Master of Theology sangman Sia Dalpu

Master of Theology sangman Sia Dalpu Lungdampihna

Gawngmual khua mi Pa Dim Lam Thang le Nu Dim Khua Mang ii tapa 7 lakpan a neupen, Nu Cing Sian Huai ii pasal Sia Zen Khan Dal @ Sia Dalpu in Leitung bup ii hong sansak theih, Kawlgam ih kipakpih mahmah Laisiangtho sang ih neih Myanmar Institute of Theology (MIT) – Insein, Yangon a ih sangpi ah Ecumanics, Church and Society, Systematic Theology, Denominational Studies, Basic Christian Beliefs, Christanity… etc cih subject teng kum 5 sung vilvel Master of Divinity sang naupangte ahilh khit ciangin mailam maban ading a sangzaw a tuntoh theihna ding deihna in MIT sangpi phalna leh sawlna tawh Norway gam a Lasiangtho sang minthang, leitung ii theihpih MF Norwegian School of Theology, Oslo ah kum nih sung (2013 – 2015) Master of Theology hong sin a, tu in a sang gualzo takin hong man ahih manin amah leh a innkuan, ulenau pawlpi, khualetui mahtawh a kibangin ih lungdamna thu ih ki pulak nuam hi.

Siapa Sia Dalpu pen mi thunuam, mi it thei, mipawlnuam, thuthuk thei mipil mimuan huai mahmah khat ahihna tawh kizui in Oslo ah asangkah kum 2 sung khempeuh Myanmar Christian Church (MCC) ah sia sem – Pawlpi makaih in, a hun awng neih sunsun leh pawlpi in a phal hun a om sunsun ah Norway gam a mipih te kiang hong ban kawikawi in tha hong pia bek hilo in thuthuk khathu taksa thu tampi hong hawmsawn in ka na tai mahmah uh hi.

Siapa ih ngaih man hiam hong om sung a tomno tawh kibang ih sak hangin a laisin hun course kumnih hong gualzo in hong man petmah ta ahih manin innkuan kiang leh nasepna maban zom dingin August 26, 2015 ni ciangin Kawlgam lam hong zuat san ta ding a, ih lungdampih mahmah hangin ih lung khat hong leng diai-duai mawk hi.

Siapa tungah lungdam leh mangpha ih paih kawm mahin siapa in aomomna pan in Norway gam a Zomi te hong mangngilhlo a, Kha thu leitung thu ah ngaihsut hoih tuamtuam tawh tha hong piak zel lai nading in zong ih thum nuam phapha hi.

Siapa Sia Dalpu amaban ah Topa’n a tangzai zaw in hong zatsak henla, a sangnaupangte bek hilo Zogam, Kawlgam, Leitung ah Pasian in hong zatsak tohtoh laina dingin Topa tungah thu ih ngetsak hi. Lungdamna lianpi tawh, A lawm JK Kam (ITNA LEIBA, Norway)