Malaysia gamsung ah IS tawh akizom mi 3 kiman leuleu

Malaysia gamsung ah IS tawh akizom mi 3 kiman leuleu

Malaysia gamsung ah IS migilo tetawh akizom mi 3 kiman leuleu cih theSun pan kiza hi. Tua akiman te lakah mi 2 pen Security Guards nasep asem ahihi. Security Guard khatpa ii nasepna pen Airport Security Company tetawh asem cihi.

Hih Security Guard asemte pen “Federal Special Branch’s counter-terrorism unit” cihte in Friday ni in Kuantan ah amat uh hi a, Air Gun leh Shotgun kici thau namnih zongtawh mankhawm uhhi.

Tuni Malaysia Inspector-General of Police Tan Sri Khalid Abu Bakar kici ulianpa in genkhiatna ah akimante lakpan in Security Guard asem khatpa pen Malaysia Airports Berhad (MAB) te kiangah asem cihi. Kum 37 phakhinta a, amahpen Indonesia gammi hi in, Malaysia gamsung ah PR (Permanent Residence) Status tawh aom cihi.

Hihpa pen 2013 kum in Turkey gamah vanzin a, Syria gamsung aom IS sungah makai khattawh kizom uh cihi. Tua akizoppih IS makaipa zong Malaysia gammi mah hi a, Syria gamsung ah aomcip ahihi.

Hihpa pen Syria gamlam zuanin azi tawh azinkhiatsawm hi a, azinkhiatma in kumpi thunei te’n amankhia uh ahihi.

Nung Friday ni mahin adang Security Guard khatzong kiman a, tuapapen kum 38 phakhin cihi. Amahpen Private Company khat ahi Security Guard nasep asemmah ahihi. Hihpa zong Syria gam zuanin azinkhiatsawm mah hi a, Syria gamsung aom Malaysia galkap tetawh aki thuahsawm ahihi.

Adangkhat akimanpa pen nasep kician neilianlo a, amahpen nung Sunday ni in akiman ahihi. Amahzong IS Member khatmah hi a, abeisa hunsung ahzong Negri Sembilan Mufti Department te kiangah Bomb Threat lauthawngsakna abawlngei khinkhat cihi.

More: USA gamsung aom Zomi te kidophuai ~ Khawm Pau

Hihpa akimatma ninih akisap hunlai in Facebook tungah lai gelhkhia a, muntuamtuam ah Bomb ka puakkhamsakding cih vauna lai honkhat gelhkhia cihi. Hih mi 3 tepen “anti-terrorism laws” thukhuntawh kizui in akiman hi a, amau ii gamtatna te kumpi thunei te’n dotcianna leh kancianna neilaiding uh cih kiza hi. ZD Sawltak #zomidaily