Mimal picin nang ~ Thang Deih Tuang

Mimal picin nang ~ Thang Deih Tuang

Mihing khat a picin theihnading (akl) a khatoh theihna ding-in leitung mipil ten a tom in khenpi (4) in a nuai aa bang in nanei uhhi. Namkhat pan mimal dinmun kisitna piciang hi zong cihtheih hi.

Eng Neihlohna mun (Comfort Zone)

Eng Neihlohna Mun sungah I omciang, lungmuanna, ei-le-ei kimuanna om khat kinei hi cihi. I kiim I paam ah I en omlo, awlmawh luat neihloh na mun hi-in a nuam mahmah mun hi. Eng neihlohna mun a hih hang a pilpen, a haupen, a siam pen hilo in; pilna, hauhna, siamna neite englo in I nuntakna nuam I sakna cihna hizaw hi. Tua hi a, namkhatpen genleng awlmawh neihlona mun zong kici thei hi in ka-um hi. Tua hi-a, hih munpan I pialkhak dingpen haksa-in hihmun ah mitampi kidiah hi.

Launa Mun (Fear Zone)

Eng Neihlohna Mun pan puapial to leng Launa, dahna, cihte-in hongzui pah hi. Banghang hiam cihleh, bangmah I theihloh lam, I neihloh lam, I hihloh lam kithei a hihman in lauthawng in ki om aa, ei-lei-ei kimuanna zong hongbei vat hi. Tuasungpen mipil ten launa mun (Fear Zone) naci uhhi. Tuamun I om hunsung ah paulap tamdeuh hi ci citciat hi. Khialhna, mawhna khat peuh I hihkhak ciang kei hang hikei, tua (or) hih hang hi ci-in paulap kizong phadeuh hi ci uhhi. Hih munpen, mi khat peuhpeuh-ii thugenna, kamsiamna, lai-at nate in I nuntakna hong huzaap, zo mahmah hi. Kammal hoihlo in zangleng molhtum aa I om hunsung hi.

Sinna Mun (Learning Zone)

Den-a I gen launa pan kalkhat khuadak to laileng Sinna (Learning Zone) ci-in ki ciamteh hi. Hih munpen khantohnang’ I kipatna mun zong cihtheih phial hi. Hihmun pen siamna, pilna, thutheihna khat peuhpeuh I sinna mun hi. Tua a hihman in a nuamlo mun le haksatna zong kituak phatdeuhna mun hi.

Picinna Mun (Growth Zone)

A tawpna kalsuan tolai leng Picinna Mun (Growth Zone) hi kici hi. (Ei-kam in khantohna Mun zong kici thei in uming). Hih munpen ngimna, tupna I zon na mun hi. Sinna mun I omlai aa i sinsa pilna, siamna tetawh bangsemding kahiam, bangci khuasa ding kahiam cihna mun hi. Sunmang a neisa te-in I sunmang sung ah kidiah in a tangtun theihnang’ sepna mun hi. Kam maldang tawh genleng kanunsung bangsem ding, maikum sung bangbawl ding cihbang in ngimna kician neihna mun hi.

Hihpen a hoihpen zong hithei hilo thei. Mikim zattheih zong hilo thei, hikha thei hi. A hizong, a huamkim in kiteh leng I dinmun hongthei sak gige thukhat bek thamlo-in picin nading lamlak thuhoih khat hiding cih umham tang ing. Picin ding lam manawh ihiam, awlmwh neilo aa ei-le-ei kipum muanna mun ah nuamsa in I omhiam cih kisit ding kiphawksak nuamhang.

Hih lai-ii deihna bulpi huamkim in enkik leng sinna keileh khantohna omlo cihna hi.

Hihbang thu i genciang Eng Neihlohna Mun (Comfort Zone) ah omlo ding cihna hizaw lo-in tuamun ah i omciang picin nading haksahi cih a gennuam bek I hi-a, tuamun ah omding a kisap mahmah hunzong omkha theiding hi cih kitheisak nuam hang. “All progress take place outside the comfort zone” Thang Deih Tuang