Malaysia KLIA2 vanlengtual sung guza aom khakding siansuahna kineiding

Malaysia KLIA2 vanlengtual sung guza aom khakding siansuahna kineiding

North Korea gammi khat ahi Kim Jong Nam pen abeisa Feb 13 ni in Malaysia Kuala Lumpur International Airport 2 (KLIA2) sungah ki suamlum hi. Numei 2 in amai ah guza tatsak in tuatawh asi ahihi. Tua guza azat uhpen “VX nerve agent” kici Chemical Weapon namkhat hi a, leitung mihing te bawlkhiat Chemical Weapon lakah alauhuai penpen khatin akiciamteh ahihi.

Kim Jong Nam ii amai ah guza atatsak numei nihte pen Indonesian numei khatleh Vietnamese numei khat hi a, tua guza hangtawh Kim Jong Nam pen asawtlo in sipah hi. Hih “VX nerve agent” kici Chemical Weapon pen pumpisung, sa sungah alutkhak nakleh sihloh phamawh cimawk hi.

Hih guza atatsak numei tegel pen Airport CCTV panin aki etkik ciangin dailenbuk Restroom ah lutmasa uh a, akhuttawh guza tawi in Kim Jong Nam ii amai ah atatsak ahih manin, akhut silsiangphot hiding kici hi. Khuttuam zangin amai ah atatsak hi cihzong kiza hi.

Ahi zongin tua numei te lakah khatpen hih guza Effect thuakkha ahih manin a cinatlawhta a, lualua (Vomit) hi ci’n Palik thuneipipa Khalid Abud Bakar in genkhia hi. Reporters te’n adotna tungtawn in adawnkikpak hi a, ahi zongin akician in aneng atawi bangmah genbehna neilo hi.

KLIA2 Airport sungah hih gu aneng acianlaiding ki patau mahmah ahih manin “Radiation and Nuclear Safety Authority” te’n “VX nerve agent” aomlai khakding siansuahna neiding uh cihi. Ahi zongin mipi te adingin KLIA2 vanlengtual pen bangmah patauhding omlo ci uhhi. (Ahi zongin paikhakloh mah hoihpen zawleh kilawm hi)

Hih “VX nerve agent” kici gu pen lauhuailua mahmah a, “Chemical Weapons Convention” te’n Chemical Weapon khatin aciapteh uh ahihi. 1993 kum ciangin hih “VX nerve agent” pen ki khamcipta hi.

Palik bupa in agenna ah tua numei nihte in Kim Jong Nam ii amai atatsakna munteng ah athemneng omlai khathei ahih manin, ki lungkham mahmah cihi. Hih Chemical Weapon vai ah Police te ii kivakna hilo ahih manin, Atomic Energy Licensing Board te ki sitcian sakding ci’n Press Conference ah genkhia hi.

Tuaban ah hih “VX nerve agent” pen Malaysia gamsung ah bangci bangin hongtungthei, honglutthei cihpen limtak in kankhia laiding uh cihzong genkhia hi. Ahi zongin themneng cilik hongki pua ahihleh kankhiatding, Detect ding hamsa mahmahding cihzong genkhia hi.

Mihing te vunsung ah hih “VX nerve agent” kici Chemical Weapon pen 10mg bekbek lutkhalehzong sihlawh pahlian cimawk hi. Tua hangin United Nations in hih guza pen “weapon of mass destruction” ci’n mipi alom atang in sihsak theihna galvanzat khatin na ciamteh uhhi.

Chemical Weapons Convention inzong Research bawlnading ahih keileh Medical or Pharmaceutical Purposes khatpeuh ahihkei buangleh zatding akhamcipsa uh ahihi.

Inspector-General of Police Tan Sri Khalid Abu Bakar inbel KLIA2 pen mipi adingin lauhuailo “The public, however, has been assured that the airport is safe.” ci’n genkhia cipongmawk hi. Mi adingin lauhuai keileh kua adingin lauhuaiding hiam? Bangbang hileh KLIA2 pen nawkvet keileh ahoihzaw tam? Akhuanung ah buaina, sihna aom khitciang “Sorry” mahmah ei hongki cihziauding lauhuai hi.

Note: Ki lauthawng sakna, ki patauh sakna hizenzenlo a, mimal in a lauhuaidiam cih ngaihsutding hizaw hi. President Donald Trump in Refugee vai agenkhiatkhawng, Zomi te theihding deihsakna tawh huntampi bei in Zolai tawh letkhia in pulak khialeng pawlkhat in “mipi lungkhamsaklel” peuh hong cihsan nilnel thei uhhi.

Tua thute, hih thute Zolai in ihlet khiakei zongin Manglai in leitungbup in asimden uh ahihi. Leitung in atheih thuthang khatpen Zomi te’nzong atheihding kisam nasahiam? Lungdam! ZD Sawltak #zomidaily