Mission Accomplished! ~ Pu Thangboi

Mission Accomplished! ~ Pu Thangboi

Pasian’ hong ompihna lamdang hi. April ni 10 – 30 kikal Pasian’ Min tawh khuazinnate ;

1. April 13 – 16 sung Mindat a Blessing Pawlpi (Sia Tam Kee te’ pawlpi) ah khangno 160 te Pasian’ thu hilh. Khangno tampi in Zeisu honpa leh gumpa in asan ban ah hunbit Pasian’ nasem ding in tampi ki ap uh.

2. April 19 – 26 sung Tedim gam ah MP te tawh zin khawm. 22 ni zan in Tuipi khuazang’ mai ah Pasian’ thu laigil tangko thei.

3. April 27 – 30 sung Kawlpi ah Pasian’ Min mah tawh cina gim khat thu ngetsak thei. Silo ding hi. Zu sila a om khat Pasian’ thu genpih in thu ngetsak. Suakta peelmawh ding hi. 29 ni Galilee ah sun leh nitak Pasian’ thu laigil genna nei thei.

Lungdam kohna.

1. Zomi MP te leh khuamite’ tung ah lungdam ing. Nong zindonate uh mangngilh zawh ding hi kei.

2. Galilee AG a Siate, Upate leh pawlpi mite’ tung ah lungdam mahmah ing.

3. An hong nekpih, amawtaw te uh tawh hong vakpih a lovegift hong pia lailai ahi Pu Vum Za Nang leh Dr. Cin Hen Thang te’ tung ah lungdam mahmah ing.

4. Kawlpi ka om sung tawntung deihbang a zatding a a saikel hong zangsak ngiat Sia Vum Khan Khual te’ innkuan tung ah lungdam mahmah ing.

5. A Zo-akluipi khat hong matgiap ahi Pu Cin Sian Thang’ monu Nu Mawi M Lian Thluai’ tung ah lungdam mahmah ing.

6. Mindat a Blessing AG pawlpi siate, upate leh pawlpi mite’ tung ah lungdam mahmah ing.

Thu hong ngetsak, ka phone bill hong thunsak, lovegift hong pia te khempeuh’ tung ah Pasian in a Van Daitui hong taksak ngiat ta hen.

Zangkong lam zuan in na ciahta ing.

Note’ itna sung ah

(Mung Laan Thang)
Tawivei, Bus Tungah