Makai Hihna ~ Joshua 1:6-9

Makai Hihna ~ Joshua 1:6-9

Makai na hi hi. Pastor? Lai Siangtho sangsia? Pawlpi upa? Kipnawlna makai? Sunday school sia? Inn papi? Lam khat teitei panin makai na hi hi. Midangte etteh theih dingin na gamtat peuh leh makai na hi hi.

Tua ahih manin thugenna, nuntakna, itna, upna leh siangthona ah mi dingte etteh dingin na om kul ding hi. “Lampi thei-in, tua lampi zong zui pah a midangte tua lampi a zui sak theite” makai ahi hi.

Joshua in Kamciam gam tun na ding lampi thei a, amah in zong tua lampi zui pah a, Israel mite zong tua lampi zuisak thei hi. Makai hoih i suah theih na dingin Pasain in Josuah tunga a gen thute i zuih kul ding hi.

Pasian sungah thahat inla, hang in (tg.6)

Makai pawlkhatte pen nungzuite tungah kinga in nungzuite a bah uh ciangin amau zong bah dihmawk uh hi. Makai na hi hi. Thahat in. Pasian in Joshua tungah thahat inla, hang in cih tawh thum vei sitset thapia hi. Makai pawlkhatte pen hanglo uh hi. Khialh ding na lau laiteng bangmah na suak kei ding hi. Makai na hi hi.

Pasian thukham khempeuh zui in (tg.7)

Nang thuthu in makaih kei in la, Pasian thukhamte zui-in, tua tawh makaih in. Nang pen makai na hih hangin nakhial thei veve hi. Na khialh khak loh na dingin a khial theilo Pasian thukhamte zui in.

Pasian thukhamte lungngaingai in (tg.8)

‘Makai hoih in zanin ngaihsun a, sunin semkhia hi’ cih paunak om hi. Ngaihsut loh, lungngaih lohin bangmah sem kei zaw in. Pasian thukhamte lungngai kikkik in la, tua tawh makaih in.

Pasian in hong ompih cih phawk in (tg.9)

Makai i cihte pen khat veivei khattang mahmah thei uh hi. Makai na hih leh Pasian in nang hong ompih cih phawk in. Hih thu naphawk nak leh makai hoih na suak hamtang ding hi. Kuamah in hong ompih loh hangin Pasian in nang hong ompih ahih manin nang bek in na makaih kei hi.

Hau Suan Khai (ZAM)