Lungsim hoih mihau ~ Lian Tuang

Lungsim hoih mihau ~ Lian Tuang

Yangon tun ma tai 76 pawl ah zingsang khuavak tungin bus khat kibung hi. Tu kum March kha ni 5 hi a, mi 41 lahak 14 si hi. Hih tungtangah gen ding tampi om a tua sung panin lungsim hoih mihau khat pa gamtatzia zong I gen nuam hi.

Mawtaw kibutna phualah palikte, meiphelhte, a kim a pam pan mi tampi ong kipai ziahziah hi. Mawtaw tunga tuang teng a si tawh a liam tawh ka vekpi un zato khat ong kipuak hi.

Zato ka tun uh ciangun lupna kicing loin tutna tung khawngah zong kilum ngeingai hi. A kisan leklek tawh, a kap a tau tawh, mi a kizongzong tawh kiso ziazua hi. Siavuan siamahte in a ban takin bawl ziahziah uhi. Zato sual tungteng si bekbek tawh kidim hi. A liam a gim mahmahte Ambulance tawh Yangon ah pai sak pah uhi.

Palikte siavuan siamahte, mawtaw nasemte a kipan mi khempeuh buai mahmah in an nek ding kua man phawk lo uhi. Sun lam ciangin ko a lim liamlo zawdeuh mi 4 khawngin ka gil uh kiallua ahih manin zato gei ansai khat ah an ka ne uhi.

A den deuh ciangin mawtaw hoih mahmah khat tawh anphel tampi le a vot dawn ding tampi ong tung hi. Hih vai nasem khempeuh tungah uniform silh sitset tangval khat in anphel le a vot te ahawmhawm hi. Anphel a apiak ciangin kiniamkhiatin kun khiankhian hi.

Kei zong khat ong pia hi. Ne khin ing ka cihleh a vot dawn in ci in ong pia veve hi. Tangval pa ka hopih pih hi. Anphel le a vot pen mawtawte vaihawm maw ka cihleh hi peuhmah kei, mawtawte buailua in bangmah phawkman nai ken teh. Anphel pen Pioneer an sai pi ( Pioneer food centre ) pan hi. Kei pen ansai nasem khat hi ing. Highway lampi tunga tuahsia le dongtuak khat peuh a om leh an le tui tawh delh lianlian ding, a kisam bangbang huh ding cih pen ka boss pa lunggulhna hi. Tun zong amah tawh ong pai hi ung. Ka boss pa pen hia hi ci in ong lak hi.

Pioneer an sai I cih pen Highway lampi tunga An sai lian pen khat ahi hi. A boss pa pen khangmoi mahmah lai ahih manin thupi in hampha ka sa mahmah hi.

Nitak lam nai 3 pawl ciangin palik len ah pai ding, tua lai pan ka van teng uh ong kipia kik dingin tua pan Yangon ah pai suak ding cih dan ahi hi. Palik len pen zato pan tai 7 kigamla hi.

Ambulance tawh a pai ding ka hi uh hi. Ambulance te sungah ong guangguang uh a atawpna ah mi thum ka val kiaukuau uhi. Kihen suk tantan dingin ka kithawi uhleh Pioneer boss pa in a tat kei leh ong kha pak leng ai ve ci in amawtaw kongkhak hong samsam hi. Mawtaw neite le palikte in a lem bangbangin na pai nung e, aana huai lua, inn ciah kawm lah hi thei lo deuh aih teh ci kei uhi.

A mawtaw lah hoih lua mahmah ko lah a puang phingpheng vive ka hih manun kisuan kawmkawm in ka tuang uhi. Ko ka pai khol uhi. A phual ka tun uh ciangun ka lawmte ong tung nailo ahih manin pioneer boss pa in, a pualam khuahun sa lua hi. Mawtaw sungah tawlnga hithiat lel un, set mit loin Air con ong hon sak ning, ong ci hi.

Ken zong phamawh sam kei e, palik zum inn sung leh singkung lim khat peuh ah na tu lel nung ka cihleh no pen tulai tak na ci na sa uh sa in na lungsim uh linglawng mahmah ahih manin a votna a daihna ah na om dinguh hoih zaw hi. Bangmah kisuan ngaihsut kei un. No tungtawnin ken thupha a bawlbawl kha hi zaw ing ong ci zawsop hi. Nai lang val sung bang mawtaw sungah ka tawlnga hithiat takpi uhi. A cih mah bangin lungsim pumpi tampi ong zangtuam tham hi.

Ka lawmte ong tun ciangin ka vante uh la in mawtawte vaihawm sakna tawh Yangon ka zuan suak uhi.

Hih thute ka ngaihsut kikkik ciangin ka lungsim ong su kha thu tampi lakah Pioneer nei pa gamtatzia zong a thulamdangpi khat mah in ka ngaihsun hi. Dongtuakte ading anphel a lim mahmah tun bek hi loin kiniamkhiatna le itna tak tawh piakhia hi. A neihsa a lamsa a hunte it sit het loin dongtuakte ading kiphal takin kipiakhia hi. Dongtuakte a huh ciangin itna deihsakna taktawh huh in, a innkuanpihte bang lian in bawl thei ka sa hi.

Sum hau bek hi loin itna lainatna thukhualnate zong hau mahmah ka sa hi.

Ei Zomite sungah zong hih bangin mi cimawh dongtuakte a panpih le mi namkim te belh theih ding mihau mi lungsimhoih pawl khat i om a, mai lamah tampi a om semsem nadingin i biak Pa Pasian kiangah lungdam ko in thu ka ngenngen hi. Lian Tuang