Mungno,
SDA sangmang Anderson in ong nusiatna nong zak sak ka sim kha aa nakpi-in ka lungsim ong lawng hi. Kei pumpi-in amah mu kha, athu hilh ngai kha ngei, Leilum ah gospel a pai ciangin zui-in va ngai ngei ka hih manin ka it mahmah sangmang khat ahi hi. A omna uh inn ah akituah uh ciangin, nihvei thumve bang kong khak leh a tal taih kha zeel hi.
1954 pawlin Lawibual a inn,( tuu aa AG Pastor Cin Khan Thangte inn mun kiim) uah ka pai zeel uh hi.
Ka neulai thu mangmawh khat; Pr Anderson pen, a mel mahmah zong mangkang ka muh lak ah pasal ahoihpen pawl hi. Pi 6.4 sang aa gawng lo thau lo tha tawh kidim hi.Sani -ni kikhop ding ciangin suit a silh ceecaa ciangin ki lawm mahmah hi. Na a sep ciangin faded blue jean leh T shirt tawh etlawm mahmah zeel hi. Sang mahmah, a duang kilam dan zong hoih in, ‘pong’ kasa mahmah uh hi. Ka lawmte pawl khat bang amah bangin ‘ mang alut nuam’ om liang hi.A aw zong uun mahmah duadua aa ama pumpi tawh kilawm mahmah sese hi. Kikhopna ah la asak ciangin ‘octave’ khat a uun zaw-in ‘apaisuak’ mah sa hi. Kei tua lai-in Tan 6-7 pawl ka hih ciangin mang pau siam nuam in ka zui zeel hi. Thu a gen ciangin akhut zaakin, akhut vei kawm ahih ciangin, khatvei a kamphenpa viikpaai dektak hi. A zi-in ngauo et thei zeel hi.Evengelist-te bangin thu gen zuaizuai aa, thu gen zong siam mahmah hi.
A tha zong ahat mahmah khat hi aa, khat vei Haka Sangmang Johnson tawh a inn tual uah ki ho in agei ah ka ngai uh hi. A jeep thu gen uh aa, tua kawmin amai-ataklam panin ong dom in apei lei pan kikhaang khia ahihmanin ong ki pei velvel ka mu hi. Hat salua ka hih manun thupi ka sa mahmah uh hi..
Leilum ah nitak khat, Pa Hang Za Ginte inn sak phuung tung, mawngpi nuai ah crusade khat bawl in ken zong ka va zui hi. A tapate nih tawh ki thuah thei ka hih manun ciah ding ciangin, David leh Gracy tawh a jeep tung ah ka na tuang khol uh aa, David in a gear ong khoih leh Jeep damdamin akhang phuung lam ong ki hual suk hi. Sangmangpa, Anderson in ong gal muh ciangin ” Stop it Stop itttt” ci-in a aw ngaih tabuangin, awng beba kawmin ong delh phei-in, akhut tawk jeep a nang keekaa hi. ” Get out Get out” ci-in ong awng leuleu aa, lau-in ka lengkhia uh hi. Amah guakin nangin khawl sak hi. A tung ah meiset, generatot a lian sim khat om lai hi. Tua hi kei leh akhang aa phung sangpi ah a kia suk ding ka hi uh aa, hih lai zong kong at kei kha ding hi. Ka nuntakna ong hon khia ka ci thei hi.
Khat vei leuleu, a generator set amah guakin, san teetaa-in domin mundang khat ah koih hi. A zaang ding ka sak leh a nitak ciangin, tua set mi li-in khuisa depin a khin khia leuleu uh ka mu hi.
Tu aa ” SDA Sangmang inn” alam lai-in taakluang lianpipite, a lettamah-te in teipi tawh kal in tawmtawmin khuk uh amuh ciangin, ” No, No” ci-in a lupei in, aman a khe tawh, kawng dom kawmin hual ziauziau hi. A kawm zawlpite a khun uh ciangin, a nasemte nih leh thumin zawng lunglung uh aa, amah a kawm tung pan a keh kha sukin a zawl laizang panin kileek kimin koihsak aa, a khe tawh khai to-in la hi. A om lai tam thei keng, tua sangmang inn amah ngiatin alam ahi hi. A tha hatna thu ka dot ciangin ” Nidangin lumberjack, singkung lianpipi a phuuk, atan, anaawn nasep sem ngei hi” ong kici hi.
A inn gei uah mual dawn hi napi, tui khuk khat amahmahin to vava in mualdawn ah tui om ding maw ci-in lamdang sa in,” Is there water here?” ka cih leh tui a om na a test na ong lak hi. Pat tawm khat kuang neu khat in sin sukin zan thapai koih aa,’ zingsang ciangin akuang sung aa pat nel ningniang in a om leh , tua mun leisung ah tui om hi’ ci hi., Leinuai tui om na zondan khat ka thei pah hi.
David tawh, a sakol uh ka cing khawm ngei uh hi. Khat vei amau inn khanglam mual pang ah sang tutphah saute, leh koihin, takteh tung ah tolhpeng ka tuang zeel uh hi. Ni khat ka kibung uh aa tua aa kipan a pate’n ong phal nawn lo uh hi.
Bilpi kang khawi uh aa, ka muh masakna uh ahih ciangin, a nisim phialin ka va enen uh hi. David leh Gracyte’n asawt lo-in ong ciahsan uh hi. 1996 kumin California Pasadena ah Sia Ngin Hangte kiang ka hawh sung khatvei Sangmangpate kiang hawh dingin ka hanciam hangin bangteng hiam khat tawh ka hawh thei kei aa, hun ngah leng ka mu kik nuam mahmah hi. A hih hangin tun ong sihsan khin ahih manin, amah hih leitung ah a mu nawn lo ding ka hi hi. A zi ( anuntak lai leh), David leh Gracy-te tawh ki muh kik ding ka lunggulh giuaguau lai hi. Davit-te tawh , ong thei lai tam maw, na kimuh uh leh na hopih sak in. A pa un ong nusiatna hangin kei zong amau bangin ka dah hi” na cih sak in. A mau email na theih leh zong ong khak ve maw !. A mau sawt ong om man lo uh ahih ciangin lawm kip, lawm khotak-in ka kinei man kei uh hi. A hih hangin English language lam ah inspiration ka ngahna hi cih ka tel hi. Ka phawk den ding hi.
Sangmangpa pen ei khamtung gam ah SDA upna ong puak masape hi ding hi. Ka va kikhop zeel hangin, SDA suak lo ka hih manin, biakna lam tawh kisai asepna ka tam theih kei hi. A hih hangin a it-huai mahmah Sangmang innkuan khat ahihna ka phawk tawntung hi.
Topa Thupha
Dongno
Sangmaang Pr. A. E. Anderson phawkna kammalte hang aa lungdamkohna
Kong it Zomi u leh naau, nu leh pa, pi leh pu, a kua matek:
Zogam ah Pasian thu manpha taangko ding aa a nuntakna kham aa a hong pai Pr. Anderson in a hong sihsan ciang iin dahpihna leh phawkna tuamtuam te a hong gelh a kua matek tung ah lungdam hong ko ingh. Tu zawh kaal nih khawng ciang iin Anderson memorial service siim ding iin vapai ding kahihmanin Zogam leh Zomi te in Christian missionary khempeuh ih it ih ngaih ih phawk zia lai ah nong gelh te uh, sangmaang nu Lois leh a tate, a tute teng kiang ah na gen hamtang ding hi’ng.
A diakdiak iin U Kimsan, U Lam Thang, Sia Khampeek, Nu Betty Manghuai, U Hang Khan Lian, leh Sia Kenneth akipan dahna, lunglenna leh lungdamna lai a gelh a kua mapeuh in no ii phuutkhak ngiat thu thak te leh ih Zomi bup ii phattuamna bulphuh aa sangmaangpa Anderson leh sangmaang dang khempeuh te ii thupiitna nong pholh khiat uh ciang iin kei aa kipan mi tampi in a phattuam lawh ding iin lam en ka hihmanin lungdamna hong pulaak ingh.
Zolai tawh hi bang aa English alphabet ABC zangh iin Zomi khempeuh ih ki thuzak theih na ngiat zongh Zogam aa hong pai ih sangmang te hang mah hi pah aa Pasian thu leh thu dangdang tampi te khempeuh ah Zomi te tu aa ih dinmun ciang ih tun nading aa a hong pantah peen Roman Catholic sangmaang te leh Prostestant sangmaang khempeuh te hang ahihmanin Zomi bup in ih sangmaang te tung ah a lungdam huai mahmah ahi hi. Christian kician tak, Pasian thumaan a um takpi, pianthakna a nei takpi te in ih sangmaang te tung leh Pasian tung ah lungdam loh theih loh ahi hi. Christian sangmaang te hong pai kei henla, Buddhist sangmaang khawng in hong pantah masa hi kha zenzen leh tu ni dong iin Kawllaai peuh zangh iin “aw gaa taa, a haan paan dhi ——-,” cih peuh, “taa duh, taa duh,” cih peuh, “a hmiah, a hmiah” peuh ci aa awng daadaa iin zamm peuh a tum lel te leh lam nawl peuh ah a kizui luailuai lel te hi laai zen ding hi hangh.
Tua hi iin Zogam aa hong pai ih sangmaang te hong puak Pasian thu manpha te mimal ciat in hamphatna iin nei takpi iin nuntak pih ciat iin ih omna munmun ah Pasian lim leh meel a kilanghsak te hong suak sak ciat ta hen. Pr. Anderson hong nusiat huhau aa thu thak leh khanlawhna thak hong pia thei ding aa ciimtak aa lai gelh mimal ciat tung ah lungdamna hong pulaak ingh.
A kua matek na omna ciat uh ah lungdamna leh cidamna ih Topa’n hong guan ciat ta hen.
Itna leh zahtakna tawh,
Mungno Gualnam
Riverside, California
Phone (Cell) 951-403-8319
Phone (Office) 951-509-2370
Missionary Pr. A. E. Anderson ii husanh nunung
Missionary Pr. A. E. Anderson ii husanh nunungKong it Zomi a kua maciat,
Zaan iin Pr. Anderson in leitung nunna nusia ta iin Pasian gam a hong tun ni ding bek ngak iin om ta ahih thu, 11.00 p.m., Monday, November 2, 2015, iin a nuntakna hu nunung peen sang khia ahih thu hong pulaak zo hi.
Zomi khangno khanghaam tampi tak leh a tam zaw te in thei kha lo ding nahihmanun Pr. Anderson meel a mu kha ngei lo te ading iin deihsakna tawh May 28, 2011 aa amah tawh ka kilaak khopna uh milim hong belh iin tu kum June 13, 2015, aa amau innkuan tawh ka kimuh khop nunung peen uh video tomno khat leh 2011 kum aa Zomi Innkuante tawh a kimuh khopna video te hong khak ingh.
Ih it mahmah sangmaang pa in a hong nusiat man iin Zomi a kua mapeuh ading Pasian tawh kinai zawkna hong piiang ta hen.
Thupuak,
Mungno Gualnam
Riverside, California
Phone (Cell) 951-403-8319
Phone (Office) 951-509-2370
Comment piaknop aomleh...