Malaysia gulmatsiam aminthang mahmahkhat gul tukin si

Malaysia gulmatsiam aminthang mahmahkhat gul tukin si

Malaysia gamsung ah gulmatsiam in aminthang mahmah “famous Malaysian snake whisperer” akici khat gul in tukha ahih manin si cih local media tuamtuampan kiza hi. Tuapa minpen Abu Zarin Hussin kici a, kum 33 aphakhin khat ahihi.

Abeisa Monday ni in Bentong ah sokval (cobra) gulkhat amatsawm laitak in tukha ahih manin, zato ah kipuak hi. Tua gul ii tukkhakna liamna tawh zanni Friday ni in sita hi.

Tuapa pen gulmat asiam mahmahkhat hi a, meiphelh Firefighter khatzong ahihi.

Selangor Fire and Rescue Department Assistant Director of Operation Mohd Sani Harul confirmed Abu Zarin in agenkhiatna ah tuapa pen abeisa Monday nitaklam 7:54pm hunpawl in Bentong ah Cobra gulkhatin natukha hi. Sultan Haji Ahmad Shah Hospital ah kipuak in, zatui kibawl himahleh hong nusiata hi ci’n genkhia hi.

Abu Zarin Hussin pen Temerloh Fire Station ah asemkhat ahihi. Gulmatsiam in gultawh akithuahna Video tampi Internet Portal tungah kithehzak ahih manin, leitung tuamtuam inzong atheih mahmahkhat ahihi. British tabloids ahi Daily Mirror leh Daily Mail cihte’nzong amathu suaksak ngei uh ahih manin, leitung gamtampi in atheihlawhkhat ahihi.

Malaysia gamsung ah gul matding khatpeuh aom ciangin meiphelh Firefighter te kizasak tangtang ahih manin, Abu Zarin Hussin inzong Firefighter te gul bangci matding cih Training Class tuamtuam apiazel khat ahihi.

Tuabangin Training apiak ciangin gulpen namtuamtuam aom mahbangin tua gulte ii agu akhauhdan zong kibanglo hi. Tua gulte pen thahlup kullo in, ahingin bangci matding, gul in hongtukloh nadingin bangci kidopding cihte ahilh zelzelkhat ahihi.

Gul matzia, gul tawh kimawlzia siamna aneikhat ahih manin Asia’s Got Talent te ii Television Program ahzong Quarter Final dong aki helngeikhat ahihi.

Abu Zarin Hussin pen gulmatsiam ahih hangin abeisa inzong gul in tu ngeikhin hi. 2015 kum sungin Cobra gulvom khatin tu ngei a, ni 2 sungbang khuaphawklo in lumcip ngeihi.

More: Gul it mahmahkhat agulkhawisa in viallum

Bentong Operation ah gul mandingin akithawi laitak in Cobra gul khatin natukhakik ahih manin, tua liamma tawh asihlawh ahihi. Abu Zarin Hussin ii aluanghawm pen apianna Hometown ahi Kelantan, Pasir Putih, Kampung Permatang Gading ah kipuak in kivui khinta cih kiza hi. Gul matsiam te, gul tukmah in sithei veve uhhi….. Sawltak #zomidaily