Mipi mai ah Thugensiamna (Part 2) ~ AS Thangbawk

Mipi mai ah Thugensiamna (Part 2) ~ AS Thangbawk

11. Thu gen na kipat phet lian mah in mite lungsim leh lawpna ngahsawm pah limlim in.

A kipatna na siamleh na thugen 60% a siam in mite te in ngaihsun khin uh hi. Na thupatna pen kitel mahmah ding leh a tommahmah ding kisam hi. Khat veivei ciamnuihna tawh zong pathuai hi. A hizongin tua ciamnuihna pen mi kisuan theih nadingnam leh mikhat peuhpeuh a kawk ciamnuih nam a hihloh ding kisam hi.

12. Na thutawpna thupi.

Na deihna bulpi na genkhit ciangin na thutawpna mite a sukha mahmah leh a phawktawntungding kammal (tangthutom) te zangthei in. Na thutawpna ah mikhempeuh kihelsak, pausak, gamtangsak in.

13. Ki kuppih dan zangsiam in.

Na lawm it mahmah te tawh thuki kumkhawm danin thugen theilecin a hoih hun tampi om hi. Sia bangin thugen dinghun zong om hi. Munkhempeuh ah sia dan in thu na genleh hong kicimtak baihding hi.

14. Mipi maiah na gamtatluhek kidawm in.

Mite zatsa kammal te leh midangte gamtatzia tam ettehlua kei in. Mi’ gensa thu leh kammal na zatleh nangtheihdan in bawlse kei inla ‘tuapa in tua ci, a laibu sungah tua ci’ ci in genzaw lel in. A vallua in na thugen phat kei inla nangzong kilamsang lua kei in. Na mipi te lungsim na theihsemsem leh a mautawh na kipawlthei semsem ding hi.

15. Thungai mite enciam in.

Na thugen hong ngai miphazah, a pilna uhleh a thungaihsutthehna uh bangzah, numei tamzaw maw, pasal tamzaw, a upna ngeina uh leh a omzia uh na etphet in a huampi theihsawm pah in. Numei a tamzaw ahihleh numei te gamtatna ding bulphuh pian inla pasal vive a hihleh pasal te gamtathoihzia dingte bulphuh thei in. Naupang vive a hihleh bangte gen ding, khangno a tamzaw hileh bangci gen cihte khentel siam in. Naupangte lungsim, khangno te lungsim, papi te zaknopdan leh numei te deihna kibangkim ngeilo a hihman a hihi.

16. Na thutawp kuan ciangin thuthak pan kei in.

Mipi lungsim a ka sakthei ding thute genkha kei in. Nathugen khawl hun dingpen na gen ding teng a bei ciangin hilo hi. Mipi te in zaknop a sakmahmah laitak, na thugen hangin a lawpmahmah laitak lian in khawlsawm ziau in. Tuapen pilna ki ci hi.

17. Na gamtatna thupi hi.

A thupi penpen khat ah na khutvik, na vanzat leh na omzia, na maipuak zia mahmah a thupi pen a hihi. Na mittawh mipi lam en den zaw in. A tunglam peuh leh a nuai lampeuh sal gega kei in. Na etkawm in nui kei inla nuihmai in. Nuihhun dingom aa nuihmai tawntung ding hi.

18. Na awsuah a hoih in bawl in.

Na aw sangkhan hunding, niamsak hun ding, lungdam awsuah hunding cihte na genthu tawh kituak in bawl in. Na aw a ginzawh keileh mite’n a masa tawmcik hanciam in hong ngai dingaa a sawthetlo in na thugen ngai nuam nawnlo pah ding uh hi. Na aw a sang a niam na thugen ki zui in na laih theihleh thugen siam na hipan hi.

19. Ki pawlkhopna kammal te zangin.

Thu na gen ciangin ‘kei tawh kibangin, no teng, eite, eipawl’ cih te tamzat in. Kampau siamleh siamlo cihpen kisinna leh zatna tungah kinga mahmah hi. Tampi a gente siamsemsem zaw thei hi. Zongsatna cihpen kisinsinna, sepsepna pan in kingah hi.

20. Na khialhkhak leh kipuahpha in.

Na khialna te puahpha inla mangngilh bawl pah lel in. Na khialhna hangin lau kei inla lungkia kei in. Mipi te’n na khialh ciang hong nuihsan dingaa a hizongin heh peuhmah kei in. Hong nuihsan te mipi mai ah thugen dingin sam lecin a min nangawn ki genngam nailo ding uh hi. (azom Part 3 zong nasimsuak vemaw) AS Thangbawk