Malaysia gamsung ah Bomb asukkhapsawm IS tawh akizom mi 7 kiman

Malaysia gamsung ah Bomb asukkhapsawm IS tawh akizom mi 7 kiman

Malaysia, Klang Valley sungah hiamtawi migilo Terror Group tetawh akizom mi 7 kiman cih theStar pan kiza hi. Tua akiman mi 7 telak ah mi 4 pen Yemen gammi ahi uhhi. Hih akiman migilo tepen February 21 panin February 26 kikal Klang Valley sung muntuamtuam ah “Bukit Aman Special Branch Counter Terrorism Division” te ii matkhiat ahi uhhi.

Aki mi 7 te lakpan Yemen gammi 4, Malaysia gammi 1, Indonesia gammi 1, East Asian gammi 1 cihbang in palik te’n pulakkhia uhhi. “Inspector-General of Police Tan Sri Khalid Abu Bakar” in agenna ah Malaysia gammi papen Factory Technician hi a, Indonesia gammi papen lokhomi khat hi in, hihtegel Kepong vengsungpan February 21 ni in aki mankhia cihi.

Syria gamsung ah IS makai asem laitak Malaysia gammi khat om a, tuapa minpen Mohamad Wanndy Mohamad Jedi ahihi. Mohamad Wanndy in hih akiman mi 2 tepen khutzatin nei a, Malaysia gamsung ah ngongtatna, puakkhap sakna neiding in asawl khitsa ahihi.

Malaysia gamsung ah mawtaw tungtawn in puakkhapna abawlding “Vehicle-Borne Improvised Explosive Device (VBIED)” in akisawlkhin uh ci a, tua asep khitciangin Syria ah pai in IS tetawh kizomding cih sawlna angah uh cimawk hi. VBIED cihpen Technical Term khat hi a, Car Bomb ahih keileh Truck Bomb cihna ahihi.

East Asian gammi acihpa pen February 23 ni in akiman ahihi. Hihpa zong Malaysia gamsung ah 2011 kumin alut hi a, alutcil in Student Visa tawh alut ahihi. Tua Student Visa zong atuh (Fake) hiding in ki ummawh hi. Malaysia gamsung alut khitciangin Klang Valley sung aom pilsinna sanginn Public Institution khatah sangkah in aom ahihi.

East Asian Terror Group tetawh kizom in Malaysia gampen Transit Point in zangin avaikhawm khat ahihi.

Syria gamsung ah IS tetawh kipawlding, IS galkap tumding in alunglut te apaitheih nadingin avaihawmpi, athusapi khat cimawk hi.

Adang Yemen gammi 4 tepen February 26 ni in Cyberjaya ah aki mankhia uh ahihi. Hih mi 4 tepen Yemen gamsung ah buaina apiangsak thautawi tetawh akizom hiding in ki ummawh hi. Tuaban ah hih 4 tengpen Syria gamah galkaptum nuamte apaitheih nadingin Travel Documents atuh bawllamsang ah mawhpuak ala te uh ahihi.

Migilo tetawh akizom mi 7 amatban ah International Passports tuamtuam honkhat, Malaysia sum RM270,000 manneiding sumtuamtuam cihbangteng mankhia uhhi.

More: Indonesia, Bandung City ah Bomb puakkham in khuasung buaigawp

Ahunlap in Malaysia Police te’n namankhia theizel uh ahih manin, phadawm hi. Nungdiak February 27 ni inzong Indonesia gamsung ah IS tetawh akizom migilo te’n Bomb sukham uh ahih manin, buai ngeingai uhhi. Philippines gamsung aom IS tetawh akizom Abu Sayyaf kici migilo te’nzong Germany gammi khat a ngawng tansakziau mawk uhhi. ZD Sawltak #zomidaily