Mizogam Dongtuakvai tawh khualzinna pan Report

Mizogam Dongtuakvai tawh khualzinna pan Report

Zomi Donghu Kipawlna min tawh Mizogam Dongtuak Laizom Zosuante huhna ding sum ih kaihkhop pen August, 8,2017 in YMA,Sub-head Kuata Champhai ah Zomi Cultural Sociaty tawh kipawl in aki ap khitteh ZCS Champhai tawh Minam Kalsuan nang maban honkhat ka kikup theih ban vuah, Aizawl ah zong ZCS makai Pawlkhat tawh zong na holim thei ungh.

YMA Te Etteh Huai

Young Mizo Association(YMA) pen June 15, 1935 kum pek in ana kiphut khin hi a, tuni tan dong dingsuakto uh hi. Kum 14 pan atungsiah khempeuh YMA member in sang uh a, mipiten zong YMA hih nuamsa ci hi. Tulaitak YMA makaite pen kum 50 gualgual tam peuhmah uh hi. Vision, Mission, Objectives leh Policy hoihtak nei uh hi. Kipawlna tuamtuam ahi, Mizo Zirlai Pawl, Numei Kipawlna, Uppa Kipawlnate amau nuai ah koih in khut kilen uh hi.

Kipawlna tampi om zezua lo uh hi. Office mun tampi ah koih uh a, Office a nasemte Mizogam Kumpi in khasum pia uh hi. YMA te tangh lenglo a, kizom diamdiam uh hi. Central YMA ihcih pen Aizawl ah om a, tualai pan mun tuamtuam a,YMA te control in nasem khawm uh hi. Hihbang in ki thutuak in na asep khop uh ciang, YMA te nasep limlim Mizogam in niallo uh hi. Natlehsat vai bek hilo, Agam khantohnang, Siangthonang leh daihna, muanna a om nang zong nasem uh hi.etc

Mizogam aa Teng Zomite Dinmun

Mizogam tung Zomite pen pawlkhat Sukte, Pawlkhat Paite in Mizogam Kumpi in ciamteh hi. Asawtnailo Hunpaisa in Zopau paungamlo leh Zomi hing cih a genkhia ngamlo Sal lungsim nei honkhat om uh hi ci-in ZCS makai khat in hong gen hi. Ahihhang in, Aizawl ah Zomi Innkuan a dinzawh kum 10 cing ta hi.Zomi Cultural Sociaty pen Mizogam Kumpi phalna ngah kipawlna ahihi. Zongeina kepcing ding leh Zomi vai limtak sem ding in pan alak mahmah laitak uh ahihi. ZCS pen Aizawl, Champhai leh Hnahlan etc ah om kawikawi hi.

Mizogam a Teng, Zomite Maban

Zomiten Mizogam ah maban Limci na nei uh hi. ZCS in Mizogam Kumpi kiang ah Zomi in kiciapteh nang, anget laitak uh hi a, Zomi in ciaptehna ngah khin uh leh kal khat khit kal khat manawt toto ding uh hi. ZCS makaite mipil vive hi in, Pasian in thupha hong piak sak tozen ding a, muanhuai mahmah uh hi. Mizogam Election ah Third Person in Zomi ading thei gige cih thu Pu T Thang ZCS -Champhai President in hong gen hi.

Mizogam Election ah MNF leh Congress kikal ah Zomi ki om hi, a diakdiak in Champhai District agenna ahihi. Zomite longkhat in ging khawm hileng, Champhai District ah Zomite panpanna in zo ding hi. Zomi ading Political Demand kinei thei ding hi, Champhai khuasung bek ah zong Zomi Inn 700 val ki om hi, mun tampi ah zong ki om kawikawi hi, Candidate ding bang a qualify omleng MLA mun nih bang kingen thei ding dinmun ahihi, ih pum khat ding a thupi penpen hi cih thu President ZCS in hong gen hi.

Zomi Innpi

Champhai ZCS ten a etteh huai maban limci, lianpi nei uh hi. Tulaitak in Zomi Innpi lamna ding amun pi 480 kimkot bang amau sum tawh, Tonsim khua ah na lei khin uh hi. A Innmun omna pen Tonsim leh Zote kikal cileng mitam zaw in mitkha ah muthei ding hi. Tua mun pen tuzawh kum10 khitteh Tonsim khua laizang suak thei ding hi. Ahang innah Tonsim pen akiang a khua nonote tawh kizom dekdek ta hi.ZCS makaiten a mun hong etpihteh thangah huai kasa mahmah hi.

Tonsim khua laizang ah Zomi Innpi ding gemgam ding cih ka mitkha in amuhteh katha ana lawp mahmah hi. ZCS Champhai in Zomi Innpi bek hilo in, tua mun ah Zomi College nadong neihzawh nang ngimna lianpi nei hi. Mizogam ah Hmar Innpi cihbang a tuamtuam neitek uh a, Zomiten anei nailo hizaw hi hangh. Ngimna lianpi nei ZCS Champhai in Leitung bup Zomite leh Pasian muang a kalsuan uh ahihi. Zomi Innpi ah Zomi vai kihawm zawh nang, Inn kisam tuamtuam lamzawh nang huhna hong kawikawi ding uh hi.

Mizogam bek thamloh Leitung ah Zomite ihtenna peuhpeuh ah Zomi Innpi neihzawh ding thupi mahmah hi. A etteh huai Champhai ZCS te ngimna ah kigawm in pangkhop ciat ding thupi mahmah hi. Migam ah Innpi va lam cih pen tulaitak USA te nasepdan tawh kibang in hoih mahmah hi.

Mizogam aa Teng Zomiten, ZCD leh ZYA Hong Lamen Mahmah Uh

Mizogam aa teng Zomiten ZCD leh ZYA hong muang mahmah uh hi. ZCD in 2015 Kibelbawl gam ah Zomi min tawh Parliament kah ahihman in kibelpawl gam ah Zomi ciapteh nang hong vaihawm zo ding in lametna lianpi nei uh hi. 914 Zomi vai bang hong lim dot mahmah uh hi. Tuaban ah ZYA pen amau omna lam aa YMA dan in akalsuan zawh nang lametna lianpi nei uh hi. ZYA pen Khua 100 val ah om khin cihthu a theih uh ciang in lungdam in kipak mahmah uh hi.

Zomite ih omna ciat pan in ih Gam ih Minam ading lunghimawh in panla tek ih hihman in Zogam hong paallun hak nawnlo ding hi. Takkheh Zomi!

Lungdam
Cin Lian Khai (Zogamkhaino)