Mandalay leh Lashio kikal ah mawtaw nai 12 sung awkcip

Mandalay leh Lashio kikal ah mawtaw nai 12 sung awkcip

Kumthak tawh zumkhak ahih manin, khualzin mi tammahmah a, Mandalay leh Lashio kikal ah mawtaw nai 12 sungtak lamkal ah awkcip cih 7Day Daily pan kiza hi. Khualzinmi atam mahmah kawmkal ah Lashio panin Mandalay zuanin apai datsi apua mawtaw golpikhat siacip sawnsawn hi.

Tua datsipua mawtawpi asiattawh, khualzinmi atamluattawh kituakin December 30 zankim 12 hun akipan Lashio leh Mandalay kikal ah mawtaw awkcip kipan hi.

Tuabang in mawtaw a awkcip pen December 31 sun 12 hunpawl in ki paitheipan ahih manin, lampi tungah nai 12 sungtak mawtaw awkcip dipdep hi. Tua aki paitheih hunciang inzong Lashio lampan in atuaksuk mawtaw te ki paisak masa cihi.

Myatmandalar Htun Express Bus panin thunei khatin agenna ah Lashio leh Mandalay kikal lampi pen December 30 ni akipan kipaithei nawnlo hi. Mawtaw tamlua mahmah ahih manin, themcikcik bekin kikhinthei hi.

Tua kawmkal ah guah zusawnsawn ahih manin, nopmah mahmah hi. An zuakin hongpai te’nzong summet bawlna nuamsa mahmah uhhi. Busih leh aktuikan bekpen Ks. 1500 takin zuak uh a, leiloh phamawh ahih manin, kilei veve, nekkul vevemawk hi. Zanthapai lampi tungah giakcip in kumthak dawnding himai lodiam ci’n Muse khualam apaisawm mawtawhawl khatin genkhia hi.

Datsipua mawtaw aki bawlkhit, lampi te aki honzawkdeuh cianginzong Lashio panin apaisuk tebek ki masakzaw ahih manin, Mandalay lampanin akahto mawtaw te paitheipah tuanlo sawnsawn uhhi. December 31 nitaklam 6pm dongtak mawtaw pawlkhat awkciplai veve ciliang hi.

Hihzahliang in mawtaw tampitak a awkcipna pen datsipua mawtaw asiatna hangleh New Year khualzin atamna hangzong hisam naven, tuaban ah thukhun zuilo in utbang in ahawlgawp Driver tamlua ahih manin, hihbang apiang hi ci’n mawtawhawl pawlkhat te’n genkhia uhhi. Tua thukhun zuilo in utbang in ahawl Driver tepen December 31 zingsanglam in Traffic Police te’n liausak uh cihi.

More: Myanmar, Magway ah mawtaw pei 12 neikhat kibung in numeikhat si

Naungcho leh Kyaukme kikal, lamkiu khat Pi 150 bang athuksukna ahzong vanpua mawtawpi khat December 30 zingsanglam in kiasuk in, ahawlpa zong si cih kiza hi. Sawltak #zomidaily