Malaysia Kepong ah innkhat meikanggawp in mi 3 in sihlawh

Malaysia Kepong ah innkhat meikanggawp in mi 3 in sihlawh

Malaysia, Kepong vengsung aom Taman Wangsa Permai ah Monday zanlamin innkhat meikang a, mi 3 si cih theStar pan kiza hi. Shamsul Ng Abdullah kici kum 59 aphakhin inntekpa ii genna ah amahpen inntungdawl ah TV en in aomlaitak, agingpam khat kaza cihi. Malaysia gamsung ah losan “Firecrackers” pen utbangbang, ut hunhun in kilawn ziauziau ahih manin, Firecrackers kihalpeuh hilel inteh ci’n thudonpaklo hi.

Tuazawh asawtlo in innnuai lengnakhan Living Room panin meikang ahihlam phawksan a, tuaciangin meikuang pen innsung tengah kizel gawpta hi.

Inntekpa zong amalupna anunglam aom atate lupnalam apaipheisawm ciangin meikhu nasialua ahih manin, lutphei theilo hi. Atate ahotkhiat theih nading lampi omvetlo ahih manin, amahzong cihnadangding theilo ahih manin, amahbeek asuahtak khakleh ci’n innmai Balcony panin lengkhia hi. Alenkhaitna panin liamna pawlkhat ngah a, amaleh amah anuntaknabel ki honkhiazo hi.

Ahi zongin innnunglam ah aom 3 te in hih meikatna hangin sihlawh uhhi. Tuatepen Lam Yan Yi kici kum 7 bek aphapan ahi atanu, Ng Sze Xuan kici kum 10 bek aphapan atunu leh Sok Srey kici kum 29 aphakhin anasemnu uh ahihi. Tua anasemnu uhpen Cambodia gammi hi a, inntengding, Maid nasemdingin alak uh ahihi. Tuateng thum in sihlawhmawk uhhi.

Innnuai ahzong kum 81 aphakhin anu uh aom hi a, azi in innnunglam kongkhak panin nakaikhiaman ahih manin, ki honkhiazo bilbel hi. Azi pen kum 37 aphakhin Lam Chooi Lai kici a, apualam panin inn aciahlaitak tawh kituak in, ateeknu na honkhiathei hi.

Meiphelh makai Firefighter Mohamed Sabri ii genna ah meiphelhding in avengte Balcony panin kalutphei uh cihi. Innsung aluttheih uhciangin lupnakhan lutna Doorway ah mi 3 atuaksa in mukhia uhhi. Tua 3 tepen apumpi tungah meikatna bangmah omlo a, ahi zongin meikhu tawh huih dikzolo in, husam in sibup uhhi.

Thunei te’n amanlang in Sungai Buloh Hospital ah paipih uh himahleh athum un siveve uhhi.

Three die after being trapped in Kepong house fire

Selangor Fire and Rescue Department panin thunei te genna ah hih meikang pen lengnakhan Living Room pan akipan hiding ci uhhi. Tuciangciang aki muhkhiatna ah Electrical Fire hiding ci uh a, ahi zongin akicianzaw in kanbeh laiding uh cihi.

More: Malaysia, Subang Jaya ah innkhat meikanggawp in mi 4 si

Nungkal Monday ni inzong Subang Jaya ah innkhat meikang in mi 4 takin sihlawh uhhi. Tuatawh meikatdan aomzia kibang khading ci’n thunei te’n genkhia uhhi. Electric mei bangzah in lauhuai, koici bangin meikang piangsakthei cih mipi te theihsakding kisam mahmah cihi. Selangor sungbekbek ah kalkhat sungin meikang nihveitak ommawk a, mi 7 takin sihlawhmawk uhhi. ZD Sawltak #zomidaily