Malaysia in Refugee te hamphatna pia hen

Malaysia in Refugee te hamphatna pia hen

Suhakam akici Human Rights tawh kisai kipawlna lian khat in a genna ah “Gambel galtai Refugee te pen Malaysia kumpi in a ginakep lohna hangin simmawh bawlsiat thuak in mi tampi in a ut bangin van zat in zangh uh hi” ci hi. Suhakam kipawlna in thugenpi in azat uh ahi Datuk Dr. Khaw Lake Tee in zong nung Thursday thukikupna sungah hibangin gen hi “Refugee te pen Malaysia kumpi in theihpihna a neih loh manin mite nuaiah panpih kisam in om den uh hi. Tua ahih manin Malaysia kumpi in Refugee te a buaipih phadiak UNHCR tawh kizopna limtak bawl henla Refugee te haksatna khiapsak ding hanciampih uh hen” ci hi.

Dr. Tee in Malaysia kumpi leh UNHCR pen Refugee te phattuamna ding na a sem khawm dingin ngetna bawl hi. “2012-2015 kikaal sungah refugee te lampan lungkimlohna lai 129 val ngah khin ungh. Hih lungkimlohna a tamzaw pen damloh vai, sangkah theihloh vai leh nasep theihloh vai hipi pen hi.

Adiak in natna lian tawh zatopi a tungte in sumbei zah pia zolo uh ahih manun sumlepaai tawh huhna ko khiangah hong ngen tam mahmah khin uh hi. 50% Discount pen om teinapi Refugee Card neite bekin tua hamphatna ngah uh a, adang Asylum-seeker card nei te’n bangmah hamphatna ngah tuanlouh hi. Tua ahih manin UN Thukimna 1951 leh 1967 te sungah Malaysia in min athuhse loh hangin Malaysia gam sunga Refugee te hamsatna theihpih henla a kisap uh hamphatna pia uh hen” ci hi.

Tuaban ah hibangin Dr. Tee in gen beh lai hi. “Tukum October 2 ni-in Malaysia kumpipa in UNO innpi New York ah thugen a Syrian galtai mi 3000 val ko gam in ka la ding uh a, cidamna lam leh sangkahna lamah hamphatna ka pia ding uh a, nasep zong ka guan ding uh hi ci in gen hi. Hibang huhna pen Syrian Refugee te tung bekah pia kei henla Malaysia sunga Refugee om khempeuhte tungah a kibangin hamphatna pia hen” ci in gen hi. Source : www.thestar.com.my  ZAM iNFO