Lungkiat-natna ih veikha hiam?

Lungkiat-natna ih veikha hiam?

“Ih pa a damlai hiam?” cih dotna kammal ih zangei kha ding hi. A hang’ tuamtuam tawh nuntaak nuamzaw zongding in pianna gamlei leh innmun logam nusia in, lothak gamthak kizuan hi. Munthak a hihmah bangin, lam-etna lianpi nei-in, lungsim thatang neihzah tawh ki hanciam in ki thalawpzaw hamtang hi.

Kongpua piallo, mundang-gamdang tunlohhang zong’ ki thalawpsuah peuhle-uh nuntaakna kilamdang thei veve hinapi’ a lungkhauhlo te’ a muhngeiteng, sepngeiteng vive ci-in lungkiat-natna sung ah awk in, puukmang thei hi. Numei pasal, a moi-ahaam cilo-in, zuu namtuamtuam aa kipan, khamtheih-guihtheih tuamtuam in nungzuih thei hi. Tua nung ah, kilawmlo hunlo pipi-in mual hong liamsan ta uh hi. A beisa kumpi te’n Kawlgammipi khempeuh lungsim-natna, lungkiat-natna ngahbek hilo damzo nawnlo, kibawlzo nawnlo (beyond repair) ding in, a hongkoih sawnsawn uh hi.

Tua hi aa, kalamhkiatna-kapianna aw Taangbang nadamlai hiam? Lungkiat-natna tawh kidim in na nitum kha-uh hiam? ci-in laizomteng khuangaihna in hongtuam zeel hi.

A hoihzaw ihtheih ihmuh mateng’ a hibangtawh kilungkimlel thei napi’, zawnghaa neilo-zawnghaa kiguan in, minopsakdan mu-in, ih neekpihlo teh, lungsim zawngkhaal thei aa, kidawm in ih dinmun thei-in, ih sansiam keileh, ki tuukbaih mahmah a hihi.

“Innmun logam ih cih zong haaibang a ngak omkei leh kiak-lo daaikaai ing’ hi-vei!” kici aa, naa khat peuh a ngak a zuun omkei leh paankaai-in a siatbaih mahbang in, ih pumpi zong puahlo, sillo-in omleeng, geep in ci-damna sukha bekthamlo, meel na-ngawn siasak hi. Lungsim-ngaihsutna zong kepsiam puahsiam ngai hi. Gamkhat ii lam-et a hi’ khangnote sung ah tuplehsawm ommeello lungkiat-natna a kivei leh tuagam mailamding lungkhamhuai hongsuak hi.

Lungkiat-natna bang hiam?

Lungkiat-natna pen dahna-haksatna ih nawkkhak hun, khaliik-khakiam a hunhun in lungziingna ciangbek hilo aa, a tawntung-nisimphialmah in lungsim zawngkhalna natna lianpi khat a hihi. Thanuamlo cihciang bek hilo in, khuak nasepna a kilamdang sak, khuak a sukha cidamlohna liankhat zong a hihi. Pianpih gui, a hunzui aa sisan thalawpsak/hormones, cidamlohna, lunggimluatna, dahna leh nuntaak hatsatna tuamtuamte khatbek hang’in zong lungkiat-natna piangkhia thei hi.

Lungkiat-natna in upmawhlohpi-in, a nasia mahmah damlohna lianpikhat a hidih zen hi. Leitungbup cidamnang’ kipawlna (WHO) te’n, ih nuntaaksung in, numei ngalak-ah-khat leh pasal sawmlak-ah-khat bang -in a kituak thei ci aa, leitung ah mihing te deihbang in hong gamtang’sak zolo natna lianpenkhat in na ciamteh uh hi. Leitung gamminthang USA ah numei zalak-ah 21 leh pasal zalak-ah 12 bang in, a khansung un lungkiat-natna tuak kici hi. A moi-ahaam khenlo in mikhempeuh in kingah thei ahihi. A dang pumpi damlohna (zunkhum, lungtangna..cihbang) tawh kigawmlai leh a lungkham huai mahmahsuak hi. A poisawnsawn ah hih natna pen kitheipaklo theilai hi.

Bang taktak in Lungkiat-natna piangsak hiam?

Natna lianpi a hihhang-in mipilte’ na ngawn-in a hangtaktak ngawhlianding thei lo aa, a kipatciang in bel, a nuai aa limlehdan zui-in upmawhna neizopan bek hi.

Sinlung luanzia(Feelings): Dahna, lam-et beina, mawh-kisakdiakna/kisuanna, lungsim daihlohna-nuam/hehbaihna, hehluatgawpna, lunglut/uukna-neihlohna.

Ngaihsutna (Thoughts): Omhithiat zolo/Lungbuaidenna, thu khensat-theihlohna, thu ciapteh-zawhlohna, lungmawk/haai-omna. Lungdamh theilo ,thuhoih mutheilo in, a kiphatna nangawn zong lehlamta lakdenna.

Omdan/luheekdan (Behaviours): Midang tawh kikhawlnuam nawnlo, zatui/guitheih/khamtheih thaang zatna, nasep/sangkah/sepding khatpeuh pelhna/tang’tunlohna, ei leh ei pumpi ki natsaknopna.

Ciilehsa (Physical problems): Gentheihlian omlo ciilehsa natgawpna, ankamlimna kikheelna, pumpi gihna kilamdanvatna, ihmut-hun tom/sau luatna, ziilehpasal omkhopna kikal buaina.

A tung aa te, khat leh nih kituakkha tek aa, tampi-kigawm a hihkei nak leh lungkiat-natna hipah samlo hi. A zenzen in ih ki-upmawhpian lehbel natna theite’ tawh ki sittel huai hi.

Lungkiat-natna bangci damsak ding?

A limlehdan zui-in kibawl thei hi. Pawlkhat te lungsimthu tawh a kizo a om-mahbang in, zatui/zahaa tawh kingahzong omthei mah hi. Nuntaakzia kheelna (Neklehdawn, gamtat-luheek) tawh kibawltheih zong a hihhi.

Nuntaakzia kheel in, ei leh ei kimuanna leh tuplehngim neihna cihbang kalsuanzia te’n zong kilamdang sak ahihi.

UK-NHS te’n a tom in a taangko navuah: lawmlehgual-itlehngaih tawh kikhawl ding-tangomlo ding, pumpi gamtaangh-exercise bawlding, na lungnoploh, na launa khat peellozaw in, bangci nawkding cih lampi zong ding, zuu tam dawnlo ding, cidamsak ante ne ding-a kilawmzahbek in anne ding, luphun-thawhhun cihbang nisim gamtatna ah hun-maan ding. A hizong a hunlap in, huhna ngen hamtang in ci-in kihanthawn uh aa, huh-ngettheihna kipawlna a tuamtuam zong ompah hi.

Gamkhangto a kici te ah bel, Kawlgam-Khamtung Zogam bang hisam lo in, lungsim-natna, lungkiat-natna a tuakte’ zuattheihding mun leh kipawlna tampi om hi.

Lungkiat-natna a damna ding in, Mangkang te’n Catch 22 ci-in, akipeeltheilo-thuhamsapi pawlkhat kantan zawhding kisam ci hi. Ih hihnoploh a haksa tengmah tawh kipatkhiat kul ci hi. Bangmah gamtatnoplohna hang’in lungkia, lungkiat man-in bangmah kipan khiazolo cihdan hi-aa, a hang’tuamtuam pia-in ei leh ei kiphelhna(excuses) te paihkhiatding kisam hi. Ei leh ei kithaneemsak, kimawhsak dengdang dinghilo aa, thasan-in thawhkhiat ding a hihi.

Dr. Do Kham in, “A niamte laamto aa, pahtawihuaite (gualzote) patawi ding” a cihmahbang in, siamna tek ah mun kipiakna hang’in zong lungkiat-natna kidalthei ding a hihi.

A tom in bel, pumpi gamtatna-exercise bawlna in khuak zatui mahbang in khuak thagui zong haatsak hi. A kilawm-kituak in nisa ngah ding zong thupi hi. Khuak-hoihsak phadiak a hi’ ngasa pan a kingahthei-ngapithau/Omega 3 zong nek ding hoih hi. Lawmlehgual tawh kithuah ding leh ihmut cimding zong kisam hi. Ekneelhaai’ bang in, ih lungsung ah thubeisa thusia bekbek ngaihsun lo-in, thuhoihlam bek ngaihsun in, tuplehsawm neih ding leh kithalawpsuah in, kalsuanpah ding zong kisam hi. Deihbang a pianlohhang a tawpna-‘the end of the world’ hipah samlo cih phawk ding’ kul hi.

Tuciangciang Zomite sung ah, Pasianthu kihaat aa, pawltuamtuam zong om a hih man-in, lungkiat-natna dalna ding’ lampan en leeng, lawmlehgual kikholhna leh lungsim cidamna ding in, a hoih mahmah khat a hihi. A hizong in, biakna sungah thalawptak aa kihello, sanggam ulehnau te bangci kaihkhop aa, lungsim cidamna bangci khansak ding’ cihbel, makaite leh mimal a semzo te kimuang hi.

A diakdiak in, ih mailam masuanpi a hi’ Zogam aa om sanggam te’ veina-taktawh a semkhia ding mikisam hi. Gam khangtote bangin, belh leh zuattheih ding kumpi leh a dang kipawlna omlo a hih man-in, ih lenmual ah tungsunni hongsuak-in a taanhden na’ng, ih mipihte satsuah leh la’amto aa , tha-sansak ding’ Zosuansungmah pan, mapan huai a hihi. Ih gam, ih minam, ih mi te’n lungkiat-natna a veikha hiam? Nantal’suan

Etkaakna leh Lungkiat-natna a simbeh nuam te aa ding:

• http://www.mentalhealthamerica.net/stressed-or-depressed-know-difference
• http://www.depressiontoolkit.org/aboutyourdiagnosis/depression.asp
• https://www.helpguide.org/articles/depression/coping-with-depression.htm
• https://www.nhs.uk/conditions/stress-anxiety-depression/dealing-with-depression/?
• https://zomidaily.com/lungkiat-natna-koici-dalding-sia-francis-kham/