Martyrs: Ei te’ aa ding-in, kua si-ngam hiam?

Martyrs: Ei te’ aa ding-in, kua si-ngam hiam?

Kiginna a neihloh, a kiupmawhloh laitak-in, U Aung San’ 19th July 1947 (Saturday) ni-in, hong kisuamlum mawk hi. Tua pan-in, kumpithak semding a mah leh a thu kikuppihteng bek mualliap hilo-in, Kawlkumpi uknasung ah a omteng aa ding-in, mualdawn pan, nino hongsuak ciaiciai teeisam napi,’ sunni haammanlo-in, a tumlam a hong manawh duaiduai hi. A diakdiak-in, mualtung mite aa ding-in, khimziinna a hong kipanta hi.

British Colony hun sung-in, khaicii kivawhna leitangh-hoih tawh kibang Zosuante’ gaalhang, gaaldo siambek hilo, a cihtaknate’uh ciaptehna-in, gaaldona thaupite a khutsung vuah, a ki letsakna thu, theihciat a hihi. Britishte nung nangawn ahzong, Yangon (Gaalbeina) khuapi nangawn pen, sanggam Karente’ khutsung a tungding kimlai, Kawlmaangpa’ huhngetna tawh, Zosuante hotkhiatna, hong kiciapteh-sakse lohhang, a kigengen thu a hihi. Thuciingthei Karen pawlkhat bang-in tudongmah, hong ngaizolo zahdong in, ki-omlai a hihi. Kuama lungdamh koh ngahlo ban-ah, lainatna a piangsakzong kihithei hi.

Tuabangteng in, Britishgam pan a suaktacilgam a bit leh a khantoh nading’ amapang-masate’khang ban-ah, gaalkap kumpi uksung inzong, mite’ laulehliing in a omlai-tak, Aung San tanu a dinpihngam-pawl inzong, Zosuante’ ih kisialzo lai hi.

Hizahciang’ a citak ciampeello Zosuan Zomite’ hisam nave-hang, tuciangdong mite’ lak-ah tuantual leh kilawhsam phadeuhlai maw? cih dotna hong om hi. Ih dinmun bang taktak hiam? Lungtang-hoih a neingiat, midangte’ a hung leh dinpihding thanuam ngiatte’ maw? Sawl tangzangngiat-ponglel aa, mawlhtum in hong kizangden mawleh? cihbang-in, lungngaih ding’ tampi hong piang hi.

Kawlgam High School, Myanmah Tamai(History) hong kisinsakna sung ah, Kawlgam suahtaakna ding’ a kipatna pen , Kawlngeina leh biakna a itna uh pan, a kisatsuahkhia a hi hi. British leh Japan te khutsung pan suahtaakna ding in, ih munsan tek pan kihanciam cihciang hi aa, Kawlmi leh Mualtungmi masuankhopna, kitam’ ciapteh lo hi. Tua hunlai-in, minam-khanlawhna a kicih leh Kawlminam cihna hi pah aa, Mualtungmi tawh kipawlna pen, Panglong agreement pan hipan, kici thei hi.

General Aung San pen, Kawl phonegyisang (monastery) pan khangkhia a hih mahbang-in, hong kipatkhiat cil-in, Mualtungmi cihbang theitelding genloh, Christian a cihzong theimasa beeklo khading a hihi. Kawlmite’ aa ding’ lainatna tawh hahkattak-in, hong kalsuanna pan, Kawlgam suahtaakna ngahna ding’ Mualtungmite kihelloh phamawh khat hongsuak laizang a hih man-in, kintak in, hong kipei bengbung hihtuak hi. Kawlte aa ding’ Mualtunggam leh Mualtungmite a kisapna-uhpen tuciangdong-mah hileh kilawm hi. Majority a hi Kawlte, Mualtungmite kaaipan selo-in, a mauguak dingzo lello uh hiam? cih kidot huai hi.

A mite’ aa ding’ nuntaakna piangam liang ahi’ U Aung San pen, a citak Zosuan kici te’n kawlgam suahtakna ding’ Panglong aa kipan, ih dinpih vet-in, a mah Aung San leh ih pu Mualtunggam taangmite’ lunggulhna leh kamciam a hi “Federal” a tang’tun dong, kalsuan suakpih-vetding ih hiam? A hih keileh, Panlong thukimna a kizuilo veve, lehphel ding ih hiam? cihpen Mualtungmite’ kidot-kimciat ding hong hita hi.

A hizong in, leitung leisung sumpiang a neilo leh sumbawlpilna piicing, a neizo nailo te aa ding in, hong-en ding’pu khatbel neiloh phamawh photding hi. Tua kawmkal ah, ih neihsunsun gulllumual leh munhoih tuamtuamte’ gam mipite phattuamna, a piaktheihdong, kepcingding a hihi. Zogam pen, pilnalehsiamna khua, a suah masak kul ding hi. Tua ding-in, septheihna-ciat ah, mapangtekding a hihi. Ih muan pen Daw Suu Kyi nangawn zong, lam-etbang in paizanzan theilo, a mahkiabek dingzolo, Kawlgam laamto zuahzuah zolo hi. NLD naseppihte, a panpihte bek hilo-in, gambup mipi-in, a kalsuanpih kei leh Kawlgam a nungtolh kik ding’ deihuailo hibeklo, lauhuai hi.

Kei cidamna ding takpi’ zatui phimmuukzum zong thuak ngamlo, lau-in, ka om-laitak,“ Keitaang-in kua si-ngam ding” ci-in, dotding pen mihing lumsim tawh, a hithei ding’ a bat hang’, Christian vailo lua aa, puulak ngam vetding zong a hi kei hi. A langkhat pan, a ma hamsatnate’, cillum tawhzong valh manlo-in, midangte’ aa ding nasembek hilo, a nuntaakna nangawn, a piakhia-ngamte, Pasian tapa lungtang neite a hi uh hi.

Nidang lai-in, beh leh phung sung, minam sung bek mihing-in kisim in, a dang khempeuh a sihmang hang’ phamawh a salo minam kihi ngei hi. “Kei-deihna a hilo, Pa-deihna”a ci, Jesu ih liatsak mapek inzong, ei leh ei kikhuallo liang-in, midangte’ deihna a khualzaw ngiat te’n, tu panpan-in, ih lampi kheelsansan panding’ ih hiam? Makai a ut te-in, sawltaakte’ sawktaakpa, a suahkul ding ci-aa, hong hilh, a mite aa ding-in sihna, hong thuakpa, etteh lo ding ih hiam?

Na khempeuh in hun neitek mahhi. A hizong, lamhoih pen-in, kiniamkhiatna natawh thuman-thutakzonna a hihi. Tua hileh gahpha hong gahpan ding a hihi.

A beisa ngeina- hoihlo in, hong pattahna ahi’ a laklawh, a min langbaai khang(half-boiled/lukewarm generation) ah ih omkhak leh, thaasan in, kalsuankhiat ding a hita hi. Midangte phattuamna ding’ a ki piakhia khempeuh, zahtaakna ih pia hi. Stay safe! Nantal’suan (Kawlgam Martyrs’ day lungngaihna pan)