Malaysia, Penang Market gei khatah Awle khat ki hingmat

Malaysia, Penang Market gei khatah Awle khat ki hingmat

Malaysia, Penang State sung aom Jelutong Market gei ah zanni Thursday ni in Awle khat kiman cih theStar pan kiza hi. Hih akimatma inzong Penang sungah Awle kimu cih kigenzel a, khuasungmi pawlkhat patau mahmah uhhi.

Zanni zingsanglam 6:30am hunpawl in Ipoh Lane kici lampigei aom mehteh mehgah kizuakna Vegetable Stall gei ah akimukhia ahihi. Vanzuak vanlei in apaite’n amuh uh ciangin Fire & Rescue Department te zasakpah uh a, tuapan in akimanthei ahihi.

Awle pen Meter 1 bang sau a, agikna pen 10kg bang phading ci uhhi.

Perak Road Fire Station panin uliankhat ii genkhiatna ah zingsangin khuasungmi te khatin zumah hong zasak uhhi. Tuapan in Firemen honkhat in kidelhpah a, aphual ah 7:10am hunin kitungin, Awle khat na omtakpi hi.

Tua Awle pen ahingin kimanthei a, “Penang Wildlife and National Parks Department” te kiangah ki ap thei hi ci’n genkhia hi.

Hih Awle pen koipan hongpaikhia cih ki gencian theilianlo a, agei aom Jelutong River kici luipan hong hong paikhia zong hithei, ahih keileh inn ah akikhawi ataikhia zong hithei cih thunei te’n genkhia uhhi.

Universiti Sains Malaysia panin ganhingtawh kisai pilnanei Zoologist Prof Dr Shahrul Anuar Mohd Sah ii gennna ah hih Awle pen “Saltwater Crocodile” akici te hi a, Local gammi te’n “buaya tembaga” kici hi ci’n genkhia hi. Hih Awle te ii avun pen savun Leather hoihmahmah ahih manin, kideih mahmah cihi.

Hih Awle ii agikna tawh atuat uhciangin kum 2 bang upa khinding in ummawh uhhi.

Penang Island sung aom Mati River kici luigei ahzong Awle asau simsim, Meter 2 pan Meter 3 hamtang aphading in aki ummawh khatzong kimuzelzel a, kimanzo nailo cihi.

Luigei aom khuami te’n nithum sungbang akizom in muden uh ahih manin, thunei te’n mattheih nadingin sikbawm khat sungah ak koihin thaangsiah uh a, ahi zongin tudong kimanzo nailo cihi.

More: Malaysia Shopping Mall maikhat ah Awle khat ahing in kiman

Nunglamdiak khatinzong Malaysia, Sabah State sung aom Shopping Mall maiah Awle khat kiman ngeikhin hi. Drainage and Irrigation Department thunei te’nzong tua akimuzel Awle pen tuasungteng mahah omlaiding hi ci’n genkhia uh cih kiza hi. ZD Sawltak #zomidaily