Lungsim kikep zawhna ~ NK Khanno

Lungsim kikep zawhna ~ NK Khanno

Lungsim hoih khempeuh, a pil aciim khempeuh kizahtak kim lo hi. lungsim hoih le a picing, a pil aciim makaipi te hoihna khatin lungsim kikepzawhna ahi hi.

Ahizongin deihloh, thukimloh thukhat ah thukpah lo in dai khikhe zezen sam napi ama thuneihna, hih theihna hun tun ciangin thukikna ahkl nuaizanna cih pen a gongtat makai (dictator) te lungsim puak zia ahi leuleu hi.

Makai hoih icih te in a lehhek, a langpan te na ngawn tungah bangmah cih lo in thupha bawl zaw lai uhi. “Ahoih pen galzawhna in galte lawm aa bawlna ahi hi” ci’n Abraham Lincoln in na gen ngei hi. (Paunak 25;21, Luke 6:35, Rom 12;20)

Leitung ah siatna (crime) tamzaw pen lungsim kepzawhlohna te ahi lungsona, hansuahna, lungtomna… cihte hangin a piang ahi hi. Lungso sa in motor hawlkhat pen motor kitaih, ki but theihna ding thu ah lungsim a kemzote sangin azah tampi tamzaw hi. Tua mah bangin, kipawlkhopna, nasepna ah, nupa kaal ah lungsona le hansuahnate hong omciang in kiamsukna le kikhenna te piang sak hi cih i theihsa thu ahi hi.

Lungsona hangin kiamsukna le supna a kingah lam a kitel muh mahmah khat in tukpeng kimawl na ahi hi. Tukpeng kimawlna ah a lungsim a kikemzolo pawlte in lel zaw den uhi. Maikah minthangte ahkl a lungtom khat a om leh a kidempih te in tua te gim in shu pahpah lel uhi. Heh semsem a langkhat te nuam semsem cih ahi hi. Maikah khat ahih leh a hehna lungsim hangin bawhlung tung ah a lungsim tung nawnlo ahih manin goal zong hoihtak sui theilo in hih ding theilo mimawl bang in om thei lel mawk hi.

Gtn. 2006 Worldcup lai in England maikah Rooney alangkhat a kidempih Portugal te in va shu kiaukiua zel, kengsiah zel, nawk zel cih bangin a phinphin uh leh a sawtna ah thuakzo lo in mikhat tungah thukkik hi. Tua hangin amah kihawlkhia in amau pawlin lelh lawh pah uhi. Worldcup final a minthang Zidance le Materazzi te zong hi bangmah ahi uhi. Zidane in a lungsim a kepzawhloh manin a mau gamin worldcup ngahloh lawh uhi cileng zong kikhiallo ding hi.

Kawlgam tukpeng te zong hibang mah ahi uhi. Thai, Singapore te in interview ah siangtak in genkhia lel uhi. Kawlgam tukpeng sui te hehna ding phin semsem kawlte heh semsem in bawhlung tungah a lungsim tungnawnlo in a mi tungbek ah lungsim tung.. ami mahmah cih lungsim tawh mi shusuk pah… kihawlkhia pah… guallel pah… cih ahi hi.

Lungsona, lungtomna cihte pen lungsim kikepzawhlohna hang ahi hi. Emotions kem zolo te pen Emotional Quotient (EQ) a niamlai mite zong ahi uhi. EQ niam te pen nuam baih, hehbaih cih bangin a lungsim uh kikem zolo uhi. Mihing’ khuak lamtawh kisai kantel te genna ah hehsuahna, emotions cihte pen ‘Amygdala’ kici bepum tangcia apha khuak sabawk panin hong phul khia ahi hi ci uhi.

Thakhat gul khat muhvat ciangin “Nu! Topa!” ci aa awng in diangin i om na zong hih ‘Amygdala’ kici sabawk hangmah ahi hi. Tua hi a dahna, siatna, lauhuai na, haksatna khat peuhpeuh tuahkhak ciangin kipkhotak le dai tak in i om theih nading in hih ‘Amaygdala’ pen ki sinsak ding kisam hi. A kimawl mikhat in a thahat nading a awmsa, tansa, bansate a sinsak bangmah ahi hi.

Lawmte tawh kiho na panin lungso na tawh “Kei bang hongsa nai vua, liakluak geuh” ci’n a dingvat laitak phone khat hong pai in “Halaw, aw Pu maw, he himah ingh ei, zingciang kingah ta ding ci ei hehehe, himah ei..” cih bangin aw hong kikhel kik leuleu dan imu ngei ding hi. Ei mahmah zong itua ci ngei khathei ding hi. Hih bang kikhel na zong pen ‘Amygdala’ in a sep ahi hi. ‘Amygdala’ apicing lo mikhat in munkhat pan a lungsona pen phone tawh kihopih mikhat tung ah hap khat suah suk pah thei hi.

A pai napeuh ah pua kawikawi in, a om na peuh ah mitawh kitawng, mi tung lungkim lo cih bang buaina piangsak kawikawi in meikuang bangin buaina kuangpha semsem zaw behlap hi. Gtn. Inn ah a zi tawh kikamtam sa in zum pai, zum ah a muh peuhpeuh, thudong masa sa hapkhat suah suk, a pu thusawl awtol tawh dawngkik.. tua bang teng tawh niangtuisai pai.. niangtuisai ah niangtui vaikhak zekai kha/ cikhum tawm lua cih hangin hapkhat suah suk, a kim aa om mite tawh kiho in kitawng leuleu cih bang in lungsim kikep zawhlohna hangin a paina peuh ah siatna bekbek piang sak hi.

‘Amygdala’ picin nading in kisinna nam tampi om hi. Sanglai sinna ah ahih leh sikante, tangthute, lapau, la cihte in ‘Amygdala’ picin theih nading thute ahi hi. Adang khat in cileng pilna sang nei te in lungsim kikepna lam thahat zaw uhi. Ahizongin pilmahmah napi lungsim kikem zolo zong ki om aa, tua te i makaihna kipawlna te pen siatna lam manawh zaw uhi.

Lungsim a kemzo David kumpipa in late 37 na ah lungsim kikep zawh nading na limgen hi. Late 37;8 “hehna panin kikham inla, sinsona nusia in. Nangmah kilungso tawmsak kei in; tua in siatna bekah a hong paipih hi” na ci hi. Tua hi a, Pasian maipha ngah kumpi khat ahih banah a ma hun sungin Isreal kumpi gam pen kipkho tak in om in zai mahmah hi.

Ni danglai in khangham puteek khat in “Khangno laite bek a heh thei uhi. Kei bel ka kum zong tamta in hehna cih neinawn kei ingh, keilekei kikem zo mahmah ta ingh.” acih ciangin a gei aa khangno khat in “na zuau hi, neilai mah teh”

“Nei nawn keng” “Nei hamtang lai teh” “Nei kei veng aw” cih bangin kinial nial uh a, a sawt cianing puteek pa in “Nau pang kamtam, dai suk peuh” ci’n maisan teita le khua-ul nel kai kawmsa in puteek pa ong paukhia hi.

“Pu aw hehsuak thei nawnlo na cih a suak thei lai mah ve leh, hehna pen khangno khangham cih tawh kisai lo cih na theita hia?”

“Himah ei, hizah ta aa nong phin, nong nialnial ciangaa ka heh a suakvat mah aive” hong ci biangbuang kik hi.

Hehna ding in mikhat lekhat kibawl thei hi. A diakdiak in hehna 70% bangpen i kinai pihte tungah kisuan suk ziau thei hi ci hi. A pua lam a a hehna a ip ip teng inn a tun ciangin a zi atate, a zawlpa cihte tungah buaksuk gawp ziau cih dan hi.

Hansuahna, hehna koi ci kep ding (daihsak na ding ziate)

(i.) Na heh a suah ciangin kua mah en kei in. (Hehsuah ciangin mikhat etna pen Zomi te in ‘en’ ici nawnkei aa ‘sal/ sal gega’ i ci hi.) Tua hangin siatlawhna tampi in hong nungzuih thei lai hi.

(ii.) Kam cip bikbek na in hehna daisak tuam hi. Ki nial kisel leh zong a pilzaw, thu sau ngaihsun theizaw pen in a nial a selna te pan khawl in kam cipna in hehna daisak tuam lel hi.

(iii.) Awtol, awng lala cihte sak in aw saukaih in damtak in pau leng hehna kiamsak tuam in a zate aading zong zaknop zaw hi. Bangzah ta in deihsak na kammal ahi phialzongin awtol le ot vava na hangin siatzawkna lam piangsak thei hi.

(iv.) Pasian tungah kiko in la, awng in. Tua bang otna hangin zong hehna zangsak tuam hi ci hi.

(v.) Zanlup ciangin laisiangtho sim, ciamnuih tawh kisai laibu sim ahkl video en cih bangte..

(vi.) Hong hehsak mite’ hoihna te ngaihsut sak na. Eitung ahizong a thupha bawlnate ngaihsutsak na le ama tungah na hehna te lai aa atna te in na hehna kiamsak tuam ding hi.

(vii.) German galkap te in ahih leh a tungsiah pa tungah lungsimlohna, hehna khat a neih le a zingciang (nai 24 khit) ah genthei pan ding cih thukhun nei sese uhi.

(viii.) American gambuputangpi 16na ahi Abraham Lincoln in ahih leh a hehna alungkimlohna te lai ah at in kem lel hi. Tua bang tawh a gam a makaih ahi hi.

(ix.) Hehna hangin kammal kilawmlo paukhiatna, kammal kha paukhiatna hangin a langkhat te aading in lungsimnatna le gimna te piangsak thei zaw hi. Singkhuam tung aa kikhen siktawkilh te i dokkhiat kik hangin a ma a om lai mah bangin heh suah laitak in paukhiat kammal khat pen ama om in kiphiatkhia thei nawnlo hi.

(x.) Hehna tawh a kilehbulh thu in ‘Itna’ ahi hi. Tua hi aa a nuai aa laisiangtho lotngah in sim leng zong hehna kiamtuam sak hi.

Korin masa 13:4-7 (ZIV) “Itna neite – a lungduai-in migi hi; Hazatna lungsim nei lo-in, zong kisa thei lo hi; a kilawmlo in gamta lo, heh pakpak lo, mite mawhna ciamtehlo; thuman lote ah lungdam ngeilo; thumante bekah lungdam uh; lungkia cih om ngeilo; upna, lametna, lungduaitak in a ngakna te uh amawkna cih om ngeilo hi….” Lai-at ; Nk Khanno Ref; dawtah ko thengchoke chin by M. Zaw Aung