Meivak pawi, Khuado pawi ~ Pau Khat Suan

Meivak pawi, Khuado pawi ~ Pau Khat Suan

Tuni Thai market kici Golden Mile Complex ( Singapore ) ah kapai leh amau zong Khuado pawipi na bawl zihziah uh hi. Amau bel “Khuado” ci kei uh. Lantern Festival = Meivak pawi hi ci uh. Kawlgam ah zong Kawlte’n “Meivak pawi” bawl unteh maw!

Bangdia Zomite’ Khuado pawi hun a amau zong amin dang khat tawh pawi bawl sese uh ahia le? A bawlnop uh leh “Khuado” cipah lel lo a, bangdia mindang pia sese uh ahi tam?

Hmmm…. Zomite i minam pawipi, Zomite’n ngeina pawi thupi pen a i neih i “Khuado pawipi” banghang in hihzah a sekneu mawk i hiam? Mi’ pawihun, mi’ holiday leh nasep manhun Nipi Nino peuh a bangdia tua pawi bawl mawk i hiam?

Minam ki-itsak mahmah Zomite….. ngaihsun pha dih veni e. Upa Makai leh Siate’n ong geel pha le uhteh lunggulh huai sa mahmah ing.

I minam, i ngeina e’n i thupi bawl kei a, i pahtawi kei leh kua’n ong thupi bawlsak a, kua’n ong pahtawi sak ding? Bangdia ei’ khe ah ei ding ngamlo i hiam? Ka lunggulh thu ong sung dih ning.

Zomite’n i ngeina pawi i neih sunsun Khuado pawipi …

1) Kumsim in mun khempeuh ah ahun kibang in bawl ni.

2) Oct 14 -16 sung in bawl ni. Nipi nino leh kumpi holiday tawh adjust zenzen kei ni.

3) Kumpi nasem leh Company nasem khempeuh in hih hun sung akhuan la ngiat in Khuado hun zang ni.

4) Mi’n ongdot leh “ka ngeina uh ka Khuado uh hi” cingam ni.

5) Akhuan piak le piakloh tawh kisai lo in nasep pelhngam sawm ni.

6) Ni 3 sung ah, ni masa= kigin, kithawi ni. Ni 2na = ngeina pawipi. Ni 3na= Pasian biakna, lungdam kohna leh thungetna, cihbang in zang ni.

7) Kipawlna leh pawlpi in thupi ngaihsut in makaih ni. Ahihtheih laiteng a tam theithei, a kinai leh alem theipen zui in bawlkhop sawm ni.

8) Pasian biakna, pawlpite in nidang pupa’ dawi le kau leh theihloh pasian biakna pan a nungta Pasian biakna lungdam koh hun in zang ni. Khuailak aisanna mun ah Pasian’ tung lungdam kohna leh thungetna hun in zang ni.

Related: Khuado: Ngaihsutna thak khat ~ Dr. James Dongno

Khangthakte’n i ngeina leh i minam thupina ong tel ding uh hi. Minam itna zungkip khasak ding hi. I Pasian hehlo ding a, Namdangte’n ong thusim in ong zahtak ding uh hi. Zomite i biak Pasian in ong makaih tahen! Pau Khat Suan