Malaysia gambup ah nupi kum atampen in aki ciamteh kum 128 aphakhat sita

Malaysia gambup ah nupi kum atampen in aki ciamteh kum 128 aphakhat sita

Malaysia gambup numei khempeuh lakah akum atampenpen in akiciamteh nupipen zanni Thursday ni in sita cih theStar pan kiza hi. Tua nupinu minpen Safiah Ujang kici a, kum 128 tak anungta ahihi.

Seremban, Rembau sung aom Kg Seberang Batu Hampar ama innzang mahah Thursday ni in asi ahihi. Safiah Ujang pen Identity Card tungah aki ciaptehna ah asuahni pen 11 February 1889 hi a, kumtam luata “Natural Causes” tawh Thursday sunlam 1pm hunpawl in asi ahihi.

Palik ulian thunei Rembau OCPD DSP Ibrahim Sharif in agenkhiatna ah Thursday ni in Safiah Ujang sita cih Report hongki zasak hi ci’n genkhia hi.

Thursday sunlam mahin tua khuasung ii hanzat Muslim Cemetery ah Asar Prayer aki neihkhit ciangin kivui suakpah hi.

Palik thuneipa genbehna ah Safiah Ujang pen abeisa tawlkhatsung damlo in, antak zong hoihtakin netheilo ahih manin, damdam in atha beisemsem in kiamsuksuk cihi.

Safiah Ujang in tapa khat nei in, atapa zong kum 74 phakhinta hi. Tu zong 6 nei in, tusawn pen 30 bang amukha nupi hampha khat ahihi.

Malaysia gambup ii “oldest woman” akum atampenpen nupi in aki ciamteh hi a, kum 128 tak anungta ahihi. Tuhun ciangin kum hizahzah anungtading pen hamsa mahmah tamawk hi.

More: Leitung ah akum tampen in akiciamteh kum 117 apha piteeknu sita

Tukum abeisa April khasung inzong leitung in kum atampenpen in aciahteh nupi khat si ci’n Italian Media te’n genkhia uhhi. Tua nupinu minpen Emma Morano kici a, asih in kum 117 bek ahihi. Italy, Verbania City sungah ateeng khat ahihi. Emma Morano pen leitung mihing khempeuh lakah akum atampenpen “World’s Oldest Person” ci’n aki ciamteh ahihi. Tua aciamteh te’n hih Malaysia nupinu aomlam theikhalo uh hiding hi 🙂 Kum tampi anungta in akigen Japan gammi te sungahzong kum 128 taktak anungta pen ki tamzak mello hi. Nuntak hamsatna, neklehdawn kicinlohna Zogam bang phadiak ah kum tampipi ki nungtalo phadiak tawh kibang hi. Sawltak #zomidaily