“Mihing leh Pa po” ~ Tual Khan Suan

“Mihing leh Pa po” ~ Tual Khan Suan

A zatna: Mihing te nuntak hun a tomno khat sung a hih manin a manpha na sep ding leh a hoih a gamtat ding thu hilhna in ki zang hi. Hun pen nuamsa leng tom a, genthei in haksatna thuak leng sawt kisa hi. I nuntakna pen nuamsa den ding i ut zongin hi theilo, gentheih haksatna thuak ut keng cita leng kipelh theih hi tuan lo hi.

Nopna leh dahna pen leitung mite tawh a kipelh thei hi lo a, mite’n kipelh ding a hanciam zongin tuate in mite nawk veve hi. Thuakdan leh puak dan siam ding bek kisam hi.

Pateh (mushroom) pen mihingte an, zatui ding phattuamna hong pia theih bangin sihna zong hong pia thei hi. Pateh khempeuh mihingte a dingin nek theih hituan lo a, pawl khat (patung, papak, patang, cih bangte) bek kinei thei hi. Pateh pawlkhat pen nekhial leng kigui thei a, a tawpna ah sihna zong hong pia thei hi. A langkhat pan in Pateh pen mihing te a ding in a hoih penpen zatui hong pia khia zong a hihi.

Natna khempeuh hoih hi, ci a kigen zatui a hi Pennicillin namte zong Alexandra Fleming kici mipil pa in pateh tung pan in a na muh khiat a hihi. Tua pateh te pen mihing a ding in sihna leh nuntakna hong pia thei hi. A hizongin pateh pen sawt nungta lo in, zing sang tung a, po pen nitak lam (sun lamteh) na vul/si ta hi. Tua hun tomno sung bek pen a kizatna ah zang siam leng mihing te a dingin nuntakna hi a, zang siam kei leng mihing te sihna a hihi.

Mihingte nuntakna pen ei te’n i nei kei a, hong bawl pa Pasian khutsung ah om hi. Ei te’n i nuntak hun sawt ding maw, tom ding cih i thei kei hi. I pu leh pa te’n zong mihing te nuntak zia pen kigen theilo a hih manin i nuntakna pen a hoih pen leh a manpha a zat ding na thupi sak pen uh hi.

Mipi a ding lungsim hoih (common sense) neih ding na hanciam den uh hi. Mikhat i nuntakna pen a manpha mahmah hi a, leitung ah tehpih theih ding dang a om lo khat a hihi. Tua a manpha nuntakna pen a mawkmawk a zat loh ding thupi a, a thupi leh a manpha a zat ding a kilawm a hihi.

Midang te nuntakna ding na hoih khat peuh sepkhiatna pen mihing hihna kilat sakna a hihi. Pateh bangin i nuntak hun sung tom mahmah hi ta se mah leh tua hun tomno sungin a manpha na sep ding a thupi a hihi. I nuntak pih mihing dangte a dingin sihna a pia gu hih sangin nuntakna a pia zatui a hih ding thupi zaw hi.

Tua hi a, i pu leh pa te’n pateh (mushroom) tawh nuntak zia kibang mihing te nuntak tomno hun sung in a manpha na sep ding leh na hoih sep ding thupi sa in i nuntakna zat zia ding tawh kisai thu a gen uh ciangin “ Mihing leh Pa po” ci’n thu na gen teh uhhi. Tual Khan Suan (June 24, 2007)