Mihaute’ Hauh dan thusim (3) ~ Mungpi Khupson

Mihaute’ Hauh dan thusim (3) ~ Mungpi Khupson

Mind your own business! “Nang adingin na sum nakpi’n semsak in, tualeh nang’ nakpi’n nasep kisam lo ding hi.” – Napoleon Hill

Khatvei McDonald (leitunga hamburger minthang penpen) pankhiapa Ray Kroc in University of Texas MBA gual mai ah, “Ka sumbawlna bang hiam?” cih dotna a bawl leh, a ciamnuihna sa in sangnaupang khempeuh nui ngeingai uh a, kuaman dawng lo uh hi. Tuateh a dotna ngei mah dong kik hi. “Ka sumbawlna bang hiam?”

Sangnaupangte nui heethaat kik uh a, a tawpna teh a hangsan pian khat hong kiko khia in, “Mr. Ray, hih leitungah hamburger tawh na nekzon lamtak kuan theilah peuhmah ding ahi hiam?”

Ray in bangci dawng hiam cih leh, “Tua nong cih ding ka lamet mah hi…. Lawmte aw, ka sumbawlna hamburger hi lo hi. Ka sumbawlna taktak pen Real Estate (Inn mun lo gam) hi” ci hi. Lamdang sa ciat uh hi. Banghang hiam cih leh Ray Kroc in hamburger bekbek a buaipih sa uh hi.

Ray Kroc in bangci bangin Real Estate tawh sumbawl hiam cih leh, mikhat peuhin McDonald ah franchise bawlin sai thak a pat nak leh tua sai’ inn mun lo gam pen ama company McDonald khutsungah ompah cihna hi. Tu in McDonald pen leitungah Real Estate haupenin kiciamteh a, Catholic Biakinn khempeuh sangin building hauzaw mawk uh hi.

Robert Kiyosaki in Ray Kroc thu a genna ah, Ray’ nasep (Profession) pen Hamburger ahi a, a sumbawlna (Business) ahih leh Real Estate hi na ci se hi.

Hih business leh profession pen khentel theih ding kisam mahmah hi. Kumpi nasep leh company khat peuhpeuh nuaia nasep pen business kici theilo dinga, profession kici thei bek ding hi. Mi’ khutnuai hi lo, nangma’ min ngiat tawh sai ahi a, sumbawlna khat peuhpeuh na neih leh tuapen na sumbawlna (Business) ahi hi.

Tua hi in I hauhnop taktak leh mi’ business sep pihpih sai pihpih lo in eima business teekteek I buaipih theih ding thupi pen hi. Tuapen hi, “Mind your own business” I cih nop.

Ray in sai tampi a neih hangin amah teekteek a munah va pai in a va sep sese kisam lo hi. A office panin kisam teng vaan lel a, khasimin a franchise ten a bank account ah sum sung ziahziah lel hi. Na Boss in mun tuamtuamah sai tampi nei mah leh amah nisimin hong pai in hong sep den kisam se lo hi, ama’ nasem muanhuai nangmah zangin khasim sum saang ziahziah lel hi. Banghang hiam cih leh hua a tunga Napoleon Hill’ gen pen mang (Apply) mawkuh hiven.

Mizawngten sum adingin nasem uh a, Sum in mihaute adingin nasem hi. Tua ahih manin na hauhnop taktak leh nang va kuankhia tangtang kenla, na sum kuankhiasak zaw in! Mungpi Khupson