Mipi Kianga Ngetna – Thang Lian Pau (ZRO)

18th October, 2015
Manipur a singtangmite leh I gam uh nawmvalh sawmna ziakin Manipur Assembly in Dt. 31st August, 2015 ni in Bill Thum pass in om hi. Singtangmite thangpai mahmah in, Singtang gam teng ah kiphinna nasatak hong piang in a diak in Lamka ah Salpa 9(kua) te’n a hinna uh a piak ban uah minautang 50 val in liam leh baina i tuak ua poi petmah hi.

I Salphate sisan in hon gawmkhawm a, Manipur singtangmi teng in khutkhat tawi- khe khat khai in “Peoples’ movement” i pankhe theita a lungdam huai ka sa hi. I haksat leh lungzinnate Pasian in a lehlama thupha hongpiak nop om ahi chih ngaihsutna hon pia hi. I pankhawmnate Government in hong muh chiangin, hong thusim panpanta a i deih leh lunggulh gen ding zong nuam mahmah ta hi. Hiai Tribal Movement pen Kuitungtak a i paisuakpih theihna di’n kituahna, kipumkhatna leh kipiakzohna kul petmah hi.

UPF leh KNO in leng Joint Meeting, Joint Delegation chih bang kinei a, political demand zong khat kineikhawmta hi. Hibang kawmkal ah vangsiathuai tak in ka inn bang leng hong kang kha hi. Hiai toh kisai, hehna thangpaihna in kala kei a, Toupa kiang ka apkhinzou hi. Topa nang deihna banga thiltungte ziakin na min ka phat hi, ka minamte hihkhelh/bawlkhelhna te ka ngaihdam bang in Nang leng amaute moh maisak in, chi’n thu ka ngen zaw hi. Tua ahihman in keilam apan hehna/thangpaihna bangmah omlou ahi chih kong pulak nuam a, tuamah bang in kuaman lunghimohna, lungnoplouhna leh hehna-thangpaihna a zanglou ding in kong ngen thak thak hi.

Hiai i buaina tungtawn a Pasian in hong taihilh nop, gennop leh muhsaknop tampi om kha ding hi. Minam nasemte zong, kei akipan a neupen tanin nakpitaka kivelhthak kisam ahi. cih hong phawksak hi. Tua ahihman in kuapeuh in kivelhthakna leh thathak lakna hun in zangthei le’ng cih kong ngetnop ahi.

Kuapeuh Pasian lama kiknawn a, i mimal, innkuan leh minam adia panthak lakkhawm kisam petmah hi. Tuabang a panla di’n zong kuapeuh k’ong ngen hi.

Pasian eite tunga a hoihdan, UPF leh KNO te panlakna tungtawna lametna kipahhuaitak hong neihsakdante phawk kawm in, amaute panlakna nakpitaka zathuap di’n zong k’ong chial hi. Hiaite banah Tribal makhualna a pawl tuamtuamte ( Innpi-te, JAC, Student-te, Numeite, MTF mun tuamtuam a omte leh a dangdang ) nakpitak in ka kipahpih a, amaute panlakna zong mipi’n zathuap zel di’n k’ong ngen hi. Bible in “Unaute kituak diamdiam a omkhawm a nak hoih in a nuam mahmah hi” a cih banah, kituahlouh a hamsiat huai dan genna in, “Koi khua hiam, koi inkuan khat leng amah kidou tuh a ding khosuak kei ding” na ci hi. Mihing bukim ki omlou ahihziakin, kuapeuhmah in hunpaisate gen nawnlou in moh ki maisak tuah ciat ni. U-te, Naute aw, eimah huangsung keembit kawmkawm in, innsak-innkhang dakkimvel ni, i pankhawm nakleh gah loh ding limcitak nei i hi. Pasian in noute hong vualzawlta hen.

Minam adia na seppih uh,
Sd/-
THANGLIANPAU
President, ZRO

21zro