Mandalay ah innteeng nasem numeikhat Acid kibuak, amit leh amai siacip

Mandalay ah innteeng nasem numeikhat Acid kibuak, amit leh amai siacip

Myanmar, Mandalay khuasung ah innteeng nasem in aom numeikhat innteekte’n Acid tawh buakin, kum 8 sungbang innsungah kemcip uh cih Eleven News pan kiza hi. Tuavai tawh kisai in innteek numei 2 zong March 1 ni in kimankhin a, thu kibawlding hi ci’n Mandalay Police te’n genkhia uhhi.

Hih bawlsiat athuak numeinu pen amin Nan May Zin Oo kici a, abeisa 2008 kumin Yuangan Myone khuaneu khatpanin Mandalay khuasung ah vanzuak saingak dingin Daw Moe Moe kici innteeknu in asap ahihi. Khakhat K10,000 piading ci’n asap uh ahihi.

Tua bangin nasemin aomlaitak, 2010 kum tuibuahpawi “Thingyan Water Festival” atun ciangin innteekte meltheih numeikhat ahi Nyi Nyi Nu Nwe akici leh alawm tetawh khuasungah vakkhia uhhi. Tuabangin avakna ah Nyi Nyi Nu Nwe ii alawmte khatin innteeng nasemnu hoihsa in, zawlthu genpihsawm cihi.

Tuaciangin Nyi Nyi Nu Nwe in diksalo in, innteeng nasemnu pen tuazawh akipan simmawh bawlgawp hi. Tuabang tengtawh khatvei innteeng nasemnu akisil laitak in Nyi Nyi Nu Nwe in Acid tui buakmawk ahih manin, nasemnu pen amaitang aveilam siacip in, amitzong aveilam khua muthei nawnlo ciliang hi.

Acid akibuahna apumpi siacipgawp, avunteng kangdeugawp in mulkimhuai mahmah hi. Nasemnu ii apa inzong atheih ciangin innteekte’n thu abawlloh nadingin thuum uh a, zatui hoihtak nabawlsakding hi ung ci’n sum tengkhat pia uhhi. Tuazawh kha 3 khitciang inzong apa kiangah sum teng 2 khakkik leuleu uh cihi.

Nasemnu pen tua Acid akibuahna aliamma tengtawh innsungah kikoihcip in, tuapen kum 4 sungbang sawt cihi.

Aliamma teng adamzawk deuhciangin inn naseptengmah semkik leuleu a, khatvei nin paidingin apailaitak tukpih citciat hi. Tuaciangin Nyi Nyi Nu Nwe akicinu hehmahmah a, nasemnu pen sawntukgawp, tuancilgawp, vok an lakah amai hensuksak, kogawp cihbangin bawlsiagawp cihi.

Tuabang kamkal ah khatvei innteekte theihlohkal in nasemnu pen taikhia simthei a, tuapan in numeilamsang kipawlna tetawh kizomkha in hihthu akitheikhia ahihi.

More: Yangon Yuzana Garden ah innteeng nasem numei kum 13 khat kibawlsia gawp

Innteeng nasemnu pen akigawm in kum 8 sungbang innpualam koimah vakkhiasaklo in, akemcip uh ahihi. Hihvai hangin Nyi Nyi Nu Nwe leh Daw Moe Moe tepen kimanpah uh a, thu kibawlding cih kiza hi. Sawltak #zomidaily