Lungsim hoih ~ GS Pau

Lungsim hoih ~ GS Pau

Na lungsim ngaihsutnate in nuntakna naak hi a, na neihsa a manphapen bangin na kep ding ahi hi. (Pau 4:23) – Pastor pension la khin khat kiangah mi pawlkhat va hawhin “Sia aw, kum 30 val bang Pasian’ na sem khin na hih ciangin Pasian’ na sepna ah bang kisam sapen na hiam?” ci-in a dot uh leh tua siapa in “Pasian’ na sepna ah pilna kisam masa kei, thugensiam zong kisam masa kei, lungsim hoih mah kisam sapen ing” ci-in dawng hi.

Ama’n a gen thuahna ah, Pasian pen lungsim a en Pasian hi. Pasian in lungsim hoih a nei lo mipilte le thugen siamte thupha pia tuan lo hi. Tua ahih manin pawlpi mite in lungsimhoih a nei Pastor le makai i neih theih nadingin nakpi takin thu nget-huai hi, ci-in hanthawn thuah lai hi.

Mihing i nuntakna pen i pianpih lungsim tungah kinga mahmah hi. I suah a kipan lungsim hoih ahih keileh lungsim sia kinei pah hi. Americante innkuan thu a kantel mipil, Dr. Paul Popeneo in “Pianpih lungsim hoih le pianpih lungsim sia pen lungsim hoih a nei nu le pate sung pana piang tate in lungsim hoih hong nei ham-tang uh hi. Pianpih lungsim hoih nei mi lakah 70% te’n pianna gui zui-in a luahsuk uh hi a, 30% te’n pen mimal zui-in a neih uh ahi hi” na ci hi.

Pasian mizat mipil khat in a genna ah, “Pianpih lungsim pen khel ding haksa mahmah hi. Mi khat hong pianthak hangin a pianpih lungsim pen kikhelsiang khin zo lo ding hi. Khalam ah a thahat lai teng a lungsim hong kem zo ding a, ahi zongin hun khatpeuh ciang a gial hong kidawk veve ding hi. Topa Zeisu’ nungzuite zong tua bang mah hi. Tua ahih manin Pasian’ thu ah hi taleh, leitung thu ah hi taleh pianpih lungsim hoih neite’n hong makaih thei leh hoihpen ding hi,” ci hi.

Kawlte Pasian’ mizat Sia khat in zong, “Pianpih lungsim hoih a nei khat in bangbang a sem zongin ngiimna hoih le lungsim maan tawh sem hi. Pianpih lung-sim sia a nei khat in Pasian’ na keek hong sem zongin ngiimna hoih lo le lungsim maan lo vive tawh hong sem veve ding hi,” ci hi. Tua ahih manin Pasian’ nasem ding mi i teel ciangin Pasian le ama kizopna banah pianpih lungsim hoih a nei nam le gui sunga mite teel le’ng kikhial lo ding hi. GS Pau