Malaysia aom UNHCR in Card mawkpiaknawn keihen!

Malaysia aom UNHCR in Card mawkpiaknawn keihen!

Malaysian Government kumpi phalna omlopi in Malaysia gamsung aom UNHCR kici United Nation High Commissioner for Refugees in UN Card mawkpiak nawnkeihen ci’n kumpi thuneite’n zaksak uh cih Channel News Asia pan kizasawn hi.

Minister in the Prime Minister’s Department Shahidan Kassim ii genkhiatna ah UNHCR in Malaysia gamsungah UN Card apiakding uhciang in Malaysia Home Ministry leh Immigration Department te hong kuppihphot uhhen cigiap hi.

Abeisa hun ah UNHCR Office in Refugee Card pen ko Home Ministry leh Immigration Department te kuppih masalo in ahawmkhiat uhpen khialmahmah uhhi ci uhhi.

Alor Setar UMNO divisional delegates meeting ah Saturday ni in Reporter te tungah agenkhiat hi a, UNHCR in Malaysia gamsung ah Diplomatic Status neilo hi cihzong genkhia hi. Tua ahih manin Police te’n bangci bangin Refugee Card ki hawmkhia hiam cih akankhiatding uh kadeih hi cihzong Shahidan Kassim in genbeh hi.

Banghang in Shahidan Kassim in hibang in genkhia hiam cihleh Malaysia gampen 1951 Convention hunlai in Refugee Status ah letmat thuhlo uh a, 1967 Protocol ahzong kihello uhhi.

Tua ahih manin Malaysia gamsung aom gamdangmi te’n Refugee Status adeih uhleh Malaysia kumpi thukhun Law tawh kituak in a ngetding uhpen thuman ahihi cih pulak uhhi.

Malaysia gamsungah Refugee Card atawi mi 130,000 bang phavenvanta a, hih mite pen UNHCR Office in Refugee Card apiakziauziau uhpen lauhuai mahmah hi. Banghanghiam cihleh hih gamdang mite pen hong paikhiatna gampan bangmawhna bawl, bang gamtat siatna Crime Case nei uhhiam cih kitheilo ahih manin, Malaysia gamsung anawngkaisak lelding ahihding lauhuai cihzong Shahidan Kassim in genkhia hi.

Tua ahih manin Malaysia in hih mite gamtatsiatna te thuakzo nawnlo ahih manin, Malaysia gamsung thukhun Law tawh kituaklo in akiman te agam ah ki puakkikding hi ci’n Shahidan Kassim in Reporter te tungah apulakkhia ahihi.

Tua ahih manin Malaysia gamsung aom Zomi khempeuh in vaksuk vaktohna, nasepna, ciahna kuanna te ah kidop mahmahding thupi dinghi. ZD Sawltak