Malaysia aom Zomi pihte panpihna MMK 9151000 kipia

Malaysia aom Zomi pihte panpihna MMK 9151000 kipia

Tulaitak COVID-19 natna hangin Leitungbup phial buaina kituak kawikawi a, Malaysia om Zomi innkuan 1500 val aki om lakah nasep theih nawnlo na hangin innsap piakding haksatna a tuak inn 500 kiim bang om hi. Tuate ading Tedim Khuapi pan panpih theih nading kigel a, kha khat innsap man ding ci-in kipawlna tuamtuam pan sum a kikaikhawm tuni ciang ngahzah 9,151,000 Kyats apna May 24, 2020 ni Nitaklam nai 3:00PM hunin ZCD zumah kineithei hi, cih thu kiza hi.

Hih sum ki apna ah Vuanzi Pu Pau Lun Min Thang leh MP Pu Gin Kam Lian te hong kihel thei uh a, Pu Pau Lun in a thugenna ah:

“Ei Zomi te pen Hawmsiam nungta nebum puksi cih paunak i neih tei hangin tuhun ah na khat peuhpeuh i hawm liailiai loh hong sawt simpian ta himah leh hih COVID-19 in Zomite hong phonglo in neihman lamman hi hetlo itna lahna in hihbang i gel pen etlawm mahmah hi” ci-in gen hi.

Pu Kam Lian in “Hi bangin khangnote makai in nasep khop pen thupi mahmah a, mailam ah zong Zomi Zogam ading in deidan omlo a ma ih pan khop tohtoh lai ding kisam hi,” ci-in gen hi.

Covid-19 Emergency Committee-Tedim CSOs pan Pa Thawn Sian Tung in Gamdang a haksatna tuahzia leh innlam a haksatna tuahzia akibatloh dan gencianna hong nei in, panpihna sumte Zomi Association of Malaysia(ZAM)tungah amanlang thei pen kikhak ding cih zong kiza hi.

Tulaitak Malaysia gamah Zomi mimal 20,000 kiim bang om cihzong ZAM tungtawn in kiza hi. Huhna sum ngahna pen anuai abangin kiciamteh hi.

• 1. Covid-19 Emergency Response Committee – 500000.00.
• 2. Ciin Deih Lun (China) – 378000.00.
• 3. Leilum veng – 573000.00.
• 4. ZCRC, Kalaymyo – 1100000.00.
• 5. Zomi Congress for Democracy (ZCD) – 6050000.00.
• 6. Sakollam Baptist Church – 200000.00.
• 7. Sakollam RC – 200000.00.
• 8. SDA (Mission), Sakollam – 50000.00.
• 9. SDA (Mission, Myoma – 50000.00.
• 10. Leitawhtan EBC – 50000.00.

The Tedim Post