Malaysia gamsung ah neklohding ngabung nam 6 ki tangkokhia leuleu

Malaysia gamsung ah neklohding ngabung nam 6 ki tangkokhia leuleu

Malaysia gamsung ah cidamna lamsang vaisai ahi Health Ministry te’n Sardine ngabung nam 6 tepen nekding in siangtholo, asungah Filum Nematoda Worm kici lungno kihel ahih manin nek huailo hi ci’n tangkokhia leuleu uhhi.

Health Minister director-general Datuk Dr Noor Hisham Abdullah in atangkokhiat hi a, tuabangin nekding in ahoihlo, asiangtholo Sardine ngabung Brand tepen Cinta, Sea Fresh, HS Brand, King Cup, Star, TC Boy cihteng ahihi.

Gampualam panin tuabang ngabung te Malaysia gamsungah aluttheih nawnloh nadinginzong National Gateways te ah “Hold, Test, Release” Action kizangsak in, Import akibawlding Canned Fish Products limlim hoihtak in sitcianna neisakta uhhi.

Hold, Test, Release kici pen gampualam panin vankhatpeuh gamsung ah akipuak, Import akibawlsawm ciangin Sample pawlkhat ki lamasa in, tuakhit ciangin hoihtak sitcianna kineisak dikdekphot hi. Mipi zatdingin hoihmahhi cih akimuhkhiat ciangbek in gamsung ah ki lutsakpan hi.

“Section 13 of the Food Act 1983” thukhun tawh kizui in mipi nekdingin nektheih khatpeuh gamsung ah alutsak Importing abawl, Distributing ahawmkhia, Storing akemkha, Selling azuakkhia cihte akipan munkhatpeuh ah akihelkha tepen mawhna nei uhhi. Tuabangin akihelkha tepen RM100,000 liausum kipiasak thei a, thongzong kum 10 ciangbang ki kiasak theihi ci’n Health Minister in genkhia hi.

More: Vitamin Pawl khat ~ Dr. Sian Za Kham

Hih atungah akipulakkhia Sardine ngabung nam 6 tepen Market ah zuakding inzong kiphal nawnlo, Supermarket te paninzong ki lakhiasak khinta cihi. Azenzen in tua Brand akipulak te sungpanin ngabung leisa innah nakepleh nekding in hoihloding hi. Ngabung pen siahat ahih manin, tampipi innah leisa in kikemthei hi. Na ngabung leisa te hoihtak na enkik inla, atunga Brand te akihelleh neknawnlohding hoihpen dinghi. Sawltak #zomidaily

China panin Malaysia gamsung akipuak ngabung sungah lungno kihel

Malaysia gamsung ah akizuak ngabung (Sardine) sungah natna apiangsakthei lungno akihelkha om cihi. Tua ngabung tepen China panin akibawlkhia hi a, Penang aom North Butterworth Container Terminal (NBCT) tawnin May 14 ni in Malaysia gamsung honglut kici hi.

Tua ngabung te pen kumpi thunei Malaysian Quarantine and Inspection Services (Maqis) te’n sitcianna aneih uhciangin asungah Anisakiasis Disease kici natna apiangsakthei lungno, thanno “Worm” pawlkhat kimukhia cimawk hi.

Maqis director-general Datuk Mokhtaruddin Husain inzong hihvai tawh kisai in agenkhiatna ah tua Sardine ngabung te kihongkhia in, hoihtak in Physical Examination kibawl a, asungah Worm lungno pawlkhat omtakpi hi.

Tua Sardine ngabung tepen Container 2 taktawh hongtung hi a, avekin agihna 36,720 kg bang phading hi. Sumtawh amanzahding akituak ciangin RM200,000 bang amanneiding hi a, tuate avekin kimankhia khinta hi ci’n zanni Tuesday (June 26) ni in Statement ah genkhia hi.

Tua ngabung anekha tepen asungah akihelkha lungno hangin cinatlawhthei, gilsung nasak, sungpaisak, sungnimsak in luakhia sakthei cihi.

More: Nisuhgah “Dates” sungah lungno pawlkhat kimu ahih manin Health Ministry in hoihtak sitsakding

Natna lungno akihel nektheih khatpeuh, ganhing, mehteh, sa, ngasa cihte gamsung ah alutpih aomleh “Section 14 of the Malaysian Quarantine and Inspection Services Act 2011” thukhun tawh thu akibawlthei ahihi. Hihvai zong kumpi thunei te’n hoihtak kancianding uh a, thu kibawlding cih kiza hi.

Nunglamdiak inzong hihbangdan ngabung sungah lungno kihel cih kiza ngeikhin hi. Sen te’n sumzon nadingin vanhoihlo tuamtuam bawlziauziau thei uh a, adiakdiak in Senbawl nektheih tepen kidop siamding thupi mahmah khading hi. Sawltak #zomidaily