Mihing’ maban ah Pasian

Mihing’ maban ah Pasian

Pasian pen nakhempeuh leh i nuntakna mahmah ah No.1 a koih ding a thupi pen hi. Kuaman’ niallo hi. Thudik hi.

Ahita zong in, sep le bawl vaihawmna khempeuh Pasian’ lamlahna leh mapina nuai ah sem ding hibek a, Pasian’ ong sepsak thallupsa a ngak ding bel hilo hi. Pasian’ sep ding a va ngakphei ding zong hilo hi.

Thu kikupna ahi zong in, nasepna khatpeuh ah ahi zong in, a thu kigen, thu kikum sa teng, nasep maban a kuppih thei, a seppih thei lah hi ngaplo, sayagyi luuluu, va sai phei a, thu bingkhakna, ma bingkhakna lel a Pasian’ khut ah vangaksak phei pong pen vangik pua a pai keihkeih khat avan a dawn lah hingap lo, suahkhiatsak a lamgei a ngaksak mikmek tawh kibang hi. Tua in inn tunpih genloh khat vei kisuat phatkik, kithak patkik kisam sak mikmek hi.

Thu kigen thu kikupna khempeuh ah theih tawh theihloh tawh, tel tawh telloh tawh va kihel a va sai, vapau denkeei pong ahi zong in, nasepna maban khempeuh ah va kitulmawh kawikawi pong denkeei ahi zong in, a kisamlo pi a va kiphatmawh kawikawi pen haina namkhat ahi hi. Sia Laang Pau’ kammal “a ong ding teng mah in ong puak uh hiveh aw” … kawm le’ng, “a haiteng mah zong ong tuaci tat uh hiveh aw” cih ding ong hi hi.

Zomite’ lak ah Pasian’ min paulap, kilimzep zialzual sim zawzen a a hici tat, a kawm pan a amet dok niloh tam simsim mawk hi. Dongkholh bek thamlo, nasepna subuai, nawngkaisak in, thu kikupna nangawn botsat in thu le la nangawn kigen thei nawnlo dinmun tun kawikawi uh hi.

A tawpna ah mipi maban telmun mel om nawnlo, tangtha lokuan maban ah kigual diudeu a mapang ding kimlai, lo laizang utna peuh ah pang a kho zelzul, mahial cihlah om theilo, khawhsa khawh nailoh cihlah kithei mello tawh kibang hi.

Pasian ah i apding leh ei’ sep ding i theihtel ding kisam mahmah hi. Pasian in San tuipi a khenna ding in Mawsi in a ciangkhut a vik kul a, suangtum pan tui aphulna ding in Mawsi in a ciangkhut tawh suangpi adawt kul hi.

Dawn a inn dong a puakpih nahih kei leh mi’ van suahkhia in, lamgei ah ngaksak mikmek kei in. Pau Khat Suan