Malaysia huhna tembaw Kawlgam ah luttheih nadingin phalna kipiata

Malaysia huhna tembaw Kawlgam ah luttheih nadingin phalna kipiata

Malaysia kumpi te’n Kawlgam, Rakhine State sung aom Rohingya Community te huhna pianuam in akipeipei uh hi a, tuni petpet ciangin Myanmar Government in huhna piaktheih nading phalna piata cihthu NST pan kiza hi. Kawlgam aom Rohingya Community te adingin nektheih tuamtuam Food Flotilla ci’n tembaw tawh Malaysia pan apuaksawm uh ahihi.

Malaysia kumpi te’n amau lunggulhna ahihleh Rakhine State, Sittew khua dongah tembaw tawh vapuakding cih lunggulhna anei uh hi a, ahi zongin lauhuaina tuamtuam om ahih manin, Sittew khuadong ah apaiding uh Kawlkumpi in phallo a, Yangon ciangbek paitheiding cihi.

Hihvai tawh kisai Malaysian Ambassador to Myanmar asemlaitak ahi Mohd Haniff Abd Rahman in tuni in agenkhiat hi a, Myanmar Humanitarian Mission sepding vaitawh kisai Kawlkumpi thunei te’n kamtawh phalna (Verbal Agreements) hongpiata ci’n genkhia hi. Tuni Malaysian Delegation leh Myanmar Representatives te ki muhkhopna panin ki thukimna angahthei uh kici hi.

Hih Malaysia pan tembaw tawh apuaksawm uh Humanitarian Mission pen huhna vantuamtuam akigawm in Tone 1000 val pha cihi. Humanitarian Mission makai te ii ngetna ahi Sittwe khua dongah paidingpen lauhuai ahih manin, Yangon ciangbek Malaysia tembaw te’n puaktheiding cihi.

Tuni pen kamtawh thukimna akinei hiphot a, amanlang in laitawh thukimna (Written Agreements) aki ngahthei mengmengding in kilamen cih Mohd Haniff in genkhia a, geelnasa bang ahihleh February 03 ni in huhna piak kipanding uh cihi.

Malaysian Ambassador to Myanmar Mohd Haniff tawh kimuhkhopna ah Kyaw Moe Tun (Director-General of Myanmar’s International Organisations and Economic Department) leh Dr Win Myat Aye (Myanmar’s Minister for Social Welfare, Relief and Resettlement) te kihel uhhi. ZD Sawltak #zomidaily