam khinsa MP te adingin haksa mahmah ding hi. Mipi aitang (tangmi) ahih manun mipi tawh kizopna social Media, facebook, zoom cih te akipan azat siam lo MP te in pen nasep azawh na ding haksa mahmah hi. Zomi te’n khem thuak lo a, khantohna ingahna ding lunggulhna tawh hong at ka hihi. Sia Khup Khen Thang