Masak le nunun ding ~ Lian Tuang

Masak le nunun ding ~ Lian Tuang

Sakhino khat ngalno khat man kha leng, u le nau tawh tutkhopna om khaleh, nopna dahna ah zat ding cih kammalte pen Zomite sungah a kiza mun mahmah kammal ahi hi.

1. Inn le lo, neih le lamh khat peuhpeuh I vaihawm ciangin ei ading bek ci loin midangte ading ngaihsutna thukhualna tawh thu a vaihawm mahmah I hihna kilang mahmah hi.

Ahi zongin hih thupomzia in I thungaihsutzia le I nisim nuntakziate ah zong thukpi takin ong huzap leh kilawm ka sa hi.

2. 2004 pan tu ni ciang cycle 4 vei ka laihta hi. A li veina pen tu kum kipat lamin kalei hi.

Ka nasepna pen Kawlpi le Tamu kim teng hi a, khat veivei hun ngah sun ciangin Tedim ah ciah zel cih ahi hi. Ahuampi in ka hun 98 % kim pen Kawlpi le Tamu ah ( Zanggam ) a om ka hi zaw hi.

Ahi zongin cycle ka lei ding sim in Tedim ciahna ding akl lamto pai nading a hat bekbek ka bulphuh zaw den hi. I theihsa tek mah bangin cycle lamto pai hat mahmahte lamphei a pai ciangin nuamlua lo hi.

Cycle 3 na pen nuam pha nawllo ahih manin tu kum kipat lamin Cycle 4 na mitsi teta in ka laih leuleu hi.

3. Hih hun ciangin ka cycle zatzia ka ngaihsun phapha hi. Lamto sangin lamphei ah ka zatna tamzaw tham ahih manin lamphei a azatnuamte lei zaw ning ci in ka ngaihsunzia ka khel a, tua bangin ka lei pah hi.

Ka zat taktak ciangin lamphei adinga kibawlte mah lamphei ah na nuam mahmah takpi hi. Tawldam in lam zang mahmah hi. Thei baih hoh leng maw ka ci sansan hi. Lamto ah zong a hat vanvan loh hangin kizang thei veve lel hi.

4. Hih thupiang ka etet ciangin Zomite in inn le lo, neih le lamh khat peuhpeuh I vaihawm ciangin zong nat le sat hun, mipi tawh tutkhop hun ding bek i bulphuh luat khak manin I nisim nuntakna ah buaina nawngkaina tampi kinawk den ahih lam ka phawk sansan hi.

Tua ahih manin a kipelh theilo hunte ading kiginkholh ding a thupi mah bangin nisim nuntak ading pen thupi zaw lai ahih lam ka phawk thak hi. Lian Tuang