Misiangtho laktoh muhkholhna

Misiangtho laktoh muhkholhna

Pu J.W a kici Khristian innkuan papi khat in maangmu-in, a mang sungah a muh teng hibangin a gelh hi.

[Khuakhal hun lai, nitak khat ka innkuan kikhopna ah, Thesalonika masa 4 sung ka sim hi. Ka kikhop man ciangun ka Lai Siangtho simna ka ngaihsun phapha hi. “Topa hong thupiakkholhna mahbangin…nungta-in a om lai eite in…vankim lai-ah tua mite tawh Topa dawn dingin meeitungah puakna i ngah mah bangin…” cih thu ka ngaihsunsun hi.

Tua thu ngaihsun kawmkawmin ka tutphah zaal tungah tu-in ka ihmu kha zenzen hi. Tua sungin a lamdang mahmah mang khat ka man hi. Ka mang pen ka tak sangin ka lungsim navak zaw in siang zaw lai mawk hi.

Ka mangin zing ka tho a, ka khuadakleh ka lawmnu pen ka kiangah na omlo mawk hi. Sepnop khat nei a, lol hi’n cin, a thobaih hi’nteh kaci hi. Innsungah a husa ka zak theihloh ciangin kei zong lung hithei lo-in ka sam hi. Ka sap hangin hong kidawng hetlo mawk hi. A nik, a puante lah a lup dinga a koih bangin na om linlian tek hi.

Inn pua lamah bang khat peuh sem-a pai hi’nteh kaci hi. Ahizongin ka upmawhna sangin hong sawt lua-ta ahihmanin, ka nungaknu in a nu’ paina thei inteh ci-in, a lupna dei sungah pai dingin a kong ka kiuhkiuhleh hong huthe-suah lo ahihmanin, a kong honga ka lutleh, amah zong na om lo mawk hi.

“A nuta un koi-ah pai hiding ahia, ka tangvalpa in thei inteh” ci-in ka tapa lupna ah ka pai leuleu hi. Nidanga a thawhhakna tawh teh-in zingtungin kizemsa-in na om a, “Tu zan ihmu thei vetkeng pa aw, kei thobaih vet ka hi” hong ci hi. “Ahihleh na nu leh na nau om hetkei mawk veh ee, koi-ah om hiding a hiam?

Innkiim khawng ka dapzon kawikawi hangin lah mu het keng, i huan khawng va en sin aw” ka ci hi. Innpua lamah a pai sungin keizong ka kithawi saisai a, a sawt lo-in lametbei meel tawh ka tapa hong tung kik-in, “Pa aw, muhet keng, i kongbiang lah zani-a i kalh bangin kikalh linlian lai” hong ci hi. Cih nading mel thei lo-in ka pata un ka ki en mawk uh hi.

Ka nungaknu lupna ka va et kik pongmawkleh a sabuai tungah Lai Siangtho lemsa in na om a, kei hong cihna tawh kibang phialin, “Tua ahih ciangin note in zong kiging kholin om den un; na upnawh loh laitakun mihing Tapa hong pai ding hi,” Mt 24:44 cih mun, a nuai kigiit ka mu zenzen hi.

Nidangin ka lawmnu in hih Lai Siangtho mun pen, “Topa Jesu hong pai nading a genna hi” ci-in hong hilhna mun ahi citciat hi. Ke’n-lah i sih ding hun theikhol lo i hih cianga, Topa Jesu zong hong pai pah sam dia’ ka cih san hi. Tua bang ka cih ciangin ka lawmnu in za nuam het lo-in hong nial teitei hi.

Tua tak ciangin tanaute’ inn khawngah zingvak pak khawng hi’nteh ci-in ka tangvalpa tawh zing an ding mel zong ngaihsun lo-in, tanaute’ inn khawng kan dingin, ka vah nading uh hawmin, ka paikhia tuak uh a, ke’n ka lawmnu’ nungsangte’ inn va kan ning ci-in ka sunghte’ inn-ah ka pai hi. Ka sunghte nupa zong Tapidaw tuak hi uh a, ahizongin amau pen leitung nate vai-ah a lung himawh te ahi uh hi.

A kongkhak uh ka kiuhkiuh-leh a sawtna ciangin ka sungh-nu, anbuk lam pan hong pusuak hi. “Tu zing kinok mahmah ung e, ka nasemnu uh lah anhuan’ ding don lo-in koi tengah na zingvak mawk hiam? A melvom tawh, liakluak sim, keimah in ka an ka huan na tawh kinok mahmah ing. Ka nasemnu zong Tapidaw kician gel khat-a ka muh hiven, a thu, a la om lopi-in vak mang ngiau! Ka kongkhakte uhlah zanitak a, kakalh bangbangun ki sungkalh lai zel! A bangci mawk hiding hiam?” ci-in hang kawmkawmin hong hopih samsam hi.

“Lamdang mah se mataw, kozong ka nungaknu leh a nu mang keeimawk a, hong zingzon hi veng” kaci hi. Ka sunghpa zong a sanggamnu a man lam a zak ciangin lung himawh mahmah a, keizong thudang peuh gennelhin, “Zing-an zong huan nai kei ung; hilai-ah ke’n an hong ne ning” kaci hi. Tua-teh ka sunghpa in, “Zingsanga na lol den ding uh a deihna-a innkuanpih te’n hong ciamnuihna hi’n teh, na innsung munkhat peuhah hong buksan hi’n teh,” ci-in hong ciamnuih san pong mawk hi.

Ka sunghnu in, “Zing niangtui hawp phot dihni, khawllai in; bawngnawi hong puak dingte in zong bang ngak thapai laizang uh hiam? Nidangin zingtungtungin a hun hong maan den mah hiven, tu zingin hong kai laizang mah uh” a ci hi.

Tua laitakin ka tangvalpa patauhmeel pua in hong naak saisai a, a nute a hahzonna dan leh midangte zong a innkuanpihte na mangtek a, a buai dan uh, hong gen saisai hi. “Kongzing citengah mihonpite kituak zuahzuah uh a, a kap, a thuum-lah ciak ngeingai keei” hong ci hi.

Tua bangin hitakpi mawk a, a innkuanpihte a mang zongin a lawm dangte’ inn khawngah kikan ngeingai uh a, zing-an huan ding zong ngaihsun lo-in a kibuai ciat ahi hi. Lamdang kasak diakdiak-ah, papi khat a tate, kum 5/6 mi ding khawng, a taneu pente nangawn uh manga, a pi tawh a lumkhawm kum 4 mi khat zong om lo-in a mang thei mawk hi.

Hih bang thu hong pian tak ciangin, mikhat in zan lam-a a lawmpa tawh Pasian thu a kikupnate ka phawk kik a, tua thu hong gen’na in hong patau sak phasan mahmah hi. “Tu hun lai Pawlpi mi tampite in a minpi tawh Tapidaw hilel uh a, Pasian itna sangin leitung nopsakna a it zawte hita uh hi. Tulai Tapidawte’ nuntak zia pen Pasian’ lamah niamkiat tektek uh hi.

Khris a um mi a nambat zah a cin phetin Jesu khris in a mite, a si leh a hing laite zong a hinglai mahin a kaikhawm dingin guta bangin hong pai dinga, lupna tunga lumkhawm minih khat kila in khat ki nusia dinga, an su khawm mi nih khat kila in khat ki nusia ding hi. A ki nusiate’ lak-a om khak ding, kei lau mahmah ing” ci-in a genkhat ka phawk hi.

Ni sut lam ciangin ka tangvalpa in a zum nasepna lamah zum kah dingin pai a, keizong ka sumzuakna lamah ka pai hi. Ka paikawmin lam tawntungah ka lung ngaingai a, a lungkham sem-mah mi tampi tawh ka kituak hi. Sumbuk tampi na kikhak a, sumbuk kihong sunsunte lah kuamah huthe suah mel lo hi.

Zu sai khawng ka nawknate ah nidangmah bangin kihong sam a, ahizongin a innmai peuh vuah bang thu-tak gen uh hiam, a ciak ngeingai uh hi. City Hall ka tun ciangin nidang mah bangin mi kiphu lamh-lamh a, ahizongin nainganzi(politics)lam nidanga a kin zahin kintuak nawn mel lo uh hi.

Ka sumbuk ka tun ciangin ka laibu zuakpa leh ka lai-at puteekpa na om lo mawk hi. Ka lai-at dang nihte pen na na om sam uh a, sep ding mel thei lo-in a tu ngen’ngan’ lel uh hi. A kei sem in zong a nasep ding uh ka sawl’sawn ding mel ka thei tuan kei hi. Bazarpi munte nangawnah mite patau lua uh ahihmanin, “Ni thum sung khawl photni” ci-in thu ki zasak hi.

Nitak lam pen zu zuakna mun a, mipite cih loh sumbuk, zum innte kikhak khin hi. Kongzing khempeuhah hih thupiang lamdang kikumin ki omkhawl kawikawi hi. Keizong tua mah bangin, Pasian thu thei simsim ka sakpa kiang khat-ah ka paileh, “Jesu’ thugen lakah i uploh penpen mah tu-in hong tung hita hi. Tu in kiphawk pan hang; ahih hangin kailua zo ta hang” hong ci hi.

Nitak ciangin biakinn kim-ah, ki ta zolo zah dongin mite kikhawm zihziah a, “Maw Pasian aw, danpiakna thu bangci thu hiam? Ko’ aadingin lametna om lai lo ding hiam?” ci-in a thuum ciat uh hi.

Pastor a tam zawte lah a hing tanga kilate lakah kihel khin uh a, a om lai sun Pastorte kikhawmte’ lakah hong kihel uh hi. Kikhop pai zia nangawn a ngeina bangin kipai thei nawn lo hi. A lum, a letpi-in hun a kibawl gawp hi.

Mipite in a om lai Pastorte mawhsiat gawpin, “Pastorte in na nasep ding pen uh sem hile uh cin hibangin om lo ding hi hang, Pasian’ thu a taktak leh a maanpen hong hilh hile uh cin hizah buaina tuak kei ni. Pastorte in mihing’ pilna leh amau’ ngaihsut tawm’ mawkmawk peuh tawh Pasian’ nasem bangin na om’ man un, mi tampi tungah hibang hong piang ahi hi” ci-in Pastorte a kigawh ziazua hi.

Keizong ka biakinn mah vuah ka kikhawm a, nidanga kikhawm ngei kiuhkeuh lo mi 20 khawng leh ka Pastorpa uh tawh ka kikhawm khual’khual’ ta zen uh hi. Ka muan mahmah uh mi honkhat tua nitakin hong kikhawm lo uh hi. A nu, a pa, a zi a ta, a u , a nau, a hingtangin a mang kitam mahmah ahihmanin ko Pawlpi bangah a kitam pha deuhin ka ngaihsun hi.

Ka Pastorpa un, kimawhphelhna leh hong hehnepna in, aw-ling kawmin hibangin hong gen hi. “U te naute aw, Pasian’ nasep dan pen, nidang limin lungkiat huai ka sak denmah hi-a, hi zolo deuh zong ka kisak lam hong theihpih dingin hong um ing. Leitung thu lam tam gen lua leh, a gen’ zong nuam ka sak sim mah hiven, Vantung lam thu leh hong tung ding Pasian’ thuciamna-te gen kha ngei lo-in, alim’lim’in zong tu-a bang bebu dingin zong ka ngaihsun liang kei hi.

Keima’ gitnat lohna vive hi. Collage ah ka kah lai-a, “Lai Siangtho pen Kha lam thu hong gentehna hilel hi” ci-a ka siate un Lai Siangtho a thupi sak lohna hong hilhte ke’n na len lua kha hi’ng. Tua man a, tu-a bang teng a suak i hi hi. Khial mahmah ing; ka ki-im thei nawn kei hi. Tu in Lai Siangtho’ hong gen bangin um pah lianlian ni, cilenglah kai lua tazel si-a maw!

Ahizongin lung himawh lua nai kei dih un! Lamet theihna khat om lai hi” a cih phetin kote in, “Pasian in thupha ngah hen; bangci bang lametna om thei lai hiam” ci-in ka dong pah ngeingai uh hi. Pastorpa in a thugen mah hong zom toto hi.

“Tu-in Misiangtho lak tohna man khinzo ta hi. Tu-in hehpihna kong a kikhak khin hita hi. Ahizongin Hehpihna hun i lap loh hangin gupna thu thalawh theihna hunkhat om lai hi. A tawp dong a thuakzo, a kipzote in gupna ngah thei lai hi cih thu a om lai hi” a hong ci hi.

Tua banga Pastorpa in thu hong gengen laitakin ka khanglo lian mawk hi. Kidai-in, kilokin, thakhatin ka tho kha pak a, ka kianga Lai Siangtho sim-a om ka lawmnu in lamdang sa in hong len vat hi. Ka tuahkhak lauhuaipi pen tutpha zaal tunga ka mang ahih thu leh ka zi a mang kimlai pen ka muh kik takpi teh ka lungdam’ dan! Gen zong ka genkhia thei kei liang hi.

Tua-a kipanin Pasian’ thubu in a gen’ bang lianlianin a hipahpah hi, cih ka um ta hi] a ci hi. Tdkhen