Malaysia Myanmar Embassy mai ah Rohingya te’n lungphona nei

Malaysia Myanmar Embassy mai ah Rohingya te’n lungphona nei

Tuni Friday 15 July nitaklam in Malaysia gamsung aom Myanmar Embassy mai ah Rohingya Refugees te leh Activists honkhat in lungphona nei uhhi. Financial Express te News suahsakna ah mi 100 valbang phading uh ci a, ahi zongin YouTube Video Clips sungah mi 300 sangin tawmzawloding hongkhat kuziahziah uhhi.

Lungphona aneihna bulpi ahihleh Kawlgam sungah Rohingya te kumpi in Kawlgammi in aciaptehloh vai mah hipipen a, tuaban ah NLD (National League for Democracy) makaipinu Daw Aung San Suu Kyi inzong Kawlgam ah minam deidanna neinawnkei tapeuh hen ci’n lungphona anei uh ahihi.

Hih lungphona aneite lakpan honkhat in Placards laisuan tawi uh a, “Dear Suu Kyi, we are all the same” ci’n mihing ciatciat akibang hihang cih lahna nei uhhi.

Tuaban ah Kawlgamsung ah Kawlbiakna Buddhist Monk Activist makaipi Ashin Wirathu ii limzong mipi lakah tawi uh a, lungsosa vive in nuigawp balgawp in bawlsiagawp uhhi. Hih Ashin Wirathu pen Kawl biakna aki khauhsak mahmahkhat hi a, Kawlgam sung aom Muslim biakna tezong a huatbawl khat ahih manin, Rohingya te’nzong nak muhdah mahmahpah uhhi.

Mipi pen lungso, lunghamsa in lungphona neizuahzuah uh a, ahi zongin kitot kiselna bel omsamlo hihtuak hi.

Anuai ah Video Clip tomno khat ki enthei dinghi…..

Lungphona avaihawm pen PAS Youth te hi a, makaite lakpan in mi 3 te Embassy sungah lutkhuan kipia hi. Tuate in lungpho mipi aitang in Embassy ulian te kiangah Petition lai pia uh a, tuasung ah Kawlgam kumpi in Kawlgamsung ah Rohingya te bawlsia nawnkei tapeuhhen cihleh amau deihteng ngetna kihel cih kiza hi.

Hih Rohingya te pen Human Rights kipawlna pawlkhat te inzong limtak in na panpih mahmah bilbel uh a, biakna kibang ahihna tawh Malaysia gammi pawlkhat inzong na panpih mahmah uhhi. ZD Sawltak #zomidaily