Malaysia Shopping Mall khatah Escalator pilhkhiagawp

Malaysia Shopping Mall khatah Escalator pilhkhiagawp

Malaysia gamsung aom Shopping Mall khatah setkahlei ihcidiam Escalator khat kisia in, atungphah sikpet te pilhkhiagawp cih Straits Times pan kiza hi. Hih thupiang pen tuni Tuesday (October 25) ni thupiang hi a, Pandan Kapital shopping mall sungah ahihi.

Escalator atungah akiphah sikpek Metal Plate te tampi kigawigawp in, nasemnawnlo ahih manin apuakkham aging khawngzong kiza cihi. Sunkimpawl in hih buaina apiang hi a, vanlei vanzuak aom te ahihleh kuamah sukhalo, aliam abai omlo bilbel hi.

Tuamun ah aom vanzuak in aomte genkhiatna ah hih apianmadeuh lianin vanlei in Shopping Mall ah apai mi 2 te hih Escalator tungah atuang uh hi a, tuate khenkhitdeuh in hihbang in asiagawp ci uhhi.

Amin aki genkhianuamlo vanzuak khatpa ii genna ah Shoppping Mall alaizang aom Escalators nihte lakpan khatpen hongging guapguap in ginngaih mahmah hi. Keizong bang aci hidinghiam ci’n kadelhphei a, ka etleh atung ah akiphah sikpek te kilik laulau in, pilhsuk ziahziah hi ci’n genkhia hi.

Aphatdawmna ah sun annek madiak, Lunch Break madiak ahih manin phadawm hi. Tua hikeileh sun anne in kipai ngeingai leh atungah mi adimdim in akituang datdat hi a, liammangding hi ci’n genbeh hi.

Nidang inzong abeisa kha 3 hunlaipawl in hihbangdanpian in hih Escalator siangei khin cihi. Shopping Mall ah vaisai Management te’n hihthu tawh kisai bangmah genkhianuam nailo uhhi. ZD Sawltak #zomidaily