Malaysia Mid Valley ah leikhat kicim in 1 si, 5 liam, 1 akhe tankhiat kul

Malaysia Mid Valley ah leikhat kicim in 1 si, 5 liam, 1 akhe tankhiat kul

Malaysia, Kuala Lumpur sung Mid Valley Megamall gei ah tuni in leikhat kicim a, nasem khatpa ii akhe aphual ah tankhiatkul cih NST pan kiza hi. Tua akicim leipen mite lamkantheih nadingin lamzikpi tungah akibawl Pedestrian Bridge hi a, KL Eco City gei ah tuni nitak 3:30pm hunpawl in akicim ahihi. Aphual ah akhe akitan banah adang nasem khatzong si in, adang mi 5 zong liamgawp uh cihi.

Hih akilamsan laitak lei kicipna panin Construction nasemkhat akhe awkcip a, ami asuahtaktheih nading in aphual ah akhe tankhiat kul cimawk hi.

Tua akhe a awkcippa pen Pakistan gammi Rais Anjum kici minnei khat hi a, kum 23 aphapan khat ahihi.

A tuahsiapa ii alawmte khatin agenkhiatna ah Rais Anjum pen hih lei akicip laitak in Forklift akici khutbom mawtaw ihcihte ahawl laitak cihi. Lei kicip atheih ciangin amahzong taikhiatsawm himahleh lapzolo in a awkcipkha citciat cihi.

Lei akicip ciangin leikisia vanteng leh Forklift tengin akhe tungah vutsukkha i awkcip hi. Nai 4 sungbang a awkcip khitciangin atung ah akithuap vanteng hepkhiatdingpen giklua ahih manin ahun saupi lading cimawk hi. Tuakawmkal ah atuahsiapa pen asi tam luangkhia luata ahih manin ahonkhiading in zato pan hongpai Paramedics te’nzong cihnading theipaklo uhhi.

Anunung ah atuahsiapa asihlohding thupi cihtawh teelzawkding lampidang omlo ahih manin, akhe tatsak in honkhia uh cihi.

Akhe atankhit uhciang in Universiti Malaya Medical Centre (UMMC) ah ki puaksuak cihi.

Video Clip anuai ah asianloh hangin ki enthei hi.

More: Malaysia khuasung mawtaw Accident, mi 4 si, 1 liamgawp

Hih tuahsiatna apian laitak in Construction Workers tepen sun an ne in akhawl laitak uh hi a, akilamsan Pedestrian Bridge nuai ah akhawl uh ahihi. Adang nasem khatzong si cih kiza a, tualo nasem mi 5 zong liam ahih manin UMMC zato mahah kipuak cih kiza hi. ZD Sawltak #zomidaily