Mipicing, milaihawl, micinglo ~ Tdkhen

Mipicing, milaihawl, micinglo ~ Tdkhen

1. Mipicing in mipi lungsim paai’ a, milaihawl in a ma’thu tawh lungkimin, micinglo in mi hawmthawh hi.(Mite i hawmthawhleh amau’ hihna i theihpih loh man hithei a, ei a hawm’thawh huai kihizaw thei hi).

2. Mipicing in a kizoppihte kigensiatsak taleh a kimuh kik mateng up sawm lo a, milaihawl in thulanggente a lang mah up sakin, micinglo in a kigen bangbang um pah hi.(I nu, i pate hiphial taleh, a kigen bangbang up pahpahna pen neulai vai’ ahi hi; i neulai-in, nu teng pa teng lak panin ei’ nu, ei’ pa mah a hat pen ding kisa lel hi).

3. Mipicing in a hoih a phatnate gengen khollo a, milaihawl in kipholak pahpahin, micinglo in ahihna-ban tawh a behlap hi.(Thu behlaplapna pen ei leh ei kimuanlohna gah ahi hi).

4. Mipicing in mite nekngaih a, mi laihawl in ama’aa tawh lungkimin, micinglo in a ngenthuah lai hi.(E’nna leh hazatna pen neihloh taktakna gah ahi hi).

5. Mipicing in thuman thutak hitaleh a kizang theilo dingte gengen lo a, milaihawl in a maan hipeuhleh gengenin, micinglo in midangte selphona(zahlaksakna)in a zang hi.(Mite maizum ding khuallo a, i zahlak sak denleh, miza’ng taktak i hidinga, huih tawm nung peuhleh leng kawikawi-in, kiim leh paam a saai kawikawi kihi ding hi).

6. Mipicing in a kigen khempeuh mannei sak a, milaihawl in ama’ deih teng ciamtehin, micinglo in ‘tua in, tua in zaleh ut sing’ a ci hi.(Mi kap’mopna bek tawh thungaihna pen a kineihkhem nuntakna hiding a, taang lak-a tahhum pawlte kihikha ding hi).

7. Mipicing in a cinglote mai-ngat a, milaihawl in a lai lam nga-in, micinglo in a hatte a en hi.(A hau, a lian, a pil, a siamte etetna in a zawngkhal nuntakna khat ahi hi).

8. Mipicing in a lungsim en a, milaihawl in a gamtat en-in, micinglo in a kampau a ngai hi.(Kampauna bek thupi sakna pen munphiah hoih a deih lel tawh kibang hi).

9. Mipicing in hun hawmthawh a, milaihawl in hun kicing sa-in, micinglo in hun a cimtak hi.(Hun cimtakna pen lungsim zawngkhalna hi a, gil zong a kial’ciangin ki omom theilo hi).

10.Mipicing in a thupha ngahna munte phawkphawk a, milaihawl in a ngah laitak tawh lungkimin, micinglo in ngah lai ding bek a en hi.(Ngahsate mangngilha, ngah lai ding bek lametna pen a deihhuai lo, khutdawh nuntakna ahi hi).

11.Pasal picing in a zite picing-et a, pasal laihawl in ama’ tha tawh tehtehin, pasal cinglo in a neumuh hi.(I zite i hawmthawhleh, a phelkhat zong a etphathuai i hiding hi).

12.Zipicing in a pasal cing takeileh cing-et a, zilaihawl in makaih sawmin, zicinglo in a nunghei’san hi.(I pasalte a hawmthawhhuaileh, a huh dingte i muanhuai ding kisam hi).

13.Ta-picing in a nu, a pa’ hilhna taina zahzah ngaingai a, ta-laihawl in hoih a sak tan khat ngai-in, ta-cinglo in a paikhiat san hi.(Hong kithuhilhnate i ngaih theih keileh, teek dongin kinungta thei khamah dinga, ahi zongin maizumna a tam kha ding hi).

14.Lawm picing in hoihna, phatna khat veve muhpih hong sawm a, lawm laihawl in hun nuam sung hong kikholhpihin, lawm cinglo in hong lamen den hi.(Lawm i teelsiam keileh, ‘Pheisam ai neih’ a cih kibang thei ding hi).

15.Makaipicing in ama’ aa tawh behlap a, makai laihawl in a hizah tawh vaihawmin, makaicinglo in a ngah nading tawh a geel hi.(“Makai hoihlote pen thuhoih thei napi-a Mee khia nuamlote’ teelkhiat ahi hi” George Jean Nathan). Tdkhen