Malaysia, Negeri Sembilan State sungah mawtaw 4 kiphukha in mi 8 si, 1 liam

Malaysia, Negeri Sembilan State sung aom Jalan Bahau – Keratong lamzikpi tungah mawtaw 4 kiphukha in tuahsia ahih manin mi 8 si cih NST pan kiza hi.

Zanni Sunday sunlam in km25 Jalan Bahau – Keratong ah atuahsia hi a, asi mi 8 lakah mi 6 tepen meikuang tawh akangtum in asi uh ahihi. Hih tuahsiatna ah akihel mawtaw 4 tepen Trailer mawtawpi khat, Proton Exora, Perodua MyVi leh Toyota Vios te ahihi.

Jempol district police chief Superintendent Noorzainy Mohd Noor in agenkhiatna ah asi mi 8 banah adangzong mi 1 liam cisawnsawn hi. Police te’n asi te lakah mi 2 bek ami kuacih genkhia theipanbek uhhi.

Adang asi mi 6 tepen meikanggawp ahih manin, amel apuam kitheinawnlo a, ami kua cih genkhiattheih nadingin ahanciam laitak uh cihi.

Hih tuahsiatna apianpen zanni 2:30pm hunin akipan hi a, Trailer mawtawpi khatin Keratong pan Bahau zuanin apai laitak Motorcycle khat makhelhsawm cihi. Ahi zongin makhelhzo paklo in, tualaitak alanglam panin Perodua MyVi khattawh ki maituahlian uh ahih manin, Brake siksuk gawppah hi.

Perodua MyVi mawtaw hawlpa’n zong Trailer tawh aki maiphut khakding patau in alanglam ah ahekleh Toyota Vios khat phuphei khapah hi.

Tualaitak in Trailer mawtawpi ii anung ah Proton Exora mawtaw khat atai hi a, ahunlap in Brake sikmanlo ahih manin, Trailer mawtawpi pen taihsukpah hi.

Perodua Myvi mawtaw sungah atuang mi 2 tepen mawtawsung panin kilawnkhia in, aphual ah sipah uhhi. Aluanghawm tezong Jempol Hospital ah kipuak uhhi.

Trailer mawtawpi nungpan ataihsukkha Proton Exora sungah mi 6 atuangkhawm uh hi a, amai ah mawtawpi aphutkhak ciangin meikuanggawp hi.

Negri Sembilan Fire and Rescue Department director Norazam Khamis in agenkhiatna ah Proton Exora mawtaw pen hattak in ataihsuk hi a, mawtawpi ii anuai ah lutsuksuak cimawk hi. Mei kuanggawp sawnsawn a, atungah atuang te pen lakkhiat hamsa mahmah cihi.

Zanni hih thuthang akigelh 10:15pm hunlaitak in Proton Exora sungah atuang Passenger 3 bek ki lakhia theipan a, adang 3 asungah awkciplai cihi.

Related: Truck mawtawpi khat hangin Sengam lamzikpi tungkhat ah mawtaw kiphugawp

Trailer mawtawhawl khat hangin mawtaw 4 tak kitaihgawp a, mi 8 takin asihlawh himawk hi. Adiak in Trailer mawtaw nungah azui Proton Exora pen asungah atuangkhempeuh aguk un asi, meitawh akanglum, apumthuak dikdek uh ahihi. Tuahsiatding ciangin hibang hilek mawk hi. Sawltak #zomidaily