Migina ~ GS Pau

Migina ~ GS Pau

1. Amah leh amah kitheitel hi.
Greek mipilpa Socrates kammal a mangmawh khat in “Nang leh nang kitheitel in” (Know thyself)” cih ahi hi. Amah leh amah a kitheitel mite kiphasak ngam ngeilo uh a, kampau, gamtat luheek kidawm mahmah uh hi. Midangte hawmthawh ngeilo uh a, amau leh amau kihawmthawh zaw uh hi. Tua hang mahin migina suak uh hi.

Victoria kumpinu in a neu lai-in lai kin vetlo-in om milmel lel hihtuak hi. A Sia/Siamate in a hanthot niloh hangun a kilamdan luatna om tuanlo hi. Nikhat a Siamate khat in nang pen mi mawkmawk na hi kei a, nikhat ni teh England gam a uk ding kumpinu ding na hi hi, ci-in a gen ciangin Victoria zong amah leh amah hong kitheitel a, tua a kipan lai hong hanciam hi. Pasian in hong huh kei leh hih England gam uk zo kei ning, ci-in thu hong ngen hi. A tawpna ah migina khat leh leitung ah ni a tum ngeilo gam a kici liang England gam kumpinu hong suak hi.

Ei Khristiante zong ei leh ei mi mawkmawk hi lo-in Pasian’ ta ihih lam leh Jesu Khris’ nungzuite ihih lam kittheitel ciat hi lehang kuamah zukham, ankhamin kivak lo ding hi. Mite’ etneu leh nuihsatin ki-om lo ding hi. Migina kisuak lua mahmah ding hi. Tua mah bangin Pasian’ naseemte zong ei leh ei kumpite’ Kumpipa’ naseem ihih lam kitel hileng, i nasepzia hong kilamdang ding a, mite’ zahpih leh hawmthawhin ki-om lo ding hi.

2. Biakna kician leh pawlpi kician nei hi.

Miginate in biakna kician leh pawlpi kician nei hamtang uh hi. Pasian a biak uh leh kician tak mahin bia vet uh a, dawi a biak phial uh leh zong kician tak mahin bia vet uh hi. Kop leh kai thuahse lo uh hi. Tua mah bangin pawlpi kician zong nei uh hi. Pawlpi khatah kip tak, kho takin om vet uh a, pawl tai kawikawi se lo uh hi.

Biakna in i lungsim leh i nuntakna hong kilamdang sak thei hi. Tua mah bangin pawlpi in zong i nuntakna hong taat-hiam, hong laamto, hong khuasuahin migina hong suaksak hi. Biakna kician a nei meel se lo, a upna a kheel kawikawite leh pawlpi kician nei lo-in pawl tai kawikawi nilohte pen lungsim palaangte hi a, cikmah hunin migina suakzo ngeilo uh hi.

3. Dinmun kician nei hi.

1948 kumin Israelte gam khatin hong din’ uh teh gamphutpa David Ben Gurion (18861973) in Israel President dingin mipilpa Albert Einstein (1879-1955) na hopih hi. Albert Einstein in,”Pasian in kei, gam makai dingin hong seh kei’,” ci-in na nial hi. Hun khat lai-in Dr.Billy Gram zong Lai Siangtho sang lianpi khat in amau sangah siapi a seem dingin na hopih ngei hi. Dr.Billy Graham in, “Pasian in kei, hih mun-a dingin sathau hong nilh hi kei,” ci-in na nial pah sitset hi.

Migina i cihte in Pasian in kei bang munah hong koih hiam, cih tel sinsen uh a, amau mahmah in zong dinmun kician khat nei pah sinsen uh hi. Dinmun kician a neih man mahun migina a suak uh zong hi zaw hi. Vai khatpeuh ah khensatna kician pia pah lianlian uh hi. Mite’n bangbang genin, kim leh pam ah bangbang a piang zongin, khatpeuh in a togawp phial zongin tua tawh a dinmun uh kheel tuan peuhmah lo hi. Khatpeuh thugen tawh hoisuk, hoito ngeilo uh hi. Mi’ ngaihsut piakna thupisan uh a, kipuahphatna-in nei uh hi.Ahi zongin tua tawh a dinmun uh kheel tuanlo uh hi. A thu uh kheel nemnum ngeilo uh hi. Tua hang mahin migina a suak uh ahi hi.

4. Maban kician zong nei uh hi.

Miginate in maban kician zong nei uh a, manlah mahmah den uh hi. Maban kician a neih man mahun migina a suak uh zong ahi hi. Uuk kician leh vei kician nei uh a, mailam ading geelna kician zong nei lai uh hi. Pasian in amau’ tungah bang talent pia cih zong tel uh a, tua mah zangkhia den uh hi. Midangte eng niloh se lo uh hi.

Pasian’ naseem ahi a, leitung naseem ahi uh zongin maban kician nei a, a manlah mahmah dente bek mah migina suak bek uh hi. Pilna sangpi nei napi uuk meel neilo, vei meel neilo, leh maban kician a nei meello mite migina suakzo tuan peuhmah lo uh hi.

4. Thuman uh hi.

India gam Calcutta khua ah miphak a tulsawm-a sim ding a keem Mother Teresa (19101997) in, ”Pasian in eite a lawhcing dingin hong sap hilo a, a thuman dingin hong sap kihi zaw hi,” ci-in gen hi. Mihingte in lawh’cinna en a, Pasian in ahih leh thumanna leh cihtakna en hi.

Migina i cihte pen a thuman teng mah zong ahi uh hi. A thuman manun migina a suak uh zong hi zaw hi. Sum leh paai tungah thuman uh hi. Hun leh nai tungah thuman uh hi. A nasepna tungah thuman uh hi. A zi leh a tate tungah thuman uh hi. Tua mah bangin sepna bawlna peuhpeuh ah paubaan nading nei lo-in thuman takin seem uh hi. Kumpi na a sep uh leh thuman takin seem uh hi. Sum a bawl uh leh zong thuman bek mah deih uh hi. Pasian’ na a sep uh leh zong a minpua ciang bekin seem lo-in kician tak leh hanciam tak mahin seem uh hi. GS Pau