Malaysia mahmah ~ Mungpi Khupson

Malaysia ah Zomite tam mahmah ta hi ding hi, Bus leh Meileng khawng I tuan ciang Zopau zaak ding om laklak thei mawk hi. Kawlgam leh India zomah Zomite tam penpenna mun kici sam hiven lamdang lua kei e. Malaysia lamdang ka sak theihzelna nam nga ong kuipak dih ning.

1. A mihau penpente uh :
Malaysia ah a gam nei kici Malay minamte mah a hau penpen ding I sak leh na hi deklo hi. Kumpi nasep tuamtuamte bel Malay ten buplak pian uh a, ahi zongin sumbawlna lamah Sente(Chinese) pha deklo uh hi.

2010 kuma Malaysia mihau penpen top 10 enpak leng:

• 1. Robert Kuok (Chinese)
• 2. Ananda Krishnan (Indian)
• 3. Lee Shin Cheng (Chinese)
• 4. Lee Kim Hua (Chinese)
• 5. Quek Leng Chan (Chinese)
• 6. Teh Hong Piow (Chinese)
• 7. Yeoh Tiong Lay (Chinese)
• 8. Syed Mokhtar AlBukhary(Malay)
• 9. Vincent Tan (Chinese)
• 10.Tiong Hiew King (Chinese)

Top 10 ah Malay 1 kidawk zo ciamciam a, tuazong 8 na hilai! Syed Mokhtar AlBukhary leh Indian Mihau Maxis company neipa Ananda Krishnan simloh pen Sente vive hizen hi. 80% Chinese, 10% Indian, 10% Malay cihna hi!

Nung kumin (2010) Malaysia milip vekpi 28,250,500 pha a, tua lakpan 60.3% pen Malay te hi-in , 22.9% Sente(Chinese), 6.8% Kalate(Indian) ahi uh hi.

Milip vekpi lakpana 22.9% bek a pha Sente pen, Malaysia mihau penpen top 10 lakah 80% kihelzo tazen uh hiveh aw, Malaysia mahmah!

2. A laimal zat uh:
Malay pau Bahasa Melayu kici pen mihing Million 18 kiim in zang uh a, Indonesia pau tawh 80% kibang kici hi. Malaysia, Singapore, Brunei, Indonesia leh Thailand gamte ah kizang hi.

Malay ten amau aituam laimal nei ngeilo hih tuak a, amau gam a uk kumpite laimal zui ziauziau uh hi leh kilawm hi. Malay pau tawh laigelh a kikan thei lakpan a lui penpen in Sumatra tuikulh ah Kala kumpipa Srivijaya in AD 683-6 lai a a zat laimal (Indian script kici ziau Sanskrit hi maithei) ahi hi.

Kum zalom 14 hun lai-in Islam uk kumpi in Southeast Asia hong nawksukin Malay gam zong uk a, tua hun a kipan Malay pau pen Arabic laimal modify ‘Jawi’ kici tawh hong gelh uh hi. Tudong mahin a zang om kiukiu lai hi.

Kum zalom 17 kipat tuung panin Dutch, Portuguese leh British uk kumpi hong laang leuleuin Malay laigelh zia hong laihkik uh hi. ‘Rumi’ kici Latin laimal zui-in gelh uh a, tuapen tudonga zatpipen uh official writing system hong suak hi. Malaysia kumpi in Malay subject tawh laivuan peuhmah ‘Rumi’ leh ‘Jawi’ khatzawzaw zat phalsak hi. Ahi zongin tu-a a laimal zatuh en zong I simpih theih ‘Rumi’ pen Malaysia official writing system kici hi.

A lamdang mahmah khat pen Malay ten namdang pau tampitak pen Rumi lai tawh gelhin Malay pau suaksak ziauziau uh hi. Pawlkhat en pak lehang:

• aksi – action (Dutch actie)
• buku – book (English)
• ekonomik – economic (english)
• farmasi – pharmacy (english)
• guru – teacher (Sanskrit)
• kamus – dictionary (Arabic qāmūs)
• kapal – ship (Tamil kappal)
• katil – bed (Tamil kattil)
• kaunter – counter ( English)
• keju – cheese ( Portuguese queijo)
• kereta – carriage, car (Portuguese carreta)
• kuda – horse (Hindi kudh)
• limau – lemon (Portuguese limão)
• putera – prince (Sanskrit putra)
• roti – bread (Sanskrit roṭi)
• sabun – soap (Arabic)
• seksyen – section (english)
• tarikh – date (Arabic tārīkh)
• teh – tea (Hokkien tɛ)
• tuala – towel (Portuguese toalha)

Operasi a cihcih uh zong bangdang hilo operation cihna na hi leldih! Damlohna hang tawh Clinic na zon leh na mu kei ding a, Klinik bek na mu ding hi! Malaysia mahmah!!

3. Gam nihna! :
Third world leh Third country kibanglo hi cih phawk masa leng.

Third world kicici bang hi peuhmah hiam en masa leng. Cold war (1946 – 1991) hun lai-in leitung gam tuamtuam pen nam thumin na khen uh hi:

• I) First world : USA leh a pawlpih capitalist gam leh NATO gam genna hi.
• II) Second world: USSR, China leh a pawlpih Communist gamte.
• III) Third world : USA leh USSR lampanglo neutral gamteng genna hi. Africa, South America, India leh South East Asia gam cihte pawl , a genthei deuh teng.

Gam thumna I cihcih, third country bel tellua hang maw! Gen veve dih ni:

• I) First Country : Gam khatna pen I suahna gam Myanmar cihna hi.
• II) Second Country : Gam nihna I cih tak ciang Galtaite ki-hut pakna gamte. Resettlement ngakna mun/ Refugee kisiauh(process)na gamte I cimai diam. Malaysia, India, Thailand cih bang.
• III) Third Country : Gam thumna I cih takteh I pianna gam nusia-a gam dang khat peuhpeuh teenna dinga I zuatna gam. Ahih kei leh zong galtaite teensuak theihna gam cipak mai ni. Refugee lampan en leng USA, Canada, Norway, Australia, New Zealand cihte pawl.

A lamdang mahmah khat pen Zomi galtai tamzawte ki-hutpakna gam pen, Galtaite saanna leh galtaite kepzia ding tawh kisai leitungbup in thukhun a bawl 1951 Refugee Convention ah suai a kai kilkello Malaysia gam hi citciat hi. Galtaite a ut bangbangun bawlthei cihna hi. Ahi zongin Pasian hehpihna I ci diam, Malaysia kumpi in UNHCR card tawi peuhmah man nawnlo-in, Cidamna (Medical) leh siamsinna (education) lamah zong a kum a kumin galtaite tungah hong kihawng semsem uh hi. Nidangin UNHCR card tawh nasep khuan kipia lo a, tuhun ciangin ahih leh tua card mah tawh nasep pawlkhat kisem ziahziah thei ta cileng I khial kei ding hi. Kumpi zato te ah UNHCR card tawi peuhmah 50% discount kipia-in, nidanga galtaite neih theih loh bank account kinei thei ta a, debit card tawh sum kikoihin kithoh thei ta hi. Siamsinna lamah zong College pawlkhat pan professional course tuamtuam kisin thei ta hi.

Tukumin (2011) Malaysia ah Galtai UNHCR registered (Refugee & Asylum seeker) 90,000 kiim om a, tua lakpan 92% pen Myanmar pan hi in: Chin, Kachin, Mon leh Rohingya mi tam pen hi. (Kawlgam pan Chin State pan tampen a, Chin State pan Tedim kampau Zomite a tampente lakah kihel hi!) A dang 8% pen Afghanistan, Iraq, Somalia leh Sri Lanka gam pan ahi uh hi.

Tua hi in, Zomi tampite adinga gam nihna hong suak, 1951 Refugee Convention signatory a hi ngeilo gam khat pen Rev. Pau Khai kammal kawm pak leng Canaan(Gam thumna) I tun theihna dinga I giahphual Gilgal(Gam nihna) hong suak laizang hi! Malaysia mahmah!!

4. Khuahun:
Malaysia pen I theihsa mah bangin a tuk a khalin khua lum den hi. A khuahun pen mikangte pau leh Tropical Rainforest climate kici a, Southwest Monsoon ( May – September) leh Northeast Monsoon (November – March) hunin guahtui ngah den hi. Khua lumna pen 23°C – 35°C kikal khawng hi den hi.

Malaysia ka tun cillam pen innlam ah phalbi laitak a hi a, lungdambawl tawh hong kituakto pah hi. Khuahun lah vot cih thadah lum semsem hiam cih dingin hong om hi. December 24 zan hong hih taktak ciang bel, lungsim ah Betlen bawngkuang hong suak valvalin, puan lum theithei silha zan khuadam nuaiah zanvak(carol) lai khawng hong kilang ziahziah hi. Ei lah pangka nuaiah khua-ul kaisa’n ki-om heihai mawk in, I mang khawng tawh hong kibang keei mai hi! Guai, lungdambawl I cih zong phalbi lo tawh bel hong duplicate pian mahmah mawk hi ei! Phalbi ciamkha ngei kiuhkeuh lo mi hizah omna Malaysia mahmah!!

5. Tukpeng :
A diakin English Premiere League leh Champions League live telecast pen kilim et mahmah hi. Ninoni zan leh Nipini zan pen ansai teng khempeuh phialah EPL live kisuaksakin, sai neiten meetpih tuam mahmah hi. 2009 Champions League Final Manchester United vs Barcelona pen Kuala Lumpur gei Hartamas food court naiah ka sep laitak hi in Foot court mai ah MU jersey, Barca jersey leh vuvuzela (South Africa world cup lai kinak mut mahmahte) kizuak zihziah hi. Mipi tam dan bel a phuala et mahmah tawh kibang keei mai hi. Ku keei, awng keei mai uh hi. Zomite tukpeng uuk mahmah ka cih leh Malayte’ kiban nai deksuailo aive!

Mipi in EPL kinbawl uh a hih manin Sumbawlten zong, a company uh minthanna dingin limzat pah uh hi. I thei dinga tukum English Premiere League club nih Aston Villa leh Queens Park Rangers te puan(jersey) pen Malaysia Company te’ sponsor ahi hi. Aston Villa jersey maia Genting kici pen Malaysia Company Genting Groups cihna ahi hi. QPR Club pen Malaysia mihau AirAsia neipa Tan Sri Tony Fernandes in 66% a leisa na hi leuleu zela, Malaysia Airlines leh Air Asia in QPR jersey sponsor uh hi.

Kumsimin EPL club lianten Malaysia pha den uh hi. Tukum mahmahin zong Chelsea, Liverpool leh Arsenal ten pha uh a, Malaysia XI tawh a kisuihna uh leitunga tukpeng tualpi golpenpen giatna Bukit Jalil tualpi ah a en dim zihziah bek hi.

Hizaha tukpeng uuk gam, tualpi minthang Bukit Jalil a nei Malaysia pen tu tadih World Cup ah kihelzo nai tuanlo a, AFC Asian Cup ah thumvei bek kihelzo panin (AFC Headquarters Kuala Lumpur hi napi), tulaitak FIFA World ranking ah 147 na pek na hi sawnsawn hi (India 163, Myanmar 168). Ei mah banga a suih sang a gen siamzaw a hihna mel uh! Malaysia mahmah!!

Mungpi Khupson
2011-10-05