Lungdam kohna ~ Pastor Solomon Thawn

Zomi u le nau,
Leitung muntuamtuam a om Pasian kianga thungen Zomite tungah a beisa nipi kal nih lai-a thungetpih kong cialna thu tawh kizui-in, Norway gam Trondheim khuapi ah 19.07.2014 ni-in Kachin sanggamte ii nupa suahna mopawi, 21-23.07.2014 ni (3) sung Laisiangtho sinna leh nitak sim Prayer & Healing Festival vaite buaina nawkkhakna omlo-in nuamtak lawhcing takin ki bawl thei hi.

Tua ban-ah, Norway gam Oslo University ah International politics tawh kisai Kawlgam pan summer training hong kah ZCD taangmi Pu Zam Za Mung zong Trondheim khuapi ah 25.07.2014 nitak lamin nipi-nino sangkhak tawlngak sung hong hawh a, amah tawh nuamtak in gam leh minam vaite kikup kikholh khopna te hun khamlo taka ka na zatkhop khit un, 27.07.2014 ni sun-in Oslo khuapi ah hong ciahsan kik ahi hi. Hun nuam hun manphate hong ngah hong zangkhawm sak leh Zomi hihna hong ki angtanpih tuam sak Pasian leh amah Pu Zam Za Mung tungah bek thamlo-in, Zomi Zogam it-a gamsung gampua-a nasem maakaite khempeuh, Zomi a it Zomi hihna kilawmtak siangtho etlawmtak-a a nuntakpih Zomi khempeuh, Zomi a ding lungsim leh kha tawh thungen Zomi khempeuh tungah lungdam in kong phawk mahmah uh-a, hampha zong kisa in, thungetna zong ka na neikhawm uh hi. Amah’n tuzawh nipi khat khit teh innlam zuan-in hong ciahsan kik pah ding ahih manin, ama maaban neihlai a sangkahna summer training exam/evaluation laihuanna zong hoihtak hong zo-a, maazang tak lawhcing tak-a Zogam Zomite a ding gam ki-uk kivaihawmna gam leh minam vaisaina politics thu-ah thupha naakpi lamlak aksipi khat-a Pasian-in hong zatsak theihna dingin deihsakna i puak hi.

Hih khempeuh Pasian hong hehpihna, hong makaih hong geelsaknate tungtawn-a, thu ummite’n thu nong ngetpih tekna hang uh bek hi cih phawkin, mun tuamtuam pan thungetna leh lungsim deihsakna tawh hong panpih Zomi Zosuan Zotate khempeuh tungah lungdam thu kongpuak uh a, Pasian in a ki ciangtanlo vantung leitung thupha tampi note tungah tatsat lo a kizom paisuak-in hong luan tawntung ta hen cih thu lungdam kong koh na uh leh ka thungetna uh ahi hi.

Pasian Gam leh minam a ding thungetna tawh,

Pastor Solomon Thawn
Trondheim