Mintuam minam ni vai-ah Tukpeng va kimawl sawm lai mataw

Mintuam minam ni vai-ah Tukpeng va kimawl sawm lai mataw

Malaysia omsung ih sepna khatpeuh hangin, Zomi mipi buppi hong pilvang hun teh ei mimal beklo, ih innkuanpihte, ih tu, ih tate hong ki gengenna ding asuah khakding thu saupi khinkhai aa, ih sepzia etphat huai denin mu ingh. Kawlgam sung leh gam tuamtuam ah Zomi vai aneu alian ih vei mahmah laitak, nang na omna gampan Zomi koiciang ah koihsawm? Zomi pen, Chin State sung aa khua khat pan ciding maw? Zomi pen Tedim kampau Chin te cisak ding maw? Zomi pen Chin State sung aa Khuapi te lakpan aa khat hi, cisak ding maw? Tua Khua minte tawh kikim suaksak ding maw?

Septheih bawltheihna, vaihawm zawhna ih neih leh zong, ei kampau kibang Zomi sung bulphuh tawntung leh hanciam ding hun thupi hilo maw?

A deuhdeuhin Malaysia aa om Zomi tukpeng kimawl siam ahih kei leh Zomi tukpeng kimawl a uuk khat peuhpeuhin tu tanvei thu omziate muthei nailo ding ihiam? Tu tanvei na siamna uh tawh na minam min a ut peuhpeuh aa hong kisap ding, hong ki ciapteh ding vaihawm zelzel lai ding maw, kihel lai ding maw?

Zum thupi tuamtuam leh leitung mun tuamtuam aa minam vai a sem tantante aa ding a dongkholh, maban a khaktan sak kha thei nasep kasem kha tam cih ki ngaihsun nailo ding maw?

Malaysia 2008 Minam Ni aa ding Tukpeng kimawlna pawipi ci-in, Tedim khuapi uk nuaisiah aa sanggamte-in a vaihawmna laihawmte-ah sim kha ingh. 2008 Faisal Cup (Sang naupangte Tukpeng kidemna) ah, minamkim tu zihziah mai-ah mite minam minte ki pahtawi ziahziahin Zomi pen a nihna kingahzo bek aa, thangpai mahmahsa-in naupangte Sanginn ciahpih ungh.

Tua hun aa kipan tu kikal sungin Malaysia sung uham leh Sang naupang tukpeng kimawlna tawh Zomi leh Zomi minin gualzawhna limci tak leh namdangte vaihawm zawhloh zahin mihon vaihawm khopna tuamtuamte kum simin ih neizo khin hi. A vaihawm ahih kei leh a kimawl lakah kihel khakloh hang hih gualzawhnate za kim tek lua hang. Ei le ei in hanciam zo lua ih gennopna hi. (A kicingin
aneng atawng ong genthei hi’ng!)

2009, 2010, 2011 hong pai toto, Chin minam ni pahtawina-in Tukpeng kidemna kibawl toto aa, Zomi Cup 2010 ih patkhit zawh ciang na le’ng ah Chin cih min tawh nasem lai Hakha lamte vaihawmna nuai-ah thatang, sum le pai tampi bei-in tha ava pia mipihte om toto hi. Banghang hiam cih pen a kimawlte tektekte-in atel kei phial zongin ei kampau tua Team makaite-in ngimna khat bel neiding hi.

Tua ava kihel a vaihawm pa, vaihawm nu tektek in, Zomi ka vei man ci hamtang aa, khiallo tawh kibang na pi-in a nungthu-ah ih Zogam nuailam sanggamte-in, lai tungpan, thusuah tungpan, internet tungpan, a kampau uh pan, “Hih Tedim kampau ih Chin minampihte” cih hiden lel hi! Theitek hang! Atua ciang mah aa hong ki ciamteh ding a ut ihih leh thutuam hi. Atua tawh kizui-in minam dang tuamtuam, gamdang mi uliante pawlkhatin Tedim kampaute cihciang bekin hong theiding uh hipah hi!

En ei kampau kibang teng lakah, mipi lakah, pulpit tungpan ahi phial zongin Zomi min tawh vaihawm aa kihel hi ungh ci aa ih paupau hang, mi hong ciaptehna Zomi na hideklo hi! A pawipi vaihawmte lak va kihel teh minam min atuam, ei kampau teng lakah ih om teh minam min atuam cihbang tawh kum tampi beikhin ihihi. Ih thatang leh sum le paii te pammaih sa nailo ding maw?

Gentehna-in, en a pawipi vaihawm makai semzo dingin Tedim khuapi uk nuaisiah sanggamte zong Zomi (Zet-o-em-ai) min tawh vaihawm pihzo ihih leh Zomi min a tawisang, a kemcing kici thei pan lo ding hiam? Tua lah hilo, en Zomi min tawh Chin Minam Ni pawi-ah kihel hi ungh, icih sawmvei hang a pawipi vaihawmte’n Zomi hong ci hetlo ih theihtek hi. Zomi hong ciphial zongin, Zomi pen, khua khat pan aa mite, ahih kei leh khuapi khat pan aa mite, ahih kei leh Tedim kampau Chin te hi ungh, ci aa ava ciamteh saksak, ava tangkoko hihang! Ih muthei nai hiam?

Tuaciang lel tawh minam leh minam min pulak nuam, ki ciamteh sak nuam ihih leh lah ei tangthu leh ei khekhap bawlnop bangbang hi-in, mipi pawlkhat in bel kimawl nopna lel tawh hong zuimah ding hi.

ZAM min tawh hita leh ZEC min tawh hita leh tukpeng kimawlna pawi cihte, ih lawmte tawh kipawltheilo leh ei a thutang pek sawm ngiat, a langpan’ sawm ngiat ih hikei hi! Amau zong, ei hong langpan’na aa a vaihawm uh hilo hi. Aki banglo theithei vaihawmna ki hanciam hilo hi. Zomi Cup ih vaihawm simin zong ih sanggamte langpan’na hilo hi. Ahi zongin, tuhun laitak leh mailam kum bangzah hiam khat ciang, koi gam koi gamah tuadan in ih vaihawm kullai phot ahih man hi!

Hih mintuam minam ni bawlte vaihawmna tukpeng pawi aa kihel sawm aki saikha peuhmahin hong ngaihsun pha mahmah un. Ahi zong, na khentatna khat peuhpeuh pen nang thu leh na tangthu hi hen. Aki saikha ngei gamthumna aa omte-in zong, na sepnasa leh a gah teng thupi na sak leh thupi na sak bang, sephuailo na sak leh sephuailo na sak bangin a kisai laite tung na pulak dih un.

Theihsakbehna: Gennop thu kitel dingin lamen ingh. Hih lai pen, mipi leh tukpeng kimawl siamte atel nailo pawlkhat in zong theihhuai lua mahmahta ahih manin kong gelh hi. Kikupbehnop ahi zong, theihsak kik nop ahi zong ka e-mail pan ong muak ingh: [email protected]. Malaysia ah tukpeng vai tawh ei leh ei in 2008 pan kumsim Zomi min ih tawisang zawhnate, nam dangte tung ih gualzawhnate atheikha nailo ih om leh e-mail tawh kizop ding ong muak ingh.

Tg. Kham